Play House

Long Long ago in a Galaxy far, far away...  80後銀河回憶

Ads by Google

《星球大戰》之父佐治魯卡斯同《銀河鐵道 999》、《宇宙海賊夏羅古》作者松本零士有乜共通點?咪就係一樣喜歡對住個夜空,寫銀河浪漫長篇故事囉!
秋風正勁,除咗去郊外睇月光夠浪漫, 80後科幻迷要去兩個主題大型展覽,必有無限回憶啦!

今次商場搵嚟多位星戰達人展出從未曝光過嘅珍藏,最特別莫過於由本地玩具手辦模型原型師 RAY.WONG,首度展出佢親手製作及收藏,超過 80件嘅星戰手作模型,當中仲包含《星戰》電影、動畫同埋遊戲。







動畫星戰首部動畫大電影《星球大戰:複製人之戰》入面嘅 Clone Captain Rex。


電影星戰電影《星球大戰前傳 III:黑帝君臨》入面嘅 Clone Trooper 187th Attack Battalion,有埋 pose!


遊戲連 2008年出嘅星戰遊戲《星球大戰:原力釋放》入面嘅 Stormtrooper Commander都有! 必影星戰光劍攝影區

就算未睇過《星戰》電影,都必定會知道佢嘅招牌光劍,家陣商場就有齊紅色、藍色、綠色,仲有喺嚟緊第七集先會出現嘅紅色十字型光劍,全部光劍都鑲實濕電,所以長期可著燈!呢個時候,拍照是常識吧!




呢把就係喺《星球大戰七部曲:原力覺醒》內新敵人 Kylo Ren的十字型光劍,其實會唔會斬到自己呢?


仲會有兩把光劍格劍嘅影相區,識影一定係咁樣影「合照」,超正!

《星球大戰》大型展覽
日期:即日至 2016年 1月 1日
時間: 10:00-22:00
地點:銅鑼灣時代廣場露天廣場及地面展覽廳

浪漫冇限耆 松本零士香港首回展

講宇宙科幻,西洋最經典肯肯定係《星戰》,東洋唔一定要數高達,其實松本零士原著嘅《銀河鐵道 999》、《宇宙海賊夏羅古》、《千年女王》等作品,套套都係太空動/漫畫嘅經典,唔係我哋𠵱家邊會仲識得唱「傳說中有個女王在世上」!
松本老師今年已經 77歲,但仲未退休,最近仲喺《小甜甜》作者五十嵐優美子拉攏下,喺香港舉行首個大型展覽「松本零士聖誕幻想時空」,畀 80後粉絲朝聖兼順便當埋聖誕節目。叫得大型展覽,除咗一班深入民心角色嘅等身公仔外,大家實預咗有埋動漫中嘅招牌載具。主打有全長 18米嘅 1:1銀河鐵道 999列車,唔只火車頭係必影位,後面 2卡客車亦可以畀粉絲坐入去影相同睇原畫精品展覽。不過成個展覽只囊括松本老師 3大主要作品,獨欠佢做監督同人物設計嘅《宇宙戰艦大和號》,冇得睇 1:1大和號有啲可惜,唯有等下次。




999列車車頭整到正在升空咁款,幾有氣勢。


亦可以坐入 999列車車箱同另一個千年女王合照。


夏羅古採用舊動畫冇披肩嘅造型,愛干達號冇整晒出嚟亦有啲可惜。


車箱內仲展出由松本老師親自挑選嘅首辦同精品,展場內亦有 pop-up store。


展覽內有松本老師手稿同動畫原畫,包括老師為香港展覽繪畫嘅新作。


千年女王個宇宙觀景亭入面有女王椅,可以好似松岡李那咁 cosplay去同佢合照。 

松本零士
1938年出生,入漫畫行超過 60年,因對天文學、軍事史等素有研究,所以作品多以宇宙作背景,自 2014年起於日本舉行巡迴展覽,今次終於辦到嚟香港。

松本零士聖誕幻想時空
日期: 11月 4日至 12月 27日
時間: 10:00-22:00
地點:將軍澳坑口東港城 1樓展覽場
費用:免費

撰文:陳可兒
攝影:傅新發
Model: Cynthia YL

    tvb4life 發表在 痞客邦 留言(0) 人氣()