專題 Log In

熱血重燃  The 44th Tokyo Motor Show 2015

Ads by Google

唔好以為強國嘅車展可以代表亞洲,其實強國車展原創性係零!愈搞愈大只係因為「跪低」咗嘅歐洲列強當佢係掘金地!亞洲最有代表性車展始終係日本東京車展,因為佢展出嘅新車足以影響全世界汽車潮流!
兩年一度嘅東京車展今年去到第 44屆,自 3• 11大地震後繼續移師近台場嘅有明「 Tokyo Big Sight」展場舉行,今年嘅主題係「 Your heart will race」,唔使解釋都知會有大量跑車現身,其他車種亦全線滲入跑味!

Part.1 跑車大晒

雙門跑車沈寂多年,歐洲車廠啲跑得吓嘅揭背車都幾十萬,難道窮人真係以後都冇跑車玩?錯,因為 Toyota平價跑車復活喇!仲一嚟就打孖上。而且造電單車出名激嘅 Honda同 Yamaha就一個癲到想出 kit car;一個搞埋四個轆跑車!加埋 Mazda新一代轉子王蒲頭同 Nissan、 Lexus嘅旗艦戰神,務求令咩身家嘅人都有跑車玩!

膽正命平  Toyota S-FR

跑車想吸引人唔一定大馬力,外表亦未必極度嚇鬼咁離地, Toyota車展前已預告展出嘅 S-FR先係全場最爆!事關廠方知道喺呢個經濟環境下,三十幾萬嘅 86都嫌貴得滯,整多部更加小型嘅尾驅跑車出嚟。眼前嘅 S-FR完成度已經有 90%以上,中控台同表板接近現實,車廂有齊安全帶,仲罕有地公佈晒規格,相信 2016年就可以賣街。據知 S-FR會配 Corolla嘅 1.5公升 NA引擎,馬力及扭力分別有 130匹同 15.1kgm,而且用埋原始 6前速手波,肯定有最原汁原味嘅駕駛感,最緊要係車價起碼平 86十萬!




現場睇雖然個籠已經同量產車冇分別,個彩色表板真係識郁,仲駁埋部電話落中控台播歌同導航。


前座都幾細張吓,但咁先夠包,不過後座比 Audi TT更地獄!好彩有天幕頂補數。


車身 3,990× 1,695× 1,320(mm),軸距 2,480mm,全車只重 980kg,同 Mazda MX-5接近,不過 S-FR仲堅啲,竟然用 4座位佈局!


有明展館比之前嘅幕張展場細近一半,但離東京市中心只係 20分鐘車程,最緊要遠離輻射區。 狂野露出  Toyota KIKAI

S-FR個樣圓碌碌太 cutie?唔緊要, Toyota仲有呢部 KIKAI(機械)!就好似車名咁外表一啲都冇高科技跑車感覺,反而標榜原始,全車懸掛、引擎、排氣喉全部外露,比方程式裸得更徹底。更癲係同 K-Car差唔多大嘅雙趟門車身之內,採用咗「品」字形 3座位佈局,而且係中置引擎,未試車都知佢一定好操控!日本車中罕有嘅 hardcore設計,搞到現場 40歲以上麻甩非常興奮,不過睇個款都知投產可能性極低……










首製四輪  Yamaha SPORTS RIDE CONCEPT

玩車嘅人都知以前 Toyota最堅嘅引擎都係由 Yamaha代工製造,今年 Yamaha就直頭自己搞咗部縮水 supercar參展,名為 SPORTS RIDE CONCEPT嘅概念車,用上由著名 F1賽車設計公司 Gordon Murray設計嘅 iStream多用途底盤,十足 McLaren咁用一體化製作,令車重只有 750kg,並採用中置引擎佈局。就算未有其他詳細規格,以 Yamaha嘅實力,求其擺副高轉電單車引擎落去都癲晒啦!







3,900× 1,720× 1,170(mm)車身同以前嘅 MR-S差不多大,一層層嘅流線設計同常見嘅跑車好唔同。


據知一體化底盤可以因應要求而改動,用嚟造小車或 SUV都得。


車籠好似 Zonda咁加晒碳纖、真皮同鋁合金,仲用㩒掣揀波段。 日豪王者  Lexus LF-FC

車展前高度神秘嘅 Lexus LF-FC,據知係 LS車系嘅概念車,四門 Coupe車身線條好似 Aston Martin Rapide咁有型!而且廠方話佢會採用氫燃料電池,持航能力係勁過 Tesla Model S嘅 700km!現場仲放咗成套新動力系統嘅運作模型畀人了解一下。四輪採用獨立摩打,即代表全車冇引擎、冇傳動軸,車廂可以更大、更靜。車廂方面,當然會承襲 LS嘅豪華舒適,採用 4座位佈局,可以拍得住 Maybach咁豪。不過睇佢樣都知完成度低,所以廠方都話 2020年先有可能面世。













