專題 Log In

日系微縮 SUV起風雲  Honda Vezel& Mitsubishi ASX

Ads by Google

無可否認, SUV市場已被歐洲強豪完全佔據,大、中、小,甚至超豪 SUV,歐洲車廠都有推出,日本車廠真係完全冇力招架。不過,你有你大堆頭玩晒,我有我嘅生存空間,日本車廠最耍家就係玩細車,所以比歐洲小型 SUV更細嘅微縮 SUV仲有市場!你睇 Mitsubishi ASX賣咗 4年都未轉款,就知有得做!最近 Honda仲引入車身同引擎再細啲嘅 Vezel,結合跑車線條、先進車廂設備、更重要係慳油前驅設定,睇嚟日系微縮 SUV市場即將火熱!




兩部車體積非常接近,但講到車身線條,都係 Vezel(左)有型啲。

Honda代理今年忙到唔停手,因為 Vezel已經係今年繼 Stepwgn同 Jade之後第 3款新車。令到代理積極引入,當然有其吸引之處, Vezel由外表至車內設備都夠晒潮,後生仔都唔會話佢老土。而且 Vezel除喺日本同香港市場以外,其實以 HR-V相稱!無錯, Vezel就係 90年代尾紅到發紫嘅 HR-V後繼車,中坑們係咪有無限回憶呢?

流線形扮 Coupe

ASX推出咗 4年,個外表都唔使多介紹,擁有一貫 Mitsubishi嘅硬朗線條,車頭同車尾都頗簡潔,粗獷味十足,而且望落比 Vezel大好多。事實上 ASX同 Vezel嘅車長分別係 4,295mm及 4,294mm,幾乎一樣!比好多動軋都超過 4,400mm嘅歐洲 SUV更短小。 Vezel車身闊 1,770mm、高 1,605mm,同 ASX都非常接近,不過軸距就只有 2,610mm,短過 ASX 60mm,全因 Vezel底盤蛻變自 Jazz,大極有個譜,只有靠設計人員動動腦筋喺車廂變戲法。
Vezel同 ASX推出時間唔同,外表上 Vezel無可否認比較新潮,車身有明顯上揚嘅坑紋,由前輪沙板伸延至車尾揭背,而且後座門用上「 Aero Door」設計,開門手把隱藏喺 C柱位,扮到好似雙門 Coupe咁!雖然車形似跑車,但 Vezel下半部連 4輪沙板邊都用防花黑色塑膠,有返啲 SUV嘅粗獷味,同十幾年前嘅初代 HR-V有好大分別。




頂級 EX版會有 LED頭燈及泵把射燈,醒神啲!


就係呢個隱藏式後座門手把,令 Vezel車身更似 Coupe。


立體尾燈覆蓋至尾門上,外表唔單調,有跑味! 泰製有好嘢

Honda代理好老實,未試車已話畀筆者知 Vezel係「 Made in Thailand」,本來期望唔大,因為以往泰製日本車多數設備同手工唔及日本製,但 Vezel會令用家改觀。測試車為頂級 EX版本,全車採用原廠真皮座位,質素同 ASX嘅日本真皮冇分別,而且局部位置有透氣孔,絕非土炮嘢可比。對比整個駕駛艙, Vezel設計都有近 1、 2年 Honda嘅最高規格,中控台有原廠彩色 touch mon.,絕非本港後加貨色。而且冷氣都係 touch mon.控制,同廠只有最高級 Odyssey採用。雖然 ASX都用 touch mon.機頭,但就只限於操作音響及泊車鏡頭,而 Vezel呢套就堅得多,有晒原廠泊車前感應及後鏡頭,仲可以無線接駁用家 iPhone,除傳輸音響外,更可利用軚盤上嘅語音掣操作 Siri,講句:「今日咩天氣?」即時資訊垂手可得,好多歐洲高級 SUV都冇呢個功能!
除咗多媒體系統夠 in, Vezel嘅迫力系統都全面電子化,罕有地配用貴價歐洲車先用嘅電子泊車手掣,而且有埋 Auto Brake Hold功能,方便到暈! ASX就冇電子泊車手掣同 Auto Brake Hold,只用傳統手掣,不過 ASX以唔到 23萬車價,竟然有埋電子控制四驅系統!簡直係賣大包!




Vezel表板以速度表為中心,而且外圍嘅光圈可以轉色。


又電子泊車手掣,又 Auto Brake Hold, Vezel喺同級中都非常前衞。


接上 iPhone後,只需按軚盤後嘅語音掣,就可以用 Siri功能。


中控台所有操作掣都係 touch mon., hi-tech到暈。


ASX中控台 touch mon.只可操作音響,設定車輛系統就要用表板中央嘅彩 mon.。


ASX有「 AS&G」功能,即係停車自動熄匙系統, Vezel都冇。


雖然車內座位空間運用唔算最好,但 ASX呢個天幕實在屈機!


