方健儀爆昇爺秘聞

無綫新聞部副採訪主任方東昇,因為主持《世界零距離Ⅱ》而爆紅,仲畀人封埋做「昇爺」!唔少人覺得佢一本正經爆gag講金句,

Ads by Google

例如:「企鵝有企鵝蛋味」、「抱得美人龜」咁,真係夠晒詼諧抵死,幽默到直頭捧埋佢做電視新「男神」。觀眾直到最近先識欣賞昇爺,但係同佢共事過嘅女主播,好早有幸同昇爺「零距離」咁接觸,佢哋都不約而同話昇爺份人向來好正!

方健儀離職TVB嗰陣,昇爺送咗個黑白分明嘅方字畀佢,提醒佢做人要分清黑白,同時大家又係姓方屬方氏宗親,送呢個字特別有意義。

方健儀喺微博爆佢尊稱做「大佬」嘅昇爺,平時敦厚老實,但居然會隨口噏,幫佢耍走個問佢件衫邊度買嘅遊客。

方健儀(左三)仲喺無綫新聞部嗰陣,同昇爺(左二)係無敵好拍檔,仲擺晒懶型嘅甫士影合照添。

好似同昇爺係中文大學同學,後來喺TVB做埋好拍檔嘅前主播方健儀咁,東姑就聽聞佢哋好鬼friend。兩個平時互相抬舉當講笑咁講,方健儀叫昇爺做「大佬」,昇爺就叫番佢做「家姐」,由於兩個都姓方,外人唔知仲以為佢哋係真姊弟或者兄妹添!

日前,方健儀就大讚昇爺,話佢份人不嬲幽默風趣,啲gag多到可以出字典;而東姑仲喺方健儀嘅微博,發現佢爆咗單同昇爺出外景時嘅笑料。話說有次佢哋喺尖沙咀廣東道拍外景,有位遊客好鍾意方健儀着緊嗰件衫,於是就走埋去問佢件衫邊度買?咁有公信力嘅方健儀,一臉正經猛諗緊邊度買,想答人嗰陣;昇爺竟然隨口噏話花旗國買,幫拍擋解圍敷衍咗對方走。估唔到,昇爺個樣老老實實,原來都有隨口噏當秘笈耍人嘅一面,真人不露相,點只搞gag金句咁簡單!

前無綫主播趙海珠話,一入行就已經有師兄同佢講,做軟性新聞?搵方東昇啦!即係做軟性新聞,最好請教昇爺喎!

前無綫主播李家文透露,九九年同啱啱入行嘅昇爺,拍檔出去做女騎師簡慧榆墜馬身亡,昇爺竟然識好多騎師名、馬名;不過,昇爺本身係唔賭馬嘅,李家文猛讚佢瓣瓣精。

昇爺喺〇六年真係抱得美人歸,同無綫女主播吳先瑩個妹吳先玲結婚,聽聞佢哋喺吳先瑩婚禮上認識。

黃紫盈就話昇爺份人真係好好,謙虛有禮又肯教人嘢,明明佢年輕昇爺十幾年,但昇爺就成日「大姐、大姐」咁叫佢。

    全站熱搜

    tvb4life 發表在 痞客邦 留言(0) 人氣()