不死轉子  Mazda RX-VISION

多年嚟一直死攬轉子引擎技術嘅 Mazda,自 2012年 RX-8停產後,久久未有新款轉子引擎跑車嘅消息,今屆東京車展終於喺陀地 show-off!名為 RX-VISION嘅概念車資料唔多,廠方只表明未來轉子引擎會以 SKYACTIV-R命名,重點改善廢排及耗油。而喺 KODO設計元素下,新車擁有長車頭、短車尾造型, FR佈局呼之欲出。其實 RX-VISION性能係點都唔重要,因為轉子迷知道 Mazda從未放棄開發,已經開心到暈,從一眾蜂擁上前影相嘅觀眾反應就知。










四驅鐵騎  Honda Project 2&4

由於上個月先搞完世界最大型嘅法蘭克福車展,所以唔少新車都喺法蘭克福展覽完之後再嚟東京車展, Honda Project 2&4就係其中之一。係 Honda公司內部設計比賽中獲獎作品,單邊座位用懸浮式設計,可以好似電單車咁感受到 G-Force令身體擺動,而且車重只有 405kg,竟然用 MotoGP嘅 999c.c. V4引擎,轉數可以上到 14,000rpm,有成 215匹馬力同 12.0kgm扭力!

預視戰神  Nissan Concept 2020 Vision Gran Turismo

今年 Nissan冇展出 GT-R後繼車,不過就帶嚟《 GT》賽車 game迷熟識嘅 Concept 2020 Vision GT。比起 6月喺英國 Goodwood Festival展出嘅版本,今次進一步修飾到更似量產車。據知下一代 GT-R都會採用 Concept 2020 Vision GT嘅新設計元素,都睇到少少未來戰神影子。

Part.2 細碼湧現

以日本車廠嘅財力,同歐洲車廠鬥豪、鬥科技根本就嘥氣,好在家陣興中小型 SUV,要鬥平鬥花臣,日本仔未必輸!所以今年車展都有大量細碼 SUV,雖然部部都係 Concept,但已經有 7、 8成似量產車,未來 5年隨時賣街!

混燃新 Juke  Nissan Gripz Concept

Nissan Juke喺香港唔算好紅,不過日本同歐洲都好好反應,令廠方開發下一代 Juke都更肉緊。 Gripz Concept由 Nissan歐洲及日本設計部共同開發,外形超級科幻,亦代表距離量產更遠……淨係睇 4隻車門嘅開啟方法就知冇乜可能推出。動力方面,暫有消息指會用 Leaf嘅電池及摩打,再加上細容積引擎變成新世代 hybrid系統。







車廂用到長軚芯賽車軚盤,明 sell racing feel。


前車門玩上揭鷗翼,後車門就向後打開,擺明唔會用喺量產車。 下年量產  Toyota C-HR Concept

早喺去年巴黎車展上已經出現過嘅 C-HR Concept,嚟到東京車展終於改得更現實,車身大小同 Honda Vezel相若,不過線條更肌肉橫生。對比上次現身,今次改為 5門揭背車身,而且動力心臟鎖定採用 1.5公升 hybrid,摩打會放置於後軸,成為 E-four四驅。此外,有消息指 C-HR Concept到下年日內瓦車展展出量產版時,將會用上 Arius Cross稱呼。







小型遊艇  Suzuki MIGHTY DECK

SUV嘅可塑性有幾高?只要睇睇 Suzuki展出嘅 MIGHTY DECK就知。 4座位設計後座背用遊艇甲板木製成,可以同露天甲板尾斗連成一體,比 bB Open Deck更多花臣。而且有埋開篷「鑵頭頂」,好天開篷遊車河真係爽到好似遊船河咁!動力方面,將配用 658c.c. turbo引擎,前輪驅動,典型 K-Car格局,但只要用腦變一變,升高車身再加黑色塑料包圍,即時粗獷晒!







電跑 SUV  Mitsubishi eX Concept

近年一直低迷嘅 Mitsubishi都有啲動靜,車展首展名為 eX Concept嘅小型電動 SUV,混合 Coupe嘅設計勁似 Evoque,後座門採用對開設計,令細小車身都有好好嘅上落車空間。此外,現場所見 eX Concept大小同現時嘅 ASX差唔多,大有可能成為 ASX嘅入替車,加上 Mitsubishi係日本車廠中最早出電動車, eX Concept 100%純電動唔係得個吹字,相信好快會有量產版本展出。










未來 CX-7  Mazda KOERU「越」

老實講, Mazda近年多部概念車都加上一個中文單字,初初都覺得幾型,但強國車展又學人玩單字,家陣覺得有啲老土添!車展上 Mazda展出大有可能係下一代 CX-7嘅 Concept car,名為 KOERU「越」。新車其實喺法蘭克福車展首現,至今資料少之又少,冇引擎規格,只知車長 4,600mm,比 CX-9短啲。







