真人騷

香港奇案之淫尼恐嚇「埋左你」  51歲翁靜晶:唔通怕麻煩就走左去咩?

Ads by Google

看得多報紙、上得多網,還以為以經開始習慣荒唐。到看見尼姑嫁和尚、嫁完再嫁還敢把大和尚窩藏在尼姑庵才發現世事沒有最荒唐,只有更荒唐。
釋智定找到翁靜晶門上,真不知道算是好彩還是不好彩。喜歡行俠仗義的翁靜晶,籌款募捐用盡全力,可是一發現出家人送得出手幾十萬珠寶巴結自己、看到黃蜂竇二話不說燃起火把趕盡殺絻,生起疑來抽剝繭也是同樣出盡全力,就算淫尼變臉放出狠話:「我唔係善男信女,埋咗你喺寺冇人會搵到!」,還是勇往直前追查到底。
我問翁靜晶,怕不怕?她說:「我都 51歲,死就一世,唔死都半世!梗係驚,驚自己有危險,更驚身邊人被牽連。但我冇得揀,唔通怕麻煩就走咗去唔理?」

我又問翁靜晶,又一次把自己陷入險境,你猜劉家良師傅再世會怎麼說?她說:「劉師傅係大俠,佢同我嘅共通點,就係都將生死睇得好輕。如果佢喺度,佢會好似以前一樣,幫我分析、做我軍師,但係會喺我耳邊哦,叫我小心啲……」

我猜釋智定找到翁靜晶之前,沒怎麼資料搜集。你自以為是個奇女子有能耐嗎?卻不知道翁靜晶更有能耐更加奇: 14歲出道,和陳百強傳過緋聞和張國榮演過情侶; 20歲出嫁,嫁給拍拖 6年大她 29年的劉家良;息影賣保險可以做到年薪百萬自立門戶, 30歲重返校園,又能夠讀到港大法律碩士和中國政法大學博士;查案寫書打官司,見遍了香港奇案經典重犯不算奇,更奇的是在她的童年背景像個謎, 01年曾經出雙入對的林競業墮樓不治、劉家良翁靜晶就在現場更是個謎……竟然把自己送進深不見底的翁靜晶手上,實在是騙徒手法層出不窮,自掘墳墓亦一樣屢見不鮮。

死就一世,唔死都半世。

咁多年都好夠膽講,工作性質亦敏感,唔係第一次遇到危險?
舉個例子,喺哥倫比亞好多律師檢控官會被罪犯殺害,係唔係危險就唔做先?點都要有人做㗎!……你話驚唔驚?梗係驚,驚自己有危險,更驚身邊嘅人被牽連。今次有啲特別之處,係講到出聲話埋咗我哋落寺院唔會有人知……諗深一層真係恐怖。但已經夠危險,我就唔想諗咁多,無謂再幻想太多,我都 51歲,死就一世,唔死都半世,我冇得選擇。

點解冇得選擇?
間寺廟籌款由我而起,三月開始籌咗五百幾六百萬,發現佢賬目有問題又同兩個大陸男人結過婚時,我都有掙扎……其實我 2014年已經因為甲狀腺功能衰退退咗休唔做律師,就係唔想再操勞。一追究落去,唔知搞幾耐、搞到幾大、更加唔知會得罪幾多人,但係我睇住啲公公婆婆揸住拐杖行上去排隊捐獻,又有個佛教徒叫我去探佢,原來佢喺臨終病房,佢叫我自己拉開床頭櫃桶,嗰度八萬蚊,已經係佢畢生積蓄……我點可以因為怕麻煩,咁樣走咗去扮睇唔到?開頭我都旨意有關團體會監管,結果佛聯會話唔係佢哋成員,發牌嗰個機構話發咗個牌就冇得收返,簡單嚟講就係叫我扯……冇辦法,呢件事點都要理落去。






你又將自己同屋企人陷入險境,兩個女嘅反應係?
好似打仗咁,每個人都唔想將自己仔女送上戰場,但係如果個個父母都怕、都唔敢冒險,咁社會會變成點?我同兩個女講,對唔住我冇選擇,但你哋兩個可以選擇,可以離開香港永遠都唔返嚟……佢哋兩個嘅一個會走一個會留,細女嚟緊返英國,唔會再返。

你覺得如果劉家良師傅喺度,佢會講咩?
劉師傅係一個大俠,我哋兩個有一個共通點,都將生死睇得好輕。佢係真英雄,就算癌症末期都從來冇呻過辛苦……佢喺度,我一樣會照直同佢講,佢通常都會幫我分析,做我嘅軍師,但從來唔會阻止我,只會喺我耳邊不停咁講:「喂,你自己要小心啲!」以前我靠劉師傅,今次我都唔係一個人,有一班義公團體一齊調查呢件事,陪我一齊進退,就好似上天派嚟嘅天使團隊,就好似以前做我軍師嘅劉師傅。







