採訪當日,阿蘇正與一班 12至 16歲的學員上堂,除了講解戰術外,他還因應不同年紀的小朋友,教授他們防守、傳球及射籃等正確姿勢。

創業通

男兒當入樽 港隊成員辦籃球訓練班

Ads by Google

一提到《男兒當入樽》,便想起櫻木花道、流川楓等在籃球場上的英姿,令不少年輕人以成為籃球員為目標。今年 29歲的阿蘇(蘇伊俊),從小喜歡運動,是現役港隊籃球員,他成立 GMF Sports Academy,並從外國引入有系統的籃球訓練,代替興趣班,讓 5至 16歲的學員參加,他希望能培養出真實版櫻木花道,推廣香港的籃球文化。




他們設有小型的籃球架及較小的籃球予小學或以下的小朋友使用,阿蘇說:「坊間一般興趣班都唔會分得咁仔細,我哋有細啲嘅 5號波畀小學生,佢哋會容易掌握正確姿勢,中學生以上會用大啲嘅 7號波。」

阿蘇表示 GMF Sports Academy的籃球訓練課程,與坊間的興趣班有分別,「興趣班一般都冇分 grade,初學同資深嘅學員都一齊上堂,質素有啲參差。我哋就會分初、中、高班,就唔同年紀又再細分,可以因材施教。」
除傳球、射籃及帶球等動作上的教學外,阿蘇亦注重學員的心理質素,「會訓練佢哋嘅自信心及解難能力,仲會教戰術及鍛煉團體合作精神。器材上,坊間嘅興趣班只提供一個 size嘅籃球,我哋就會提供細嘅 5號波畀小學小朋友, 7號波畀中學以上嘅學員,仲設有細籃架畀小朋友射籃,用番適合年紀及體型嘅器材,一定事半功倍,唔會學壞姿勢。」
阿蘇與大部分男孩子一樣,小時候已喜歡足球、跑步等活動,「讀中二時,我先有機會喺學校接觸籃球,覺得好好玩,之後入咗體藝中學, 16歲加入籃球青年軍, 18歲正式加入港隊。」 04年,阿蘇與隊友於印度奪得亞洲青年籃球錦標賽的第 6名,這些比賽成就,肯定了他對籃球的付出與熱誠,奠定了他日後的籃球路向。

由澳洲教波開始


阿蘇對小朋友挺有耐性,不時稱讚他們,若有動作做錯時,他會加以糾正及鼓勵。

阿蘇於澳洲 Deakin University大學修讀運動管理及金融,同時啟發他創辦籃球學校,「我喺當地籃球隊打波及教小朋友,發覺佢哋年紀細至 5歲已經有得學籃球,唔係單單興趣班,而係正統嘅訓練班。發覺香港冇呢類訓練班,我好想將呢個概念帶返香港,等本地嘅小朋友可以有系統咁學籃球。」
09年畢業回港後,阿蘇曾於屈臣氏田徑會及康文署工作,主要負責統籌活動及舉辦比賽,同時,他在工餘時到會所教籃球興趣班,「我同 4位朋友都有興趣搞運動學校,為咗吸收經驗,先由細規模做起。」
他們開設的興趣班適合 5至 16歲的學員參加,直至 13年,有不少家長反映,想自己的小朋友更深入地學打籃球。「但會所嘅場地有限制,一係用得半個場,一係用壁球室,同埋設施唔多。」

租國際學校場地

意識到家長的需求及籃球學校的發展潛力,阿蘇於 13年辭去正職,全職投入開辦 GMF Sports Academy,首要任務是解決場地問題。「雖然租用國際學校嘅籃球場都幾貴,約$2,000租用一個鐘,但設備配套比較好,當時我差唔多 send email去勻全港嘅國際學校,最後都有幾間肯同我哋合作。」
GMF Sports Academy的籃球課程有一個特點,每位教練都以英語授課,阿蘇說:「自己以前去外國打波,外國球員講英文太快,最初溝通唔到。日後小朋友可能有機會參與外國籃球聯賽,想畀佢哋先習慣用英文,家長都幾 buy,有得玩又學到英文。」




阿蘇(中)表示請教練有一定難度,「我哋用英文教學,多數會請喺外國留學返嚟嘅學生,或者英語好嘅大學生,一般英語能力好嘅教練,人工會高 30至 40%。」


每次練習前,阿蘇(左)會與其他教練向學員講解練習內容,並親自示範重點動作,讓學員加以注意。 出國訓練

阿蘇更參考外國的教學方法,由淺入深地講解,「先由個人方面開始,培訓大家嘅體能、技術及基本功;然後加入團體元素,多啲對戰及策略上嘅練習。另外,我哋每逢長假期都會搞出國訓練營,好似上年去上海,之前試過去曼谷,仲同 Nike、 Adidas等運動品牌合作過搞訓練營。」
阿蘇更定期邀請 David Nurse、 Javier Terren Morales及 Jorge Lorenzo Calvo等曾教過 NBA球隊的教練及球員,來香港分享及教班。「每年 7月尾,我哋都會帶隊去北京參加 CAAU全國青少年業餘籃球聯賽全國總決賽,畀學員吸收多啲實戰經驗。」
現時 GMF Sports Academy於九龍灣、沙田、將軍澳、西貢及中環合設有 5個教學分區,約有 300位學生,每星期約教 49班,學員以 5至 16歲為主,男生佔多數。學費$1,960( 7堂)起,每位學員入會費首年$900,現月賺約$30,000,「除 facebook及網頁外,我哋最靠人傳人嘅口碑嚟宣傳,最直接及見效。嚟緊想喺新界西開多個分區,同埋有多啲機會同外國籃球隊進行交流活動,令籃球文化喺香港更加普及。」
GMF Sports Academy@facebook




每逄長假期, GMF Sports Academy都會舉辦籃球營,圖為與 NIKE合辦的上海復活節籃球營。


阿蘇每 2至 4個月便邀請外國球員教練來教班,圖為 NBA投籃教練 David Nurse於國際籃球營分享及教授籃球技巧。


14年 10月,阿蘇與美國球員 Joseph Barnitz一同教授學員進攻及防守。 

家長周太: Nelson嘅同學仔介紹佢嚟呢度,我覺得有機會畀小朋友運動吓都幾好,所以畀佢參加。
學員
Nelson:打籃球好好玩,喺度識到好多朋友!



家長李太:佢喺學校都有打籃球,想畀佢吸收唔同教練嘅教法,改善一下技術。
學員 Morgan:同學介紹我參加,我開始咗大約半年,呢度學得輕鬆啲同開心啲!

每月收支

營業額:$420,000
學員裝備:$10,000
宣傳:$20,000
雜費:$10,000
租金:$20,000
場租:$140,000(包括營地租金)
人工:$190,000( 4位老闆、 3位員工、 50位兼職及邀請外國教練)
盈利:$30,000

開業成本

辦工室租金:(兩按一上)$60,000
場租按金:$60,000
器材:$140,000
裝修:$200,000

總投資:$460,000

撰文:霍芷晴
攝影:陳子禮
部分圖片由被訪者提供

    tvb4life 發表在 痞客邦 留言(0) 人氣()