專題 Log In

愛鬥大  Audi RS3 Sportback& M-Benz A45 AMG

Ads by Google

呢個世界邊有咁多巧合?邊有可能冇假想敵?講緊係最新到港嘅 Audi RS3,以 367匹、稍多 7匹馬力 K.O.同級王者 M-Benz A45 AMG,成為呢個級別馬力之王,擺到明針對!全因 RS3喺呢個 5門揭背級別中惡開,就算 BMW M135i都唔係佢手腳, 2年前被 A45 AMG搶咗威,新款點可以再輸?新 RS3有幾勁?有幾快?由 A45 AMG車主試吓佢,就有最中肯答案。



其實 Audi車系嘅發展方向同 M-Benz好似,最頂級嘅 RS車系就等如 AMG,當然車款冇 AMG咁多啦,但有一點值得一讚係全線 RS都配 Audi最耍家嘅 quattro四驅系統,行車安定性出晒名, AMG都唔係部部有四驅。

「買車梗係睇樣先,新 RS3靚仔過以前!」

A45 AMG車主 Adrian一見到 RS3嘅時候,就話新款好睇過上代。「我買車梗係睇樣先,上代 RS3因為個樣唔夠型,加上知道 A45推出,一睇 A45個款就鍾意,所以唔揀 RS3。今代 RS3靚仔過以前好多,不過都係太過斯文,同埋車尾比例較長,似 sedan咁,唔夠 A45咁 compact。」 Adrian咁講係有道理,始終買得呢類車,要咁低調做咩?而測試車 RS3更用咗好似底油咁嘅灰色車身,令外表更唔起眼,行出嚟吸晴度一定唔及 A45 AMG。
車身尺碼方面, RS3又真係比 A45 AMG長 51mm,達 4,343mm,不過軸距又短過 A45 AMG 68mm,只有 2,631mm,此消彼長之下,難怪望落 RS3車身較修長。長車身有個好處, Adrian:「我覺得佢呢個樣都有捧場客嘅,起碼尾箱實用啲,應該可以放到單車, A45就唔得嘞。」




頭泵把呢個「 quattro」章要額外選配,未連稅盛惠$7,400。


如果嫌尾喉聲效未夠勁,又可以升級 RS Sports尾喉,多謝$9,700。


講惡,梗係 A45 AMG(右)勁啲啦,車主仲要後加包圍,煞!


RS3(左)車身比 A45 AMG長,但軸距較短,比例上有 wagon影子。


兩車車尾底部都有導風板,配合左右雙出尾喉,小鋼炮指定設定。 「有一貫德國車高水準」

由普通 A3變成 RS3,就好似 A200變成 A45 AMG一樣,唔可能只改外表,車廂設備、甚至氣氛都要調校一下,先襯返個勢!原裝 A45 AMG嘅桶凳人人讚, RS3又點可以輸蝕?換上真皮、防滑物料混合製成,比普通座位有更好承托效果,而且背部刻上 RS3字樣,靚仔!「我其實仲有部 RS5,我覺得 RS3嘅車廂用料同造功比得上 RS5,有一貫德國車高水準,同部 A45不遑多讓。不過,對凳嘅外表同承托力都同 A45嘅原裝凳有一段距離,或者要加錢換對好啲嘅凳先似樣。」




RS3駕駛艙用最頂級材料,顯示屏可以收入中控台內。


RS3後座用多幅真皮縫合而成,安全帶都加咗紅色邊。


RS3前座其實已相當之靚仔,但 Adrian都覺佢比較着重舒適性。

除咗座位唔同咗, RS3都用埋專屬平底款真皮混合猄皮軚盤,手感好到不得了!而且測試車車廂仲加咗 RS車系專用紅色車廂套裝,安全帶、冷氣出風口、真皮縫線等,都以紅色點綴,加添辣味。「我又覺得佢加咗啲紅色嘢冇乜特別,好多車變辣版都會咁做,我部 A45原裝已經用好多紅色裝飾,唔使加錢都有啦!」