唔講媽媽,講親都唔會有好嘢。

當年劉師傅喺你生命出現,係唔係都似係上天派嚟嘅天使?
佢第一幕出現,我 14歲㗎咋……冇任何交往,就係見咗一面。嗰日我坐住朋友架車,去到尖沙咀香格里拉門口停喺紅綠燈前,我坐喺乘客位擔天望地,就喺左邊酒店門口,一個拎住公事包嘅男人後面跟住另外兩個人。呢個男人我識佢,因為屋企個馬姐最鍾意睇粵語殘片,成日指俾我睇,嗱,呢個係林家聲,呢個係劉家良……佢望住我、我又望住佢,大家對望咗一段時間,直至架車轉燈。跟住我叫朋友兜返轉頭,已經唔見咗佢。

14歲咁早?當時入咗行未?
未正式出道,但係實情 12歲我又已經拍咗一個無綫電視嘅單員劇《風箏》喎……成四十年前喇,我睇《香港電視》,有一個欄目係叫啲小朋友寄張相去由專人畫啲嘢,譬如想做太空員就畫啲太空服,想做超人定乜嘢……我想做仙女,就寄咗張踩單車嘅全身照過去,點知封信唔知點解去到製作部,劉芳剛(黃淑儀前夫)導演咁啱搵緊小演員,我就喺尖沙咀屋企上咗的士去廣播道,一個人同導演傾,拍完會有三百蚊,一路傾到要落筆簽約喇……唉呀,原來我未滿 18歲,即係點都要同阿媽講……

媽媽做咩㗎?
我媽媽……我嘅童年真係好遺憾,我唔想講關於佢嘅嘢,因為唔會講啲咩好嘢,咁寧願唔講,原諒我……

爸爸呢?
我嘅家庭背景……可以咁講,我係一個冇童年嘅人,我嘅童年係一片黑暗,我一直喺呢片黑暗中掙扎,希望尋找一線光明,最簡單快捷嘅方法,我 14歲已經離開咗我嘅家庭同父母,一邊讀書一邊做嘢,從此以後都再冇返過去。

咁第二面見劉師傅係幾時?
隔咗兩年,我喺邵氏化妝間撞返佢。係佢問我先:「你就係翁靜晶?我好鍾意睇你拍嘅朱古力廣告㗎!」跟住我問佢:「你記唔記得兩年前,你喺香港里拉酒店門口拎住個公事包,我就坐喺架車度望住你呀?」佢話記得……從此以後,佢就成日過嚟化妝間搵我,同我傾偈、講比我聽佢嘅童年,又講下啲故仔,關雲長又點、張飛又點……我嘅童年冇聽過呢啲故仔、冇愛、我媽咪從來冇抱過、錫過我、攬過我……







佢大我 29年,有家室,仲有好多房妾侍添。

點解呢?
我都想知點解……第一次,劉師傅同我講實質嘢,又係喺化妝間……佢話法國政府請佢去表演、好盛大:「我好希望下一次去法國,有你陪住我……」,然後喺後面抱住我,錫咗一啖。嗰一下我覺得好震撼,因為太多原因話俾我知我唔可以同呢個男人一齊。第一,佢年紀大我好多,第二,佢當時有家室,第三,唔單止有家室,佢仲有妾侍、仲要係好多房添……

當時你心裡面愛唔愛?除咗佢係第一個愛錫你嘅長輩?
梗係愛!愛到不得了!係瘋狂嘅愛!係失去理智嘅愛!只要見到佢嘅相、聽到佢嘅聲、聞到佢嘅氣味我已經好開心,嗰種愛冇嘢可以比,直情癲咗,到我依家講起,都仲可以諗起嗰種震憾。我愛佢因為佢好善良、好有愛心、好有責任感、佢好聰明,兵器樂器樣樣都叻、風趣幽默、得意到暈,佢令我永遠都喺快樂之中,最重要一點,係佢令我對人性重拾信心。喺佢之前我連屋企人都唔信,根本就係條街流浪嗰啲動物,唔係佢,我唔會知呢個世界仲有好有、喺我身上仲有好事發生……






識佢以後,從此知道咩叫有人寵愛?
我成世人買鞋都冇大人帶、成世人着鞋都挾腳,係佢話我咁着唔得,帶我去買鞋,佢係第一個人攝隻手指落去我隻鞋度,話我知咁至叫啱着;佢帶我食好多好嘢,以前我冇得出街食嘢,係拍《風箏》,劉芳剛導演知道我屋企環境係咁、佢又有兩個細路同我差唔多大,所以成日家庭聚會都帶埋我去;喺佢之前,我冇入過餐廳、未食過意粉、未見過乳豬㗎……

其實你屋企有馬姐,經濟環境唔係差?
我媽媽講到明,我係多餘,因為我唔係仔……我試過寫喺專欄,以前大閘蟹季節,媽媽會蒸好晒啲蟹,刮晒啲膏出嚟鋪喺隻碗度,一層蟹膏、一層蟹肉、一層飯,再一層蟹膏、一層蟹肉、一層飯……足足八、九層,然後面頭落啲薑蓉同糖醋俾我細佬成碗扒。我就係睇住佢製作碗飯、睇住細佬食,佢連睇都要鬧:「睇咩呀你?妒忌呀?有好嘢都應該留俾細佬食!」……呢篇文俾劉師傅一個徒弟冼國林見到,佢請我去佢屋企食飯,開飯時攞咗好大個煲出嚟:「師母,你睇下咩嚟嘅?」一打開,就係一層層嘅膏、肉同飯,我一見,「嘩」一聲喊咗出嚟……









