爆壹爆

禮貌叫雞運動

Ads by Google

是咁的,依家除咗日常生活要有禮貌,原來㩒鐘仔搵鳳姐,都要講禮貌。堅定流呀?滾友明前日同爆哥講,早排佢見到,灣仔鳳樓勝地富士大廈,一個署名「有種部隊」嘅組織,喺多個樓層走廊,貼咗張好特別嘅通告出來,標題寫住「有禮貌叫雞運動指引」,內容大致話就算姐姐仔外表唔靚唔係自己杯茶、收費過高超出預算、服務不似預期、又或交易途中有咩突發事等等,客人都要沉住氣,唔好講一啲令姐姐仔難受嘅說話,要以禮相待哦。而客人如果想「集郵」,影番張相留念,一定要問准姐姐仔先,千祈唔好靜雞雞偷影呀。仲話客人如果可以對姐姐仔多一啲關心,少一啲問候人娘親,世界就會更美好啦。

唔係吖嘛咁都得?所以好多嫖客見到張通告時,都覺得好好奇,圍埋一齊逐隻字慢慢推敲,其實係咪有新嘢玩呢?唔通要叫埋老師早晨?睇完之後各人估究竟貼通告嘅「有種部隊」係何方神聖,可能係班馬伕搞出來,唔想姐姐仔咁多投訴。不過亦有嫖客贊成禮貌尋歡,完事後要同姐姐仔握手多謝,因為佢好偉大,拯救一班慾海宅男,製造世界和平,社會和諧乜乜乜。
不過點都好,對人有禮貌,係應該,得閒笑一笑,世界更美妙。







富士大廈名氣連日本人都知,一些旅遊指南也有介紹。 錦田巨型花牌陣

早幾日入錦田探朋友,去到錦田大街時,見到豎起好多個巨型花牌,有氣勢得嚟又好浮誇,鄉紳土豪一向鍾意玩呢科。爆哥初初以為又係乜嘢寶誕之類,望真啲,先知原來係一間地產公司新開張,使唔使咁誇張,你嚇鬼呀。
聽圍村陀地講,錦田係一個龍蛇混雜嘅地方,能夠喺呢度開得地產公司,一定唔會係老襯,多數有番咁上下江湖地位先得。而呢間地產公司嘅老闆,花朵叫光頭康,就係新義安猛人,佢同錦田霸王四眼民好好朋友,所以一早趁政府有意發展呢區,已率先入錦田搞地產搵大錢,生意仲愈做愈大添。光頭康個朵喺錦田一帶都算把炮,所以送花牌嘅人都唔嘢小,好似有廣東省政協委員、西貢大地主黃才平同鄉紳梁福元之外,據聞自稱 14K龍頭嘅蕭華、水房有錢人百花蛇,以及和勝和元朗話事人囝囝,都有俾面送花牌來,以一間地產公司來講都算巴之閉。




哇,開地產公司都有咁多勁人道賀。


哇哇哇,好浮誇囉。 收數佬悲歌起佢底

上星期手機 WhatsApp瘋傳兩段短片,講一名金毛紋身收數佬,帶埋金銀衣紙到新界一圍村收數,反被圍村惡霸黑吃黑玩番轉頭,不但要叫番對方做「大哥」,仲要生吞衣紙、索香爐灰同飲「香爐灰可樂」添。好慘,事件引起好大回響,唔單只網民鬧爆,個個江湖人都討論,話班圍村古惑仔太過分,咁搞法,個收數佬以後仲有面出嚟行嘅,實在太過分啦。
爆哥當然覺得咁樣冇人性啦,收到風,個收數佬花朵叫鯊魚,係元朗元崗村 14K猛人元崗黑門生,平時都打橫行,嗰日走去屯門井頭村收一名村民賭數,點知個債仔當佢冇到,唔還錢不特止,仲即場吹雞,搵藍地新義安猛人肥傑門生排骨來幫拖。一向蝦蝦霸霸出名麻煩嘅排骨,見有嘢玩,立即帶幾個手下趕去井頭村,恃住人多兇番個收數佬轉頭,仲玩到人上網咁陰功。有朋友話,差人都睇唔過眼,反黑組已經四圍搵緊排骨,而排骨等人可能知道玩大咗,已經離開藍地避風頭。







爆哥乜料

金融界撈家,穿梭黑白政商界,朋友遍布旺角至中環,每星期都八到
唔同料,同《壹》仔讀者過吓癮!

    文章標籤

    爆壹爆 禮貌叫雞運動

    全站熱搜

    tvb4life 發表在 痞客邦 留言(0) 人氣()