左起: Shangrila香格拉、小花、恆仔

Webber

有一種友情叫小花恆仔 義助瑞士妹 Shangrila be a HK YouTuber

Ads by Google

呢排最 hit嘅 YouTuber係邊個?一定係最愛香港文化、識講廣東話、住喺瑞士、巴西 mix西班牙,母語講法文嘅索女香格拉 Shangrila。
一條用全廣東話拍成嘅〈 EP.1香格拉:我要成為 YouTuber!!〉喺網上熱爆瘋傳,又識講中文,又靚女,真係冧死一班港男港女,唔怪得佢近日由瑞士空降香港,接受《 FACE》處女獨家專訪時,條街咁多人搵佢合照。究竟一個講外語嘅女仔,點解總係咁鍾意香港呢塊如同魚蛋般小嘅地方?仲話要逼入去已經勁多人嘅香港 YouTube界!仲請到兩位喺香港站穩陣腳嘅當紅 YouTuber恆仔、小花,友情演出跟香格拉 jam歌、兼教佢港式潮語。

恆仔
YouTube: ToNick
訂閱人數:約 34,721
fb:趙善恆恆仔@ ToNick(Likes:約 9,808)
ig: hangjai(Followers:約 28.7k)

小花
YouTube: Hana Tam
訂閱人數:約 326,241
fb:譚杏藍 Hana Tam(Likes:約 225,273)
ig: hanatam(Followers:約 385k)

Shangrila香格拉
YouTube: Shangrila YT
訂閱人數:約 36,278
fb: Shangrilayt(Likes:約 24,377)
ig: shangrilayt(Followers:約 20.9K)

LOVE HK 拍 YouTube為學廣東話


佢勁愛自己對新波鞋。 Nike Air Huarache print($799)

近年香港新一代因為身份認同問題,本土意識日濃,急住喺日漸被遺忘的老香港中尋找香港的美、一份歸屬感。咁各位真係跟香格拉啱晒 channel,因為佢已經係第 5次嚟香港,直頭多過記者妹去台灣,佢話真係好愛香港:「喺瑞士好悶、好靜,所有嘢都好慢,但香港有好多唔同嘢睇,所有嘢都去得好快,好精彩!」相反好多港人都因為急速生活搞到身心都殘晒,幾個月就要到外國散心充電,唔知咁係咪叫你睇人好、人睇你好呢?香格拉續說:「喺瑞士冇可能見到海,但喺香港搭巴士,上橋嘅時候可以見到個海,加埋日落好正!」要數最討厭,香格拉就話係神出鬼沒嘅蚊:「我永遠唔會見到隻蚊,佢針完我就唔見咗!但喺瑞士,當我被蚊針,佢哋喺會圍住我,我可以殺到佢哋!」(很暴力呀^^)

家陣人人都希望透過拍 YouTube而被人認識,相反香格拉係為咗學廣東話而開 Channel,而且佢未發放頭一條片之前,已經有收睇好多香港知名 YouTuber嘅片:「我想學好廣東話,於是我用廣東話拍片擺上 YouTube,而 YouTube頻道就好似一本書,一來可以更容易溫書,二來覺得咁樣做好有趣。」本來大家都以為香港 YouTube市場細,但香格拉就話原來瑞士更細:「瑞士好少人拍片,亦冇乜人會去做歌手或者演員呢類幕前工作,香港相比下有更多空間。」發展空間加上自己又酷愛香港,令到呢位多國文化背景美少女,走上「我要去香港做 YouTuber」呢條路。

小花恆仔  HK Welcome you唔怕爭地盤


香格拉着得算密實,但必露靚腿,佢仲話想試腳底按摩。

近年成日有人誤會香港年輕網民排外,老土咁解釋番,大家係對事不對人,好似香格拉嘅多國語言背景同樣貌條件可以話贏在起跑線,而且呢幾年越多年青人拍片做 YouTuber,多人程度近乎飽和,但小花、恆仔兩位資深 YouTuber完全唔會覺得香格拉同佢哋爭地盤,小花:「我成日都話香港太少 YouTuber,今次絕對係一個好 fresh嘅衝擊,有多啲唔同嘅人先係好事!」恆仔都贊成香格拉做 YouTuber:「一個住喺外國嘅女仔,因為鍾意香港呢個咁單純嘅原因,就想做 YouTuber,我覺得冇其他唔支持嘅理由, Hong Kong welcome you!」老老豆豆,咁咪會爭地盤?「 YouTube本身就係個國際平台,講咩語言都好,世界各地都一樣睇到。」小花:「講中文加英文字幕都可以有外國人睇到,唔怕。」講得實在啲,香格拉唔係要做「香港 YouTuber」,只係單純想做 YouTuber,不過因為段片講廣東話,先惹來香港人關注!

返到瑞士繼續拍 YouTube

要成為 YouTuber,香格拉外表絕對勝人一籌,點子亦非常多,「返到瑞士之後,雖然要一邊讀書,但我都會繼續學廣東話,學啲香港文化 for拍片。我唔想局限自己只拍一個類型嘅片,例如想拍唱歌片、煮食、化妝,又想拍 Vlog分享我喺瑞士嘅生活,又或者會整香港小食,我都唔肯定,視乎觀眾反應,但我覺得一定好有趣。」初衷可能係想分享,但當香格拉呢排經歷咗咁多傳媒嘅追訪,加上喺香港已有粉絲,令佢唔排除想做明星,「我第一個睇嘅香港 YouTuber就係小花,佢好靚,好有活力。如果有機會做歌手或者拍電影,我唔抗拒,只要有機會我都會試。」




絕對係一個好 fresh嘅衝擊,有多啲唔同嘅人先係好事!


一個住喺外國嘅女仔,因為愛香港而拍片,冇唔支持嘅理由。 爆笑潮語教室

香格拉今次就接受《 FACE》挑戰,大講香港地道潮語,但估唔到對佢原來一啲難度都冇,不但講得流利,仲好快就 get到意思!於是乎,記者妹就增加難道,要佢將香港潮語翻譯做法文!

龜速

法文= lent comme ure tortue
龜速故名思義就係「速度同龜一樣慢」,香格拉翻譯出嘅法文其實完全直譯。

Kai

= stupide
Kai以香港人理解,近似笑人蠢嘅意思,所以香格拉就譯 stupid嘅法文。

O嘴

= O bouche
O嘴嘅意思應該係驚訝,不過香格拉就反而想教返大家「嘴」嘅法文係「 bouche」,音「 bushhhhhhh」,雖然夾硬咗啲,但夠簡單直接。

屈機

= trop fort
屈機,根據香港網絡大典嘅解說,廣義係指現實生活中有人利用不正當或不公平嘅方法贏取勝利,香格拉就話其實法文都有個近似嘅詞語,就係「 trop fort」。

瀨嘢 

= je suis dans la merde
瀨嘢其實就係當遇到啲弊家伙嘅事時會大嗌嘅詞,香格拉就話佢家鄉入面,當人遇到弊家伙嘅事會講粗口,而呢句最尾嘅「 merde」其實就係粗口用語。

撰文:陳可兒
攝影:傅新發、崔百祥

    tvb4life 發表在 痞客邦 留言(0) 人氣()