(左)杜之克、(中)曾勵珍、(右)余詠珊

娛樂偵訊

無綫大廝殺 架空曾勵珍

Ads by Google

上週五(十月十六日),無綫突然發出內部通知,公布節目發展分部總監彭濟材榮休,職務暫由與方丈余詠珊好老死的集團行政總裁助理杜之克兼任。據了解,彭濟材突然被退休,是高層大廝殺下的祭品。此外,在無綫 41年,一直在戲劇組話晒事的珍姐曾勵珍,亦不敵方丈,由戲劇製作總監升上神枱變顧問。
珍姐被架空引發骨牌效應,她拍板由鄭則士擔正的劇集胎死腹中,愛將陳展鵬拍完《城寨英雄》後開始坐冷板櫈;屬於方丈馬房、由有線過檔到大台的李佳芯則水鬼升城隍,已被安排兩劇做女一。

明升暗降

碼得住老闆陳國強,余詠珊插旗綜藝科後,開始不斷囤兵自組山頭,將昔日在有線的舊下,逐一搬到無綫,又和曾勵珍連線,聯手對付樂易玲。二對一,加上要為藝人逃亡潮負責,樂易玲多次被傳離職,今年初,李寶安索性空降自己友 Marco到資源部,被削權的樂大媽風光不再。
宿敵敗陣,曾勵珍卻無機會同余詠珊平分天下。今年三月才宣布全權掌管戲劇科的她,最近在余詠珊和杜之克夾擊下,亦要起身。原來彭濟材被退休當日,方丈一不做二不休,將舊有班底連根拔起,連曾勵珍亦剷走,被明升暗降,轉為顧問。
「其實珍姐自己都聞到啲𤓓味,早排有好多 project都俾人 ban,佢試過發脾氣放假走咗去,彭公(濟材)走嗰日,珍姐都收到通知,話佢到咗退休年齡,勸佢升做顧問,管開嘅製作部就由杜之克睇埋。」工作人員透露。




由有線人陸浩明、區永權和衞志豪主持的《娛樂 3兄弟》,據知就連邀請劉華做嘉賓,都係方丈出面,擺明幫自己友響朵。


盧覓雪曾經在 now台主持《撳錢》,跟杜之克一齊打過仗,前老闆有景,盧覓雪又有機會在無綫做節目介紹飲食。


近日開拍新劇,除有方丈愛將洪永城外,就連出身有線的肥媽都有份,余詠珊時代正式開始。


12年,樂易玲仍是權力核心,藝人都爭住擦鞋,當時一姐胡杏兒,親生仔林峯以及謝天華等全部買晒禮物出席她的生日 P,梁烈唯更飲到醉晒。


架空兩年,彭濟材於上星期被退休,他在公司最後一日,發了一封信給共事過的同事,內容有不捨亦有暗寸方丈,隱然表達不滿。 李添勝要起身

一朝天子一朝臣,曾勵珍揸弗,契仔陳展鵬如坐直升機,幾乎部部做男一,但正在拍新劇《城寨英雄》的他,亦無以為繼。
「珍姐鍾意黎耀祥,有本事令佢做咗三次視帝,之前吹風話陳展鵬今年都好大機會,不過而家咁嘅形勢,應該冇乜可能。仲有珍姐之前叫咗鄭則士返嚟同苑瓊丹一齊開部古裝劇,而家都話唔開住,亦唔知拖到幾時。
「除咗演員,珍姐班底嘅監製例如李添勝同張乾文,拍完手頭上 project,都冇得撈要走,不過佢兩個都已經過晒退休年齡,呢幾年都係翻閹。仲有升咗做助理總監嘅邵麗瓊,就要燉番落嚟做編審,暫時淨係睇《愛•回家》,徐遇安就因為之前《愛•回家》出錯,本來翻閹咗,都要即刻走人。」一名無綫人透露。




鄭則士犧牲


陳展鵬落馬


李佳芯跳女一 搵叛將回巢

權力遊戲下,余詠珊獲勝,旗下馬房的藝人,亦水鬼升城隍。其中由有線過檔大台做開大茄的李佳芯,竟獲安排兩劇做女一。
冇人用又要救收視,同余詠珊一黨的杜之克,幾個月前開始親自出馬,拉攏已離巢的舊人食回頭草,尤其一班珍姐年代被視為叛徒的港視藝人,均獲重金禮聘返無綫拍劇。
「珍姐慣咗強勢,稍為逆佢意思就一定冇運行,佢一句永不錄用,就咪旨意返轉頭。不過杜之克就唔同,搵咗廖啟智返嚟之外,之前去咗香港電視嘅劉玉翠、艾威同林文龍,佢都打算傾返嚟。」一名無綫人說。




珍姐時代,愛將黎耀祥三度封視帝,珍姐權力之大,一時無兩。


如無意外,由傅嘉莉及新人何廣沛孭飛的《財神到》,是李添勝在無綫最後一部劇集。


珍姐馬房的張乾文(格仔衫)監製過唔少劇集,也跟彭濟材一樣命運,被勸喻退休。


珍姐頭馬邵麗瓊(圓圖)被燉做編審,現在只睇《愛•回家》一劇。


在無綫多年備受冷落的艾威跟劉玉翠,過檔港視被珍姐視為叛將,有指有機會回巢做無綫人。


杜之克重金力邀超班演技的廖啟智,及方中信返無綫拍劇,而女角則是有線人李佳芯,擺明力捧。

撰文、攝影、攝錄:娛樂組

    tvb4life 發表在 痞客邦 留言(0) 人氣()