蔡穎恩唔開心　 Anjaylia攬實安慰

Ads by Google

以八模名義一齊出寫真嘅𡃁模 Anjaylia（陳嘉寶）同 Evelyn（蔡穎恩），十幾歲識到而家，老友鬼鬼，一齊拍廣告出活動外，兩姊妹私下見得都好密。

有日《壹》仔見到佢哋去咗時代廣場三點三，傾心事傾咗個幾鐘先走，落到街， Evelyn同 Anjaylia攬實道別時，竟然想喊想喊咁樣。 Evelyn成日話 Anjaylia傻吓傻吓，所以連對方同邊啲男仔拍拖，佢都要親自過目俾意見；但睇當日狀況，要人幫手俾意見嗰個其實係佢！
老實講，兩個都係得廿五歲，大家咁高咁大！

見到《壹》仔，即刻笑晒，之後眼腫腫嘅 Evelyn繑住 Anjaylia急步離開。

經過黃修平執導新片《哪一天我們會飛》宣傳海報，兩個停低 selfie。

等𨋢期間，見《壹》仔仲未走， Evelyn驚驚青青；𨋢到， Anjaylia第一時間推住好姊妹行。

開心唔開心， Anjaylia同 Evelyn兩份分，飲茶一樣，夾錢找數。