所有好人好嘢都係識咗劉師傅以後至遇到?
佢唔止寵愛我,仲會教我。我記得啱啱開始做保險,同佢去飲茶。有個女仔無嗱嗱行埋嚟話佢又係做保險話佢好仰慕我,但我態度好冷淡。個女仔一行開,劉師傅開始教訓我,話我傲慢,講到我即刻行返轉頭個女仔度同佢講對唔住……我犯錯,劉師傅會即刻指證我,如果冇佢就冇𠵱家嘅我。連我讀法律,都係佢每朝六、七點車我返學,日日喎……所以去北京攞博士學位,佢都話㗎,我嘅學位都有佢份。

既然咁愛,點解之後會俾林競業介入?(出雙入對律師上司, 01年劉家良登門質問,林競業在自己寓所墮樓身亡)
嗱……點解會出現呢?我唔想牽涉其他人……可以講嘅就係,我永遠都唔會離開劉師傅、永遠唔會同佢離婚,呢段關係我都解釋唔到。只可以話,我一直好多人追求,亦都好享受別人追求,但係我幾鍾意都好,因為有佢(劉家良)喺度,我唔會過條線,去到條線我就會停。

條線即係感情定肉體?
咩叫錯呢?條線喺邊呢?咩叫出軌呢?每個人界定都唔同,其他人係出現咗,但係其他人永遠唔會取代到劉師傅。

三十年婚姻,出現嘅一定唔止兩個人。

當時劉師傅傷心嘛?
佢嬲多過傷心,我咩都同佢講,唔會呃佢。我有問佢:「點解男人可以三妻四妾,女人唔得?」佢都答:「係喎?點解唔得呢?」劉師傅係一個智者,我好多花邊新聞,次次呢啲新聞出現,劉師傅都會拖住我出嚟話:「如果我可以接受太太做佢鍾意做嘅嘢,你哋都唔可話佢。」真係好型,係囉……我老公都唔話我,你哋話得我啲乜嘢?三十年嘅婚姻,一定唔止兩個人,一定出現過其他男人女人,人唔愚蠢過就唔會變得聰明,我哋唔止係夫妻,亦係朋友係戰友係同志,一早超乎男女關係咁簡單。

佢病咗咁耐,亦都可以笑談生死,但到佢真係離開,你容唔容易接受?
佢最後嗰半個鐘係我攬住嘅,直到佢停止心跳,包括我之內所有後輩喺佢床前下跪,我拜別佢時,多謝佢一生以嚟對我嘅容忍,有乜嘢做得唔好,今日受我一拜……當然好傷痛,但係我感恩可以講再見……佢去咗之後,淨身係我做嘅、化妝係我化嘅,火化係我㩒個掣,睇住佢燒到見骨、燒到變灰、燒淨個心臟然後去執骨……有人問唔驚咩?我反而覺得好彩做齊晒,完全冇欠喇、陪佢行到最後一步。


















因為做齊所有嘢,你可以咁快行到下一步?展開新愛情?(同何東曾孫何猷彪近日被拍得睇鑽飾)
感情嘅嘢我唔想再講,再講對邊個都唔公平,你係唔係想我講俾你聽,我愛任何一個人都比唔上愛佢一樣?

你嘅人生仲有好多謎團,幾時會出本書寫自己?
我未必會出書,但係想有一日做講座,唔收錢嗰隻,俾啲人睇下,嗰啲以為自己好慘嘅人點樣可以正面睇人生。好似今次定慧寺件事都一樣,負面啲睇,會覺得以後都唔信任神職人員、會放棄信仰。我唔係咁睇囉,作為信眾,對神職人員可以有要求,真正苦行清修弘揚佛法、可以帶領我哋指點迷津,唔好係一羊,甚至係一隻狼。







我是傳奇

俠女即是俠女,就算是身在風口浪尖上一樣天不怕地不怕,聽了記者的電話,爽爽快快就自報住址,請記者和攝影師上門慢慢談。
兩個女兒不在家,陪着翁靜晶的是一隻狗、一隻鸚鵡、三隻貓、還有兩個菲傭。她一邊撥扇子一邊玩狗,一邊跟我們說故事。故事也太多,說的和聽的都忘了時間、錯過了午飯,直到朋友上門提醒她約了警察差點過鐘,這才叫菲傭趕緊裝個隔夜飯盒、跑上樓換衣服。不說沒人知道,穿在她身上那麼搶眼的鮮紅唐裝,原來是六十塊人仔的淘寶貨。

撰文:朱小博
攝影:范仲良
化妝、髮型: Kitty@Bridal Corner

    tvb4life 發表在 痞客邦 留言(0) 人氣()