Play House

藝大生點睇?$0 Job

Ads by Google

早排有隊本地女子組合嘅 MV成為全城熱話,內幕就話係其經理人搵咗班學生賤價拍,所以先拍出咁嘅質素。
雖然外界不斷批評「要平就要搵學生」係個錯誤嘅觀念,但誠然始終有好多學生需要機會去表現自己,就好似 K11所舉辦嘅第二屆〈 K11 Encounters 11-本地學生公共藝術項目〉,一共邀請咗 3位來自薩凡納藝術設計學院(SCAD)藝術學士的學生,以「 Art Playground」作主題,喺商場嘅不同角落畫畫,坦言冇錢收,點解冇錢佢哋都願意做好呢單 job呢?
究竟呢類展覽,會唔會係年青大學生踏出社會嘅出路?聽聽當事人點睇!

「有名先會有利」


Shirley(主修插畫,副修平面設計)

本身係素食者嘅 Shirley,佢一貫嘅作品風格都係以鮮豔奪目嘅色彩,配上各種動物,佢話原本作品入面都有包含動物,但因為商場方面覺得有動物的話,意思會太直接,想抽象啲令觀眾有更多想像空間。作為藝術家嘅 Shirley一啲藝術家脾氣都冇,更話自己係個「現實藝術家」,覺得商場可以俾到知名度佢,所以唔介意讓步作配合,只要合作伙伴唔會叫佢做啲遺背素食者原則嘅作品即可,畢竟,長線看,出咗名先會有人搵佢繼續工作。




展出位置: 1、 2樓防火門

《 Happiness is a state of mind》,作品入面有多種不同形狀和繽紛的色彩, Shirley話想通過設計嚟分享佢自己最鍾意嘅花朵圖案,仲話可以療愈心靈,自己開心時,觀眾亦會感到快樂,從而尋找屬於自己嘅「幸福」感覺。

「有機會就會把握」


Bonnie(主修插畫,副修攝影)

Bonnie讀書期間成績已非常標青,唔單只去過日本交流和創作,佢嘅作品仲入圍並贏得美國 Adobe Design Achievement Awards、中國 Hill Illustration Awards、加拿大 Applied Arts Students Awards以及英國 Creative Conscience Awards的銀獎。佢話本來份作品想色彩繽紛,但留意到商場周遭已經花呢花碌,所以就想用返啲簡單嘅顏色。雖然今次作品冇錢收,但佢都好投入做,又為商場嘅角度去諗,因為佢覺得有機會就應該好好把握,一來係練習嘅機會,二來亦係展現自己能力俾公眾睇嘅時機。




展出位置:地下近通往停車場升降機

《 The Playground- a map of Hong Kong》,作品雖然話係香港地圖,但經過 Bonnie嘅創作,變成一幅屬於佢自己想法嘅香港地圖,線條直接、色彩簡單、圖案天真,充份表現出 Bonnie對香港嗰份純真嘅感覺。

「當儲靚自己 portfolio」


Stanley(主修插畫)

Stanley讀書時期都有接 freelance job,雖然佢覺得冇錢嘅 job都唔緊要,當儲靚自己嘅 portfolio,不過只限於讀書時期。一來,藝術家始終要食飯,另外,當畢業後接 job嘅時候,畫畫已經係自己嘅專業,冇錢接 job其實係一種侮辱。




展出位置: B2樓層近 chi K11 art space

《 In the Groove》呢幅畫係 Stanley對商場嘅直接感覺,作品模擬一個觀眾遇上神秘怪異生物時嘅情景,主要圍繞著聲、色、味呢三種感官刺激,同商場主題一樣。

第二屆〈 K11 Encounters 11-本地學生公共藝術項目〉

日期:長期展示
時間: 11:00-22:00
地址:香港九龍尖沙咀河內道 18號 K11商場
查詢: K11(3110 5898)

撰文:陳可兒
攝影:陳子禮

    tvb4life 發表在 痞客邦 留言(0) 人氣()