陳啟宗親筆撰寫八千字「致股東函」,唱淡中國經濟前景,其中一句講到習大大提出嘅「一帶一路」短期經濟效益令人懷疑,震驚中環。(《蘋果日報》圖片)

眾人諸事

陳啟宗質疑一帶一路 江系反擊習大大

Ads by Google

恒隆集團董事長陳啟宗一篇八千字「致股東函」,表面上好似上市公司主席進行宏觀經濟預測,但識得睇嘅當然唔只睇佢由中國經濟大好友變身大淡友,仲要好好進行政治解碼,單單話一帶一路帶來的「短期效益是否足以振興經濟,令人懷疑」,明顯衝着習大大嘅新國策而來,令中環好多人相當詫異。

陳啟宗仲列舉四大因素: A股股災、樓市不振、就業減少、出口疲弱唱淡強國經濟。事有湊巧,星期一中國公布經濟增長跌至六年嚟新低 6.9%,陳啟宗真係開口中。
最近有北京「中間人」放風,被反貪腐「國策」修理得好慘嘅江澤民派系頻頻有動作,包括派人南下香港,接觸有頭有面人士,傳達習近平「搞唔掂經濟」嘅訊息,應承擔中國經濟轉差嘅責任,政治目的呼之欲出。香港政界都有人聽聞呢個消息。
陳啟宗係咪幫江系發炮嘅第一人?冇乜人清楚。但有心人提醒記者,必須留意未來有冇其他富豪或重量級人物開腔唱淡中國經濟。睇嚟,呢一刻嘅強國真係好似暴風雨前夕。

梁粉唔敢講 689連任


中共十八大五中全會下星期召開,黨內權鬥隨時升級, 689想連任特首不容樂觀。(《蘋果日報》圖片)

陳啟宗質疑一帶一路,最擔心嘅人可能係為睇國旗不惜遲到嘅梁振英。眾所周知,陳係 689最大金主,佢膽敢批評習近平嘅新經濟火車頭,係咪代表唔再支持由習大大捧上場嘅 689角逐連任呢?
原來唔單只一般人睇唔清中共權鬥內幕,連一直支持 689嘅核心梁粉都唔敢押注。最近一個商界飯局之中,有人問一位好多公職嘅梁粉: 689連任機會有幾大?佢唔似一般梁粉鍾意「夜行人吹口哨」壯膽,一味話 689篤定連任,寧願退後一步話睇唔通個局,必要時退隱江湖。聽完呢一句,點睇梁振英成功連任點都講唔上樂觀。

黃楚標助黃仲棋渡難關


黃仲棋講往事,話多得黃楚標幫佢找咗一條千萬元嘅尾數,否則佢嗰間數碼收音機工廠就要執笠。 (《蘋果日報》圖片)

深水埗前區議員黃仲棋突然重返麗閣選區參選,搞到佢嘅民協前黨主席馮檢基好勞氣,話黃擺明𠝹票,政界傳聞係「大班」鄭經翰鼓勵佢咁做。黃擔任《東周刊》副老總時曾冒充公職人員罪成,喪失區議會議席,好彩得大班力挺,收留佢喺商台做監製。黃亦淡出政壇,轉行從商。
黃仲棋本週一向本刊記者講,曾經開廠生產 LED燈,為咗搵生意聯絡過馮檢基,阿基為避嫌拒絕咗佢。佢之後轉做數碼收音機,大班仲喺 DBC時曾經搵佢落咗張千萬元計嘅訂單,但銷情不甚理想,好彩大班離開 DBC之後黃楚標肯找埋條尾數,如果唔係公司要執笠。

Coco哭訴後重生

二十四歲模特兒袁晴晴 Coco最近就盜竊案底上訴,被網民圍插「做雞」。佢不甘示弱,拍片反擊,叫「仇人」前港姐十強梁詩其等人唔好再抽水鬧佢貪小便宜,網上罵戰不絕。本刊同 Coco做完專訪後,佢多次透過電話哭訴,話擔心將來冇 job接,唔能夠再喺呢行生存,甚至唔能夠喺香港生存,搞到記者有啲心噏。
估唔到事隔幾日, Coco突然「重生」,好似冇晒事咁款,去咗「綠魔」 Karl喺蘭桂坊搞嘅生日派對,同 Karl合照,又接受電台同網台訪問。 Coco同記者講,都係要見吓人先,但唔敢太高調。對家唔放過佢,但佢決定唔理。佢依家繼續去玩去飲嘢,仲玩 17直播,又繼續自稱甜品公主,拎住甜品自拍 upload上網。睇番佢最近受訪同人氣仲高過之前。記者之前可能太有同情心,依家總之祝佢好運。




Coco接受本刊訪問後心情低落,但轉個頭又落老蘭夜蒲,聲稱「重生」。


(鄒潔珊攝)

撰文:巫不言
mailto:news@nextmedia.com

    tvb4life 發表在 痞客邦 留言(0) 人氣()