中環人語

先科案響朵

Ads by Google

富商 Peter Ko高健行,被娛記問到同藝人楊思琦行埋,如此回應:「我都唔係蠢人,你哋知我做金融投資嘅底細,我都幾聰明吓。」既然自吹,小宗又揭吓佢底細。呢位「高人」出身光大證券,係天下第一庄蔡鶴雲( Vincent Choi)嘅徒弟,○五年轟動股壇嘅「先科案」,佢老哥都係主角之一,被老廉控告醒咗六萬蚊俾兩個分析員寫報告,唱好先科國際及宜進利兩隻庄家股,啲錢喺茶餐廳交收,話係「麻雀數」喎!呢單案收錢嗰名分析員都做埋污點證人,但 Peter Ko搵咗資深大律師王正宇辯護,宣判時成個法庭跌到滿地眼鏡碎, Peter Ko被判無罪釋放,又難怪今年四十七歲嘅佢唔怕醜,咁招積讚自己係聰明仔!

金融逍遙客:親嘗 800針滑手床鋪

游走於中港台併購、私募投資的金融多棲動物,現為多間上市公司主要股東及董事



澳門賭股最近的一年表現,可算進入冰河時期,紛紛自高位跌了七成有多。最近稍有回光返照,與澳門賭業已衰到貼地不無關係。股價衰歸衰,遊客及酒店生意卻意外地好,特別是頂級酒店。逍遙客每逢外遊,除對飛機型號及航空公司有心得外,對酒店也花了不少時間研究其各種細節及經營。
全球著名酒店集團巨頭如 Starwood( St Regis、 W及 Sheraton)和萬豪( Ritz Carlton及 Marriot),為應付高速發展,都只能轉向輕資產經營模式。即大部分掛住他們招牌的,其實業主另有他人,酒店只負責經營及抽水,可算是一門「公死有得食,婆死也有得食」的生意。正因為業主負責出錢投資,酒店雖有各自一套硬件標準,但業主大方與否,也全都反映在各細節上。大至大堂氣派,小至床單針數,又或沐浴露牌子,都可輕易感受到。
銀河二期剛落成,知道 Ritz Carlton落戶,逍遙客連訂三次不果,第四次終如願以償。小住一晚感受,令人眼前一亮的全白雲石大堂、 800針以上滑不溜手的床鋪、軟硬恰到好處的枕頭,的確感受到業主的出手和誠意。與一期 Banyan Tree相比,那越南手工的木傢俬、總令人感覺濕𣲷𣲷沒洗淨的床單、洗完頭後總是痕痕哋的淘寶洗頭水,盡顯業主慳得就慳的風格。這也難怪,當年銀河所有投資都是籌旗返嚟。大賺數年後,現在出手當然不一樣。很多土豪捨得買盞百萬水晶燈俾人睇,卻不捨得買個每天陪住自己十個八個鐘的二千蚊靚枕頭。其實觀察細節可發現不少事物本質,很多為人處事或事業成敗,也與細節息息相關,但細節卻往往是大部分人所忽略的。

中環寸嘴:李嘉誠變楊家誠


楊國佳

工廈大王楊耀松長子,是各大有名食肆之 VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

早排晏晝去家傳七福食飯,帶咗支牙擦蘇( Echezeaux)去飲,吖!個侍仔喺個褲袋拔支瑞士軍刀嘅開酒器,係咁「撬」我支靚酒,為咗維護我支酒嘅尊嚴,我「媽」條友:「你估我飲武當契弟( Mouton Cadet)呀?啲酒塞碎跌咗落去叫我隔渣飲呀?」
上個禮拜去咗淺水灣,呢度都有我嘅集體回憶,做𡃁仔嗰陣,跟啲世伯嚟淺水灣由馮秉芬搞嘅私人會所「聽濤會」食飯,嗰陣黃坤仲揸緊鑊鏟做行政總廚,家陣唔同晒,楊受成搞嘅商場 The Pulse有啲似 L.A. Santa Monica,幫襯咗「粥、粉、麵、飯」,正所謂好嘅一餐,唔好又一餐,有支樽裝嘅英國 Wilkinson薑啤($25)唔錯,唔係好甜,不過都唔及日本出嘅 Canada Dry咁夠氣,難得有間中式小館,住喺淺水灣 apartment啲老人家都有啲選擇,唔使吓吓食西餐。
呢排個市反彈,不過好假,人民幣拆倉,舊時唔少廠佬買落好多人民幣 Accumulator,過去十年都 sure win,哈!家陣人仔跌就大鑊啦!啲老友問我有冇買,我梗係冇啦,如果掂呀,人人都做李嘉誠啦,通常唔掂就跟我姓楊,變咗楊家誠!




呢個商場夠長,但唔夠深,都係爭啲。


整咗碟蝦多士,唔使等,夠快! 劉鳴煒學做廢青


去日本光明正大,劉鳴煒怕乜正面上鏡,同㗎妹影番張相呢?

華人置業( 0127)主席劉鳴煒,曾「勉勵」月入萬五蚊嘅後生仔,「睇少啲戲、去少啲日本」就上到車,之後就被網民狂插佢「堅離地」。
今個月初,由佢做副主席嘅智經研究中心, Facebook專頁就上載咗兩張劉公子去日本扮廢青嘅相,相中佢只以背面孭住個黑色大背囊示人,喺日本街頭望住戲院海報燈箱𢱑晒頭。圖片說明就話劉鳴煒「用咗三千蚊去日本,仲睇埋戲添呀!」又學埋年輕人玩 hashtag:「#OutBudget#無錢#廢青#儲唔到錢呀#買唔到樓啦。」




本週一再嚟料,以海洋公園副主席身份扮鬼扮馬,即時放上 Facebook「些牙」。

智經呢段帖,仲要寫住「 with Ming Wai Lau」,去 Ming Wai Lau個 Facebook,就發現劉公子都有 hashtag自己金句「#睇少啲戲、#去少啲日本」,但就話自己好困惑( perplexed),究竟點解咁煩,係冇私人飛機坐,還是冇五星級酒店住呢,小宗都好想知,但華置公關冇回覆噃。
網民都問:「三千蚊 budget搭咗咩廉航?住邊度?」劉公子一律無回應,但網民反應未算熱烈,事關 Ming Wai Lau呢個專頁,只有二百幾人 follow。

文遜大廈有古講


彌敦道文遜大廈( Manson House)與 Sir Patrick Manson甚有淵源。

練乙錚本週一撰文力數港大 Medi威水史,謂 HKU Medi奠基人治瘧貢獻媲美屠呦呦,呢位醫學界先驅 Sir Patrick Manson( 1844-1922)成立牛奶公司,喺薄扶林養牛牛;文遜爵士嘅足跡又豈止於港島區;彌敦道有幢文遜大廈( Manson House),一九五三年就係牛奶公司冰廠及冷房,大廈以佢命名;一九五八年霍英東以九十萬買起成幢,無獨有偶,十年後霍英東二房生咗個仔,改名霍文遜,老霍對呢個仔嘅期望唔使講啦,能夠達到老父期望,怪不得老霍生前最錫呢個做醫生嘅仔啦。

    tvb4life 發表在 痞客邦 留言(0) 人氣()