Part.3 未來揭背

現今揭背車已經取代咗房車成為主流車種,雖然近年差不多係歐洲車玩晒,但日本車廠都冇放棄,車展中都不乏具話題嘅揭背車展出。

無人駕駛  Nissan IDS

間間大廠都爭住開發無人駕駛系統, Nissan都喺今次車展搞咗部 IDS Concept揭背車,利用衞星同車上多組感應裝置,全自動模式下都可以安全行車,等司機可以休息一下。如果想過吓手癮揸車都得,駕駛席前嘅面板可以伸出軚盤同降低顯示屏,即時變返手動操作。此外,有消息指, IDS Concept其實係下代 Leaf電動車嘅雛形,係就有型好多呀!










5門初現  Subaru Impreza 5-door Concept

今代 Subaru Impreza都出咗 4年,係時候轉款,車展中就首次展出下一代 Impreza 5-door Concept,外表驚喜唔算大,冇乜超誇線條,其實咁樣即係意味好近生產樣貌。值得一讚係後座門手抽用隱藏設計,冇影響車側線條。







Part.4 明年量產

近年香港引入日本新車嘅速度已經差不多同日本同步,所以東京車展已經冇乜香港會引入而又未有嘅日本新車,好似今屆咁,如無意外,新款量產車下年都會喺香港行。

重頭作品  Toyota Prius

Hybrid車始祖 Prius已發展到第 4代,上月法蘭克福初亮相後,一直都未有進一步規格曝光,等到東京車展先徹底披露。車身比上代長 60mm、矮 20mm,而且全車重心低咗 59mm,現場見到外表大到接近 Camry。今代 Prius仍會用 1.8公升直四引擎配摩打,不過就有前驅版及 E-Four四驅版選擇,耗油量分別係 40km/L及 35km/L,數值一代比一代驚人!










四代真傳  Lexus RX

半年前初現紐約車展嘅 Lexus RX終於回流東京,仍然吸引到好多人目光,而且規格更加明確,分別有 2.0 turbo、 3.5 V6及 3.5 V6 hybrid。 RX之所以吸引到人,好大程度係外表用上如同 NX嘅起角設計,同德國嘅對手有好大分別,香港市場有望下年初到港!







怪車沒落

從來東京車展嘅特色,都係有大量誇到冇可能投產嘅古怪 Concept Car。不過家陣飯都冇得開咁滯,仲搞乜鬼天馬行空概念吖!所以今年展台上只得極少數怪車。其他嘅所謂 Concept Car,其實大部分都係準備投產嘅車款,只係推出前試吓反應啫。




大佬 Toyota就撐場整咗部 FCV Plus,巴閉在車身以特殊支架支撐,後座好似一個蜘蛛網咁,而且講明用將會力谷嘅氫燃料。





最吸引女性觀眾係 Toyota呢隻 KIROBO Mini機械人, 10cm高、大概手掌咁大,其實即係 KIROBO嘅細小版本,唔可以行走,頭同手都可以郁,放喺車內杯架可同車主溝通,報告吓交通、天氣等等。





Honda都有部 WANDER STAND,簡而言之就係坐咗喺高凳度揸嘅車!不過外表圓滑得嚟似機械人,現場所見唔少女士圍佢影相。


參觀者亦係參與者

睇車展,點會得個睇字?東京車展有唔少活動可以畀參觀者玩埋一份,好似個人交通工具呢一 part就有排玩!




日本各廠都開始谷自動駕駛系統,三菱喺展場嘅停車場仲即場畀人試坐。


有展商 set場兼有導師現場教玩 Honda UNI-CUB,成班人好似小朋友學行咁,都咪話唔過癮。


每一屆都有 TOMICA車仔展場,每一屆都推出會場紀念版套裝,一套 12隻賣 8,400日圓,非常搶手! MPV變遊艇

東京有新車車展,亦都有改裝車展,但新車車展間中都見到啲改到癲嘅車,全因由原廠有份參與嘅改裝商出品。今年 Toyota改裝車身部門就展出咗一部激改到遊艇咁嘅 Alphard,加咗擾流翼嘅車頂改為軟篷,而車廂就拆走一張中座,後排改成環抱梳化,十足十遊艇甲板上嘅佈置,只欠一個三點式女郎!













另外,仲有一部 Noah都激改成科幻貨 van咁,後座地台可以伸出成一條斜路,方便運載單車或重物,而且前、中排背都加上平坦金屬板,莫講滑浪板可以收納,相信電單車都可以直接泊入去!

撰文、攝影:袁國基
鳴謝: Crowm Motors(2884 7999)

    tvb4life 發表在 痞客邦 留言(0) 人氣()