ASX嘅駕駛艙比較平實,冇 Vezel咁多花巧嘢。 車廂各有高低

雖然 Vezel底盤出自 Jazz,但坐入車廂發覺空間比 ASX略勝一籌,全因座位比較低,而且後座地台凸槽較矮,腳部有更好伸展空間。此外, Vezel好多設計都房車化,例如望落好似高大嘅車身,其實地台離地只有 185mm,唔會好似一般 SUV咁難上落車。座位變法都參照咗 Jazz,後座可以翻摺成平坦儲物空間外,坐墊仲可以向上翻起,令盆栽一類高身物件可以擺入後座地台,十分好用嘅功能!
講空間嘅運用, ASX實輸畀 Vezel,但 ASX嘅硬件設備又齊料得過份!電動前座、停車自動熄匙系統、最堅係車仔細細都有玻璃天幕車頂!令到車廂視覺空間感比 Vezel強得多!揸住車都可以享受日光。




Vezel嘅後座可以摺平,亦可以翻起坐墊,擺放唔同 size及形狀嘅嘢都咁方便。





Vezel後座坐墊較大,對大腿有更好承托。


雖然泰國生產,但座椅用料都唔差,真皮表面有大量透氣孔。


ASX後座空間唔及 Vezel,尤其頭部空間一般。


車仔細細又平價, ASX前座竟然有電動調校,超班!


ASX後座只得摺平功能,好彩仲有 60:40分割,靈活性尚可。 駕駛取向各異

老實講, SUV本身就係一款扮越野車嘅揭背車,求其設計到高頭馬,加多份四驅系統,就可以話係 SUV。不過近年 SUV定義愈來愈廣,離地唔夠高、冇四驅都可以係 SUV, Vezel就係例子。來港版本 Vezel配 1.5公升直四引擎,有 120匹馬力,心水清嘅 Honda迷就知呢副引擎唔係 Jazz 1.5 RS嗰副,而係嚟自 7座位 Freed!由於馬力及扭力都只係剛好夠用,如再配四驅系統,只會加重負擔,而且香港地幾何需要用上四驅?所以前驅 Vezel實在係明智!而實際試車, Vezel冇四驅車嘅笨重及 SUV高車身擺動,行車就好似 Jazz咁爽快!波箱採用 Honda廣泛應用嘅 CVT無段變速,可以喺軚盤操作 7速+/-模式,都算有啲小跑車味道。更重要係軚感比 ASX更實在、轉向比例快得多,有 Honda一貫特色。
ASX用上 1.8公升引擎,馬力及扭力輸出分別比 Vezel多 19匹及 2.7kgm,但由於車身都比 Vezel重 266kg,可以話完全冇着數!加速力比 Vezel慢少少,而且行車感覺以舒適取向為主,軚感唔夠 Vezel直接了當,似房車咁輕柔,如果後生仔揸 ASX,或者會嫌佢太正路,少咗份激情。




ASX嘅 139匹、 1.8公升引擎亦都用喺 Lancer上,但 ASX車身更重,加速同 Vezel差唔多。


無段變速波箱有+/﹣模式,而且可以喺波棍或軚盤操作。


四驅系統可以撳 1個掣就隨意切換,方便!


Vezel引擎來自 Freed,有 120匹馬力,表現唔算差,如換上 Jade都用嘅 150匹、 1.5公升 turbo引擎當然更爆!


無段變速波箱已成為 Honda細車最常用設定,優點係運作暢順自然,而且有助減低油耗。


Vezel嘅 7速+/-模式只可以喺軚盤撥片上操作!





絕跡 9年 Honda HR-V

Vezel即係第 2代 HR-V,你仲記唔記得佢? 1998年至 2006年推出嘅初代 HR-V外表極之搶眼,方形車尾加上車頭成隻快艇咁,當年吸引到唔少後生仔入手,而且最型係設有 5門及 3門版,要實用或玩靚樣都得。當年嘅 HR-V只有 1.6公升引擎選擇,前期版有 105匹馬力,尾期就有 125匹馬力, 1998年新車價$159,000。



Honda Vezel 1.5 EX Spec.
引擎: 1,497c.c.直四
馬力: 120ps/6,600rpm
扭力: 14.8kgm/4,600rpm
傳動:無段變速自動、附+/-模式
車身: 4,294× 1,772× 1,605( mm)
軸距: 2,610mm
車重: 1,224kg
耗油: 15.8km/L
車價:$248,882
查詢:合群汽車( 2827 8622)




睇兩部車車頭設計, ASX(右)明顯較簡單,而且粗獷得多。

Mitsubishi ASX Spec.
引擎: 1,798c.c.直四
馬力: 139ps/6,000rpm
扭力: 17.5kgm/4,200rpm
傳動:無段變速自動、附+/-模式
車身: 4,295× 1,770× 1,625( mm)
軸距: 2,670mm
車重: 1,490kg
耗油: 15.1km/L
車價:$228,800
查詢:環宇汽車( 3913 8080)

撰文:袁國基
攝影:葉偉豪

文章標籤

tvb4life 發表在 痞客邦 留言(0) 人氣()