DC Hall

暗黑錄像  Sony α 7S II

Ads by Google

唔好誤會,標題所講嘅「暗黑錄像」,唔係指啲咩唔見得光嘅視頻,而係指 Sony最新全片幅無反相機α 7S II,強到喺近乎全黑嘅環境中一樣拍到片!點解咁勁?因為部機唔只承繼咗上代α 7S超高嘅 ISO 409600感光度,仲終於內置埋 4K攝錄功能同五軸影像防震系統,拍片除咗寧舍光猛,更夠晒清晰同穩定,真係黑到連肉眼睇唔到嘅都拍到出嚟,經常要喺夜晚拍片嘅話,一定要揀佢!

Spec.
像素: 1,220萬
感光元件: 35.6× 23.8mm Exmor CMOS
鏡頭接環: Sony E-mount
快門: 1/8,000-30s、 B
感光度: ISO 100-102400(可擴展至 ISO 50-409600)
影片: 4K@30p/1080@120p
屏幕:可揭式 3" TFT
儲存: SDXC/MS PRO-HG Duo
無線連接: WiFi、 NFC
體積: 126.9× 95.7× 60.3mm
重量: 627g
售價:$21,990(淨機身)
查詢: Sony( 2345 2966)

追加五軸真 4K

作為以拍片功能做主打嘅頂級無反,上代α 7S其實都拍到 4K影片,但需要外加一個記錄裝置,始終比較麻煩。今代α 7S II就能夠直接將 XAVC S格式 4K片儲存落記憶咭,而且每秒有 30格,係真 4K片,符合一般商用片嘅要求,大學生籌期買部嚟做 project,夠晒專業!不過,上代α 7S推出嗰陣,五軸防震系統已經幾普及,α 7S欠缺其實有啲落伍,好彩今代終於追加番, Sony粉絲冇嘢挑剔喇啩?但係今代同上代一樣,為咗迎合拍片需要,刻意將 Exmor CMOS有效像素減低至 1,220萬,鍾意放大「聞相」嘅人,用佢嚟影相就可能冇咁滿足。




正面睇,除咗快門同開關掣移前到手柄上,同埋手柄上個選項轉輪擺低咗之外,造型幾乎同上代一樣。


機背按鈕擺位都同上代近乎相同,只係轉輪設計有啲改變。


同期 Sony仲推出咗一系列啱α 7S II用嘅配件,包括 28-135mm恆定 f4遠攝鏡頭($19,990)、收音咪轉換器 XLR-K2M($4,990)及 5吋全高清 LCD外置顯示屏 CLM-FHD5($3,990)。 降噪能力強

講番上代已經有嘅 ISO 409600感光度,至今仍然冇其他機追得上。雖然實試見α 7S II用 ISO 409600嚟拍片嘅話,畫面始終係多 noise到接受唔到,但其實又冇乜機會喺伸手不見五指嘅環境下拍片,所以用盡 ISO 409600嘅機會唔多,通常用到 ISO 51200已經夠。反而係部機能畀人用到咁高 ISO,佢嘅降噪能力一定有番咁上下,實試發現選用 ISO 25600以下嚟拍片, noise都在可接受水平,降噪功能好掂!另一方面,α 7S II仲新增支援近年新興嘅 S-Log3記錄方式,影片畫面可達 14級動態範圍,能提供更好嘅光暗位同色彩表現。




實試開盡 ISO 409600試拍,喺近乎全黑嘅箱入面架車仔都會影到光猛到有啲 over。


今代機頂多咗 1個自定功能按鈕,令全機總數變成 4個( C1至 C4),操控更就手。


對焦點由上代 25個,大幅增加至 169個,亦係α 7S II嘅一大改進。對焦點細粒好多,對焦就準好多! 試片

新機搶先到港,發布會依例冇得帶走試片同試相,睇住官方 sample先。 4K片唔只細緻到連中間個人啲白頭髮都睇到層次,用 ISO 102400去拍,成個畫面仲比左上角嘅真實現場光勁多,本來連間屋都睇唔到㗎!

試相

呢張暗拍相唔只睇到樹木嘅層次,細微樹葉啲 datail都好出,而且用到 ISO 3200去影, noise都唔算多。

撰文:陳兆奇
攝影:陳子禮

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()