Yorky/30歲/自創多款糯米糍新口味/將糯米糍的韌性轉化為生活耐力/相信成功始於一顆肯捱的心。

年輕有夢 

王孖記果子 地址:長沙灣青山道 475A號 A鋪,美孚新村第 4期商場 97A3鋪 電話: 5592 9088

強韌如糍

Ads by Google

馬雲寄語年輕人,不要只抱怨社會,應反省自己,才有創業機會。
憤青批評他不知少年疾苦,惟經營水果店的 Yorky卻說:「佢以前都係窮小子,花咗好多年先有淘寶同阿里巴巴,都係捱出嚟。」
由是啟發了他,獻出精神時間,蒸最軟的糯米皮,挑最甜的水果,以糯米糍打響名堂。

下午四時到長沙灣的工場訪問, Yorky已經連續工作了十二小時。隔天凌晨落果欄挑水果,清晨回店後,工作只有一項,兌粉漿,蒸皮,看爐火,出爐,重覆至晚上。「試過企喺度瞓着,打瀉哂兜粉。」
親力親為的代價是拿蒸夾的右手因過度用力,出現彈弓手症狀,「揸唔實掌頭,手指又伸唔直,但唔抖得,唔係冇貨賣。」整天下來,做了千多件糯米糍!忙至四五點,才吃第一餐——雜果沙律茶餐加杯凍檸茶,「我食好少嘢就得。」幾位幫忙包餡的女工用半肉赤半讚嘆口吻說:「佢鐵人嚟,唔洗瞓又唔洗食。」

他本來不是賣糯米糍的。去年九月,次子即將出生,他見創業比打工有前途,便辭去做了六七年的旅行社副總經理一職,轉行在長沙灣開檔賣水果。「呢行冇後生仔,我肯早起身落果欄,有得搏下!」加上岳母賣生果多年,有熟人領着易入行。他也勤力,每天凌晨兩三點到果欄學入貨。專攻外國貴價生果,西班牙柿、日本水蜜桃,貪盈利高,同區又沒競爭。有過幾次買貴貨的經驗,很快知道潛規則,「要格價,但唔講價,就算壓,最多都係廿蚊走盞,唔係實比人鬧。」打好關係,檔主都願意為他留好貨色。
但區內消費力不高,生意一直掹掹緊。「最差一日得七百蚊生意,屋企要畀家用,細路仔交學費都三千蚊,又要交租,夠邊樣?」說得眼紅紅。此時前老闆重金利誘回巢:每月人工五萬,條件是長駐台灣分公司。「但要放棄家庭,我就直接推咗。」




芒果要逐個挑,用手揑來感覺熟度,夠熟才會甜。


大仔 4歲,細仔剛滿 1歲,太太全力湊仔,也幫忙查覆糯米糍訂單。

為家庭拒吃回頭草,不改水果店生意淡靜的事實,這時偶像馬雲的金句如明燈:「『今天很殘酷,明天更殘酷,後天很美好,但絕大部分人死在明天晚上。』所以一定要捱。低潮時我靠睇佢演講洗腦,不停激勵自己。」
幸好,遇上幾個月前糯米糍爆紅的契機。「見咁多人排隊買,自己又識揀芒果,諗住整嚟幫補下。」他曾學過一年中廚,反覆研究出自家配方,皮加了北海道牛奶,奶香滑溜。又拉奶茶般反覆沖拉粉漿和隔篩,令皮質感更滑。餡料變化又多,呂宋芒、新西蘭金奇異果、美國蜜瓜等,無一不香甜多汁。糯米糍皮薄餡多,件件如手掌大,但銷情麻麻,初時一日才賣十多件,餘下的都倒掉。他於是出印花咭,買十送一。又免費送貨,沙田觀塘上環,一大袋揹上肩就到處跑,「邊度都送,大熱天時,抽住五十幾盒搭地鐵,慳得就慳。」

堅持是吃得出來的,生意慢慢好轉,最誇張試過有七十人排隊等買!近月已不賣生果,集中火力做糯米糍,月初更在美孚開分店。
「本來星期日休息,睇怕遲啲都要開埋工……呢段時間係要捱。」唯一天倫樂時間也將要犧牲,「最唔開心係冇時間陪小朋友,」唯有趁太太帶小孩落鋪探班時見面,「大仔會幫手嗌『十蚊件十蚊件!』」他其實愛家,特別是一對兒子,才將店起名「王孖記」。趁他忙,偷吃一件他的成名作芒果糯米糍,滿口軟熟,拉出頑強柔韌的粉糰,果肉濃,香,甜,透出一絲天然果酸,到尾還是甜,正是他捱過後的生活寫照。




門外不時有人龍排隊。


包餡請了四五位女工幫忙,惟 Yorky堅持糯米皮一定要自己做。


糯米糍有四五款口味,(左起)芒果、奇異果、菠蘿、蜜瓜,$20-$26/兩件。 

王孖記果子
地址:長沙灣青山道 475A號 A鋪,美孚新村第 4期商場 97A3鋪
電話: 5592 9088
營業時間:星期一至六 1pm起(星期日休息)
註:長沙灣總店只作預訂取貨(三日前預訂,十件起),午後不定時設零售,可查詢 Facebook專頁「王孖記果子」。美孚店長期設零售,賣完即止。

撰文:廖健邦
攝影:邱覺達

    tvb4life 發表在 痞客邦 留言(1) 人氣()