瑜伽導師 Agnes半月式:透過腹部肌肉用力控制平衡,具瘦肚腩與修腰的效果。

職刻十大

OL秋冬減肥 10法

Ads by Google

中秋節剛過,又要準備踏入打邊爐、 BBQ旺季,但雞翼、肥牛食得多,一個冬天分分鐘肥 10磅、 8磅。正所謂預防勝於治療,《職刻十大》趁秋風剛起,為各位打工仔準備好 10個秋冬減肥免增磅的妙法,讓大家窈窕過冬。

1. Yoga Bou減肚腩

Alive Yoga創會導師 Agnes指出, OL因經常坐在辦公室,脂肪容易在腰間積聚,造成小肚腩,「 OL運動少,柔軟度未必咁好,可以嘗試 Yoga Bou,用一支瑜伽棒輔助,配合各種伸展、平衡嘅動作,達到瘦肚、瘦腰嘅效果。」
查詢: Alive Yoga@facebook

2.空中瑜伽通淋巴


衣架側彎式:拉動後腰、前腿四頭肌,通淋巴去水腫,減到平時好難減的大脾位。

Agnes指若想快速修身,可選擇進行空中瑜伽,「空中瑜伽嘅伸展強度較大,配合拉扯大脾嘅動作,可以通淋巴去水腫,最適合平日好少郁動到大脾、 pat pat等肌肉嘅 OL,如果每星期做兩次, 1個月就可以改善臀部大腿線條。」

3.注意站姿


腰背一挺直,同肚腩講 bye bye! 網上圖片

Agnes提醒要減走肚腩,平日要注意站姿,「唔少打工仔有駝背嘅情況,好容易積聚小肚腩,記住脊骨要保持垂直,腰部挺直,感覺似有人喺頭頂扯直你行,持之而恆,預防肚腩仔好有效。」

4.抵冷消脂


秋冬氣溫下降,有利減肥消脂。 網上圖片

秋冬風大,大家不想吃西北風,寧願留在溫暖的室內。其實在寒冷環境下消耗的熱量比在溫暖環境中要高很多,所以在 office不要着太多衫,保持交感神經活躍,有助秋冬減脂。

5.浸熱水浴


浸熱水浴不要超過 15分鐘,以免暈到。 《壹週刊》圖片

浸熱水浴絕對是秋冬減肥最輕鬆的方法,因可加快新陳代謝,在最不容易出汗的季節出一身汗,燃燒多餘的脂肪。如果家中沒有浴缸,可以浸腳代替,但熱水要至小腿。

6. BBQ用天然醃料

秋風起,最適合一班同事去 BBQ,健諾營養中心營養顧問 Angela表示, BBQ時要注意醃料的選擇,「避免用燒烤醬等現成醬料去醃肉,因為油、鹽、糖成分好高,不知不覺間吸收過多熱量。醃豬扒、牛扒,可以選用天然、冇經加工嘅香料,例如黑胡椒粒、羅勒、百里香等,燒出嚟都一樣咁香,又冇咁高熱量。」
查詢: mailto:health-max.org




營養顧問Angela


除了要用天然香料醃肉外, BBQ時可多燒蔬菜,翠肉瓜是個好選擇。 7.打邊爐要按次序


打邊爐烚菜先,可令湯底保持清淡,避免其他食材吸收油脂。

天氣開始轉涼,又到了打邊爐的好時機, Angela提醒打邊爐烚食物時要按次序,「大家打邊爐,第一時間會烚肥牛,但一片肥牛有 1至 2茶匙油,我哋每日只需 6茶匙油,即係食幾片就超晒標。所以打邊爐應該先食一轉菜,再烚少少肉,然後盡快食啲烏冬。澱粉易飽肚,可避色食過多嘅肉類。」

8.熱飲減食慾


薄荷葉薑蜜,潤喉又可減食慾。 《飲食男女》圖片

氣溫下降,大家會覺得需要更多 energy,食多餐, Angela提議可以熱飲減食慾,「天氣凍,成日覺得要食飽啲去保暖,但每餐食到飽一飽,好容易吸收過多熱量,令體重增加。可以用薄荷葉、薑、蜜糖,加熱水沖嚟飲,暖吓個胃,冇咁易肚餓。」

9.自製 energy bar


Energy bar製作方法簡單, 30分鐘就搞掂。

在公司經常口痕想食零食, Angela建議可自製 energy bar代替,「將燕麥焗碎,再將牛油、糖、蜜糖煮溶成焦糖,最後將燕麥同焦糖撈勻,攤凍凝固就食得,適合帶返去公司當零食。」

10.乳酪通便


乳酪熱量較低,是減肥救星。

宿便相信是不少 OL的煩惱, Angela指乳酪所含的乳酸菌可幫助腸部蠕動,「用冇糖脫脂嘅乳酪,加蘋果、無花果、奇異果一齊攪勻,當中嘅乳酸菌同纖維可幫助排宿便,每日早餐時可飲一杯。」

撰文、攝影:杜曉婷
部分相片由受訪者提供

tvb4life 發表在 痞客邦 留言(0) 人氣()