X級四大新怪斬龍斬龍黑色身體有如惡魔一樣邪惡,識火球時下巴同尾包都會變焰紅色,但最勁一招原來係用條大刀巨尾刮地,以摩擦刀大大刀斬落獵人身上。

A.C.G.U.

Monster Hunter Cross 屠龍 x世代

Ads by Google

蒼火跳跳、爆角截尾、麥記組隊,《 Monster Hunter》系列咁又玩咗 10年,近排隻手機 game app版《 MH Explore》雖然可以 WiFi連線,但食飯食 tea時仍見到三四知己喺麥記、茶記組隊屠龍打素材,獵人互助精神不死!手提機正統續集《 MH X》( X讀做 Cross)都差不多嚟料, X世代打法大革新, 11月 28號屠龍大會再「開催」!

選擇恐懼症 狩技 X Style X武器

以往《芒亨》的系統比例簡單, 14種武器選擇,怪獸擁有火、水、冰等屬性,打法離不開針對敵人去強化相應、相剋的武器/防具,團隊合作打素材、做裝備真係可以消磨大量時間,令遊戲夠晒耐玩。
記者上星期參加了系列監製辻本良三、《 MHX》監製小嶋慎太郎主持的試玩會,發現《 MHX》將遊戲系統大改,角色增設 4種戰鬥 style;新人最好先玩最易上手的 Guild公會型,性能平均;記者個人就較喜歡 Striker型,可安裝多達 3款「狩技」:今集新增、可獨立換裝、升呢的特殊能力,當中有攻擊、有回復,能自己更換組合,令獵人更有個性。至於武士道型 Bushido只推介畀高手,基本能力唔高,但可在千鈞一髮間「閃身」迴避攻擊,並使出超強力反擊技。




巨獸加姆特人稱不動山神,住在雪山、冰海地區,小嶋監製話佢係《芒亨》史上最巨型怪物。


電龍電龍係最型的新怪,其頭、翼、尾 3處都有發電細胞,會喺你見唔到嘅角度下放電攻擊。


泡狐龍粉紅色巧可愛,會射泡泡攻擊敵人,另外又會利用自己啲泡泡滑行,動作敏捷而柔軟。 Aerial飛空型 專剋巨獸

問到各自的心水組合時,雖然二人都比較喜歡用飛空型,但小嶋先生提醒說,每個玩家都會搵到適合自己嘅戰鬥類型,冇話邊款勁啲,但佢教路:「其實各款戰鬥 Style都有自己比較壇長或難以應付的怪物,比如 Aerial飛空型最適合對付大型波士級怪物,跳起斬落去命中率會高啲。但相對就唔啱打『毒跳跳』呢類喜歡四圍跑的怪,因為你跳得來佢已經走咗。」揀定 style同狩技,仲要從弓、劍、斧等 14種武器中揀選使用,個組合真係搞到人有選擇恐懼症!似乎買完 game之後,揀心水攻擊組合都夠玩一日呀。




呢款貓頭鷹新怪都幾《哈里波特》。


Bushido型要在最後時機迴避攻擊先可以儲氣出大技,太早太遲都唔得。


Aerial型可以跳上半身,適合打巨型怪物。


狩技有攻有守,攻擊型多數「跟武器鎖死」,這款《狩人綠洲》則可自由安裝,能在戰場上打開回復站。 

廠商: CAPCOM
平台: Nintendo 3DS
類型:狩獵 action
人數: 1至 4人
售價:約$380( 11月 28日發售)

終於可用艾露貓引女友 2P合作

另外,記者最開心係今集可以直接操作艾露貓一族,變身「狩喵」出戰。實試後感,狩喵係較易上手,打法跟一般「狩人」差唔多,雖然冇「狩技」用,但多番個「支援行動」能量計,儲力時間比較短,一滿技就可以使出多種支援隊友、弱化敵人能力,幾啱用來引女朋友同你一齊 2P雙打屠龍。
的確,《芒亨》最大樂趣始終都係齊齊玩,呢排記者真係好迷手機版,所以想問問監製點睇手機版會唔會取代到手提遊戲機版,辻本良三解釋:「我開發遊戲,唔會以專為邊個平台做 game呢個 concept做前設,而係先諗自己想做乜嘢 style的新作,視乎其性質最適合放在邊部主機上去作決定,好似《 MH X》係重視動作細節,手機係絕對做唔到呢種複雜操作,所以一定係出番 3DS,至於手遊版就講求爽快,如果呢種打法搬番落手提遊戲機,你又會覺得有不足。」記者都明兩者係互相冇影響,各有各好玩,不過手機普及度真係高,話唔埋反而引到人想出番部 3DS玩《 MHX》!







主人並不會一同到戰場協助「狩喵」,世事有時係調唔番轉頭。


睇片似乎會有女性「狩喵」,仲可以騎在怪獸背上攻擊。


「狩喵」擁有自己一套特殊技,以支援隊友、弱化敵人為主。

 

迫問兩大監製  Q&A時間
點解唔叫 MH 5?


早前在網上流傳的《 MH5》圖片,實屬流料。

首先 X即羅馬數字 10,代表十周年紀念作,其次係 X等如乘號,突出番遊戲內各種元素聯乘所達到的多層次變化。再陰謀論睇,呢隻可能只係定位為 4G改良版,未算真正《 MH》 5代。

今集有 4隻新怪、設計過程係點?


由一瀬泰範先生繪畫的怪物設計草圖,真心正。

小嶋監製話,其實新怪 concept畫係由 Director一瀬泰範先生繪畫,首要當然係唔可以同原有怪獸太重覆,之後就會諗要一隻點類型嘅怪,好似《 MHX》 4頭新怪, 1隻邪氣、 1隻巨型、 1隻外型要突破、 1隻就要有型有款……及後再慢慢為怪獸設計招式同行動特徵。

MH會唔會回歸 PSVita?


暫時 PSV用家都要玩住月費連線的《 MHF》系列先

香港有批索尼 fans始終都係鍾意打 PS系主機,最後記者膽粗粗唔怕得罪一問,究竟《 MH》仲會唔會為 PSVita做新作?製作人自然係唔方便正面回應、 no comment,叫做幫大家反映咗香港民意啦!(利申我雙平台都玩,《 MHX》買硬。)



《 MHX》監製 小嶋慎太郎(左)
當日主要係由小嶋先生試玩畀我睇,佢話識玩一定用飛空+雙劍,跳上半空片片吓勁有型。

《 MH》系列總監製 辻本良三(右)
社本總監大有來頭, 07年開始已經有份製作芒亨,辻本先生喜歡用 hammer大鎚,唔介意行得慢,只想大力轟落怪獸身上、扣勁多 HP,高風險高回報。

撰文:鍾世傑
攝影:傅新發

    tvb4life 發表在 痞客邦 留言(0) 人氣()