小改款車「例牌」要執執個樣,頭燈內燈組設計讓「眼神」更為凌厲;車頭亦改用源於 F1的 A-wing擾流器;氣壩面積進一步擴大,有助改善氣動學效應。另外,鬼面罩凡係雙間設計就係玄門正宗的 AMG A 45,「盲毛」切勿胡亂「挑機」。

壹號幹線

特效配方•大力金剛丸  Mercedes-AMG A 45

Ads by Google

用武術去比喻性能的話, AMG A 45早已是非一般武林高手,蠅量級身段,卻鍛鍊出泰拳的狠快,又有氣硬功的力勁,一般「蛋散」,已經好難埋到身。
更何況,小改款之後,順手吞多粒大力金剛丸,功力(馬力)提升多 21匹,下盤功夫更為穩健,成就出地上最強 hothatch。暫時來說,確實打遍天下無敵手。

再搾多 21匹

售價:約 74萬
引擎: 1991c.c.,直四;前置,四輪驅動;渦輪增壓
馬力: 381匹/6000rpm
扭力: 48.5kgm/2250-5000rpm
波箱: 7前速自動雙離合器(附+/-模式)
加速: 0-100km/h 4.2秒
極速: 250km/h(電子限制)
長/闊/高: 4367/1780/1417mm
重量: 1555kg
耗油量: 6.9-7.3L/100km(公路及市區綜合計算模式)
查詢:仁孚行
網址: http://www.zungfu.com 

讚一讚
勁量兩公升 turbo引擎,波箱升檔積極性大有改善,更上一層樓;新增 RACE模式有高度自主駕駛樂趣,刺激又過癮。

彈一彈
改完都唔多覺係小改款車;波箱保護程式稍嫌太強,仍不太願意於較高轉下連續降檔。



兩公升引擎究竟可以去到幾盡?改款前 360匹已是極限?錯! AMG工程師略施小計,將活瓣重組,並重新調校點火時間及增壓值( 1.8bar),便令輸出多 21匹,爆發 381匹驚人馬力,每公升輸出達 191匹,再次刷新同級引擎最強性能紀錄,然而平均油耗僅 6.9-7.3L/100km;大力,不一定大食。



AMG A 45的操控能耐就像全無底線一樣,它既有四驅車的步履穩健特性,同時亦包含 FR車的利落指向,斬彎快夾狠,彎路動態靈活而不失溝通感,前 350mm後 330mm制動系統更給予無比信心。擅長落 track外,更加是「跑山」能手。



試車於 Eurospeedway Lausitz賽車場舉行,路面夠闊、彎路刁鑽又有超長直路,考驗性能更考驗車架功力。坦白講,大多 21匹其實唔多覺, 0-100km/h快 0.4秒就更加試唔出,不過成部車比改款前爽咗及 firm咗確係事實,尤其是出彎後盡油加速時的反應,配合埋死氣喉內的主動活瓣打開,強烈的打炮聲隨着催谷油門時產生,感觀刺激性實在滿分。



車廂改動甚為輕手,儀錶內字體及指針都是新設計喎,屏幕大咗少少喎,軚盤又係新設計喎。唔講唔會知,其實睇住,都唔多覺。



DYNAMIC SELECT旋鈕新設 RACE模式,油門、波箱、排氣及懸掛反應全部處於瘋癲狀態;更重要係三段式 ESP同時進入 SPORT HANDLING MODE,容許車尾向外橫滑,四驅車一樣有 FR駕駛樂趣。



AMG桶椅有功能又有賣相,新版增設坐墊深度調校功能,保證貼身夠支撐力。

要自己部 AMG A 45比一般「 A仔」有型, Aerodynamic package似乎唔慳得,套件包括前水平側翼、尾定風翼及尾導流器,賣相靚爆鏡之外,對提升指向穩定性及下壓力都「幫到手」,愈高速,愈見效果。












可能你會擔心四缸機器真係頂得順 381匹馬力?大可放心。首先, AMG是 100%「整偈」專家,縱使入門型號,但依然遵循「 one man,one engine祖訓」。而在結構上,引擎曲軸箱為鋁合金製,曲軸、活塞為鍛造品,汽缸壁亦採用獨有的 NANOSLIDE打磨技術,足以承受大扭力輸出。



針對上代轉波略欠激情的「民意調查」後, 7速雙離合器亦經調校,三至七波齒比更為緊湊,升檔明顯快夾狠,檔與檔間的「跌轉數」問題亦大有改善。

若選配 DYNAMIC PLUS package,懸掛能作兩級硬度調校,另外前軸更有新增的機械式限滑差速鎖,出彎反應更快更兇狠,唔慳得。







講多句

現實揸車,冇乜可能用得盡 AMG A 45性能,只不過,揀得辣跑自然會關注馬力,亦自然會同其他對手比較。而在高性能揭背車級別中, 381匹輸出的 AMG A 45為現時同級最強馬力保持者,又多一個說服自己買車的好藉口。

「新 A仔」入伍!


小改款 A-Class同時新增 elbaite green車身色,《忍者龜》粉絲必合!

除旗艦 AMG A 45外,全線 A-Class亦一併踏入小改款周期,新增 A 160型號外,另有新成員 Motorsport Edition加入「 A仔」大軍。請起立,並掌聲鼓勵!

終於有得玩軟硬

改款 A-Class在外觀上主要是重新設計過擾流裝置,睇落的確較有新鮮感,另外就是頭尾燈亦重組過,甚至可選配成全 LED結構。車廂改動主要是中央屏幕增至 8吋,並可對應 Apple的 Carplay系統。其次是新增 DYNAMIC SELECT裝置,駕駛者可根據喜好隨時改變懸掛及輸出特性。 A160是新增型號,採用 1595c.c.直四 turbo引擎, 102匹輸出並可配 6速手動波箱,平均油耗僅 5.4-5.6L/100km。




Motorsport Edition有大量「綠化」修飾,不過同環保無關。


原裝啞色油的貼服效果,非一般貼膜可媲美。 「綠化」特別版

另一個新加入的成員是 Motorsport Edition特別版,除 AMG A 45外,亦適用於 A 200以上型號。劃一採用 MERCEDES AMG PETRONAS F1車隊專用銀灰色外,車身及車廂都有大量「綠化」( petrol green)修飾,代理表示該版本將會一同供港。如無意外,今年 F1總冠軍都會是平治車隊的囊中物,依家訂定,時間就啱啱好。




DYNAMIC SELECT裝置當然要額外付鈔,不過多樣嘢玩,值得俾。


車廂一樣好「綠化」,一泊埋去其他「 A仔」度,即時升 level啦!


點解特別版要銀灰撞綠,答案此中尋。

撰文、攝影、攝錄:廖宏俊、(德國德累斯頓)
mailto:features@nextmedia.com

    tvb4life 發表在 痞客邦 留言(0) 人氣()