A45 AMG原裝車已有適量紅色點綴車廂,唔使加錢。


A45 AMG後座嘅鮮紅色安全帶及扮桶座,都充滿跑味。


A45 AMG嘅原裝前座同正規賽車座椅幾乎冇分別,甚至頭枕都冇得調校高低。 「舒適性高,取向斯文」

RS3係車系中頂級,可以加裝 Audi Magnetic Ride主動式電磁感應懸掛系統,不過測試車冇加裝,只用較硬吸震筒, Adrian試咗一陣車就話懸掛太舒服。「其實呢類揭背車除咗外表要型之外,行車表現都唔需要太舒適,因為咁會少咗一份小跑車嘅熱血感覺。 RS3原裝懸掛舒適性高、取向較斯文,試車時發覺吸震效果好好,但急彎傾側比 A45大,加上原裝前座唔夠包,令我身體有啲擺動,信心低啲。」




專用平底猄皮軚盤有 RS3標誌。


前座背部刻上 RS3字,而且兩側用混合防滑物料。


中控台加上適量碳纖裝飾,即時靚晒!

去到 RS3同 A45 AMG呢個級數嘅揭背跑車,唔加套四驅系統實在難以令人信服,而 RS3用嘅正正係 Audi最出名嘅 quattro四驅,可以自動分配前、後輪驅動比例, 50:50就最適合試車當日嘅惡劣天氣。「其實 quattro系統真係好幫到忙,剛才有啲急彎我用大油出彎, feel到因為車身太側令車尾外移,四驅一出手即時修正,速度同效果都同 A45嘅 4Matic相似。」




冷氣出風口都有紅色點綴,只要關閉風口就見到。


用家可以選配 B&O音響,稅前價$9,000。


RS3嘅尾箱其實好大,加上後座可以摺叠,實用性更高。 「感覺 A45起步一剎快少少」

玩針對就要鬥大,高性能跑車唔需要鬥車身大,要鬥就鬥馬力大!鬥加速快! A45 AMG以 2.0公升直四 turbo引擎搾出 360匹實在好嚇鬼,不過 RS3出絕招,你亦可以話佢出茅招!竟然用傳奇名車 RS2都用嘅 2.5公升直五 turbo引擎!喺更大容積、多1個汽缸嘅優勢下,輕易爆出 367匹馬力及 47.4kgm扭力, 0-100km/h只需 4.3秒,比 A45 AMG快 0.3秒。「我試車發覺兩部車加速力相當接近,個人感覺 A45起步一剎快少少,由於試唔到高速,所以好難講中、尾段會點,不過可以肯定一點係, RS3嘅波箱比 A45快!而且順暢得多!加速力隨傳隨到!」




2.5公升五汽缸 turbo引擎先出現喺 TT RS及上代 RS3,馬力達到 367匹,比 A45 AMG多 7匹。


RS3波箱表現快速而暢順,連 A45 AMG車主 Adrian都讚!


RS3表板佈局同普通 A3相似,但轉數表內加入 turbo增壓表及 RS3章。


中控台有「 drive select」快速選擇掣,可快速設定多達 5種行車模式。


環保係大趨勢,所以 RS3都有停車自動熄匙系統,可手動關閉。


19吋軨內藏極之靚仔嘅 8-pot前卡鉗同波浪形剎車碟。

跑車除咗快,官能刺激都好緊要,呢一個環節 RS3較為輸蝕。「 A45行車轉波有好勁嘅排氣喉聲,加速及收慢時會送上陣陣啪啪聲響,聽覺上好大刺激, RS3都有啪啪聲排氣爆震效果,但唔夠勁,就算用 Dynamic模式都係差啲。」
綜合 Adrian及筆者試車感受, RS3表現其實有更激進空間,只係廠方將佢設定到相對斯文,或者為令日後 facelift時有更明顯進步吧!




A45 AMG嘅引擎只有 2.0公升,但馬力都有 360匹,同型式引擎中最堅!


A45 AMG嘅 MCT波箱唔可以喺波棍上操作+/-模式。


Adrian認為 RS3表現比較舒適,懸掛亦較軟。


據廠方數值, RS3可以 4.3秒完成 0-100m/h加速,比 A45 AMG快 0.3秒!

撰文:袁國基
攝影:葉偉豪

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()