(右) Ben. 27歲.城大市場營銷學系畢業,創業為養家!(左) Richard. 27歲.港大文學院畢業,創業自食其力!

年輕有夢

喝一杯友情果汁

Ads by Google

不是最好的時光裏有朋友;而是朋友在,才有最好的時光!
棲身油麻地港鐵站出口旁的外賣果汁店「角落廚房」,由兩名八十後 Ben和 Richard主持,二人相識十數載,同撈同煲,合作縱有拗撬都毋忘初衷。

「我哋有共識,就是開始時兩個人,將來就算執笠,都係兩個人。」 Ben說。 Richard也斬釘截鐵:「輸就一齊輸,贏就一齊贏!」頗有古時結拜兄弟「不求同生,但求同死」的味道。

二人自中三便是同班同學,彼此投契,有福同享,互相分憂。「我唔記得帶擦膠,佢會切斷半嚿擦膠畀我;考試溫書,佢識嘅一定教,冇收埋!」 Richard說。
升讀大學, Richard在港大唸中國研究, Ben在城大唸 marketing,各奔前程,畢業後又再走在一起。「當時阿 Ben已經喺鴻福堂做門市營運,佢引薦埋我入去。佢介紹,我一定信,咁就一齊做嘢!」 Richard憶道。
在鴻福堂四年,工作穩定,比較敢衝的 Ben想突破。「我一向想創業,大學課餘試過喺大陸運啲書嚟香港賺錢。到出嚟打工,工餘又去啲商場攤位賣模型,雖然每個月只賺到一千蚊,但攞到嘅經驗就好寶貴!」 Ben說。




雪櫃內有廿款生果供選擇。


用韓國慢磨機榨汁,時間略長,客人要多等兩三分鐘。


兩人的奮鬥目標,現時離目標尚遠,仍需努力!

Richard很欣賞 Ben的決心,索性辭掉工作和他合作開果汁店。「做果汁簡簡單單,唔使特別技術,只要生果新鮮就得,所以揀喺油麻地果欄附近開。」 Ben解釋。
二人性格迥異。 Ben能言擅辯,點子多,反應快。小店開了三個月,經常轉產品。客人對紅肉火龍果汁不太接受,速速不賣。夏天出過綠茶、蘋果批味雞蛋仔,入秋又變陣,推出茶葉蛋。近日電鑽西瓜大受歡迎,遲一點冬天西瓜不當造,便改推燒粟米。「做小店,唔同大公司樣樣要開會決定,到決定咗,個潮流已經轉,我哋可以果斷啲!」 Ben說。
Richard卻是個慢郎中,為人謹慎細心。他主張用價錢比快速榨汁機貴幾倍的韓國慢磨機,不但榨取更多果汁,並能保留生果的營養和原味。開店前他花了許多時間配搭不同的果汁組合。「啤梨、蘋果溝雪梨榨汁味最好。菠蘿、橙加西柚,西柚味就太搶,西柚分量要少一啲。五青汁嘅青椒、西芹同苦瓜,味道比較濃,要校啱分量,加埋青蘋果、青瓜,榨汁至好飲。」




Richard(紅圈)和 Ben(藍圈)中三起已是老友。


他們每天都到附近果欄選擇生果。

開店後 Richard不時在附近派傳單,兼送外賣。一般惠顧四杯才送,但不少客加點嘴頭,他又心軟,一杯都送。「得閒嘅話,無計啦!」
處事大不同,縱是多年老友,亦經常「擦出火花」, Ben搶着說︰「佢做嘢慢吞吞,啲客等得唔耐煩會走!佢要快啲,先追到啲生意!」
「佢做嘢求求其其,好似趕收鋪,試過啲生果唔記得放入雪櫃,到第二朝壞晒要丟!」 Richard不忿。
這類衝突,時有發生。還好,他們始終互助多過互責,收鋪後在店外透啖氣,東拉西扯,氣氛就緩和了。「而家相處時間長咗,了解更多,建立默契,工作愈嚟愈順暢,生意亦漸上軌道。」 Ben鬆一口氣。
這份友情與相知,根植少年時,憑着對夢想的熱情,在同一個角度追尋,取長補短,完美平衡了這段深厚的友情。




啤梨蘋果雪梨汁$25


電鑽西瓜汁$28用新疆小西瓜,新鮮即開,即以電鑽插入果肉中攪汁,清甜多汁。

撰文:孟惠良
攝影:李日進

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()