壹號幹線

燒賣大戰珍珠雞  Honda Vezel Hyundai Tucson

Ads by Google

閣下飲開茶的話,必定會留意到,小點,已近乎名存實亡,揀得入口的,分分鐘不出三項;想好食,又要實惠,就要向中點埋手。
有人愛燒賣,貪佢夠傳統,細件夠「的骰」,而且用料亦相對地高級點。亦有茶客鍾情珍珠雞,食材雖談不上矜貴,不過大大隻又熱辣辣,最為飽肚。
話題轉回車上,兩部新登場「中點」 SUV,同價不同餡,哪部才是你口味?食完話你知。

Honda Vezel

Vezel雖是全新車系,但其實並不陌生,歐洲版便以曾輸港( 99-04年)的 HR-V命名,而 Vezel則源於寶石切割面 Bezel,喻指線條有 coupé神韻,再混合 Vehicle之意,便成為原創車名 Vezel。另外,新車由 Jazz底盤改建而成,而香港引入版本全屬泰國廠房生產,根據往績,質量靠得住。



當 Stepwgn同 Jade都採用 1.5公升 turbo機器( 150匹), Vezel這台只靠「自然呼吸」的 120匹 1.5公升引擎難免會被比下去。不過實際踩落原來好生猛,起步零猶豫,亦都好肯去高轉區發展,稍要挑剔是無段變速波箱工作聲浪明顯,不過其實大把同類產品比佢更嘈,當自我安慰啦!

沒有 turbo的點五仔

售價:$248,880( EX版)
引擎: 1497c.c.,直 4;前置,前輪帶動;自然吸氣
馬力: 120匹/ 6,600rpm
扭力: 14.8kgm/ 4600rpm
波箱:無段變速(附+/-模式)
長/闊/高: 4294mm/ 1772mm/ 1605mm
重量: 1224kg
耗油量: 15.8km/L(日本國土交通省測計模式)
查詢:合群汽車有限公司
網址: http://www.honda.com.hk 
讚一讚:外形有新鮮感,設備好齊;出奇夠力,出奇幾好揸。
彈一彈:欠缺天窗;波箱運轉聲明顯。

Hyundai Tucson

來到第三代,用脫胎換骨來形容,雖然好老土,之不過的確是事實,結構上有 51%採用超高強度鋼材,講硬淨,比上代增加 33%,講到天花龍鳳,感受最實際,的而且確,俾到駕駛者信心,揸落馬步夠紮實,其實,新 Tucson跟姊妹廠 KIA最新 Sportage,共用同一底盤,就連外形亦九成九相似,分別是新 Sportage仲未知幾時到港,本着早買早享受的原理,你懂的。



直 4汽缸引擎, 155匹馬力,推動近 1500kg車身,叫做合情合理,以 SUV性格計,反應對辦,加上剛性增強,快車感覺夠實在,但要知道 Tucson身懷 2.0公升引擎,雖然有表現,不過每年牌費,就無得慳,的確,針無兩頭利。

賣力又賣樣

售價:$268,000( Premium版)
引擎: 1999c.c.,直 4;前置,前輪帶動;自然吸氣
馬力: 155匹/ 6200rpm
扭力: 19.6kgm/ 4000rpm
波箱: 6前速自動(附+/-模式)
長/闊/高: 4475mm/ 1850 mm/ 1660mm
重量: 1540kg
耗油量: 7.9L/100km(公路及市區綜合計算模式)
查詢: Hyundai HK
網址: http://www.hyundai.com.hk 
讚一讚:外形靚、空間足,加上不算少的設備,以基本版 22萬 8千計,真心對得住價錢。
彈一彈:當 1.5公升 turbo引擎滿街走,新 Tucson仍然攬住台 2.0公升,慳車價貴牌費。

Honda Vezel

車廂裝潢擺明針對後生仔,設計有科幻味,留意中控台及門壁上的繡線其實是「扮皮」的塑膠壓紋,不過像真度高,呃到人。更值得關注其實是設備好齊料,廿幾萬車居然有電子手掣及 hold掣(紅圈),而且冷氣及音響操作同樣為輕觸式,印象分大加。



「座椅變身」從來都是本田強項,遇着高大物件(如桃花、鞋櫃),只要抽起後坐墊,總有辦法幫到你。



儀錶純粹提供行車資訊,基本上全無設計特色可言,全車最悶蛋部分。



原裝後鏡能切換三種闊窄視野角度,兼具扭軚線位顯示,必定比「土炮」產品高好多。

棍槽有類似法拉利的懸浮式設計,一來美觀,二來又可騰出更多地方放雜物以及齊整地「安置」大量插槽( 12V× 1、 USB× 2、 HDMI× 1),雖然係有抄襲成分,但今次,我原諒你。







醒多句

Vezel共分 LX及設備較齊的 EX版,分別在於多添了雙 LED日行燈、真皮座椅、前泊車 sensor、側氣囊、霧燈、定速等設備,售價「只相差」$20,000,唔使諗喇,肯定買 EX版最明智。

Hyundai Tucson

始終屬於抵玩級 SUV,不應該期望跟車會有大量皮革或桃木裝飾,反而整體設計更值得細睇,立體多層次設計,賣相夠穩陣,起碼男女都 buy。多功能軚盤揸落手位亦恰到好處(如果有撥片,駕駛樂趣更高),中控台按鈕排列清楚,易用,唯獨中央屏幕實在太孤寒,認真「好慳唔慳」,抵打。



頂級 Premium版本,抬頭望望,超大天窗的確令人身心舒暢,睇「超級月亮」肯定好過癮,就算後座亦可以受惠,加上兩側裝有閱讀燈,其實做後座乘客,都幾舒服。



中控台屏幕細,泊車點算?好彩車廠細心,睹後鏡內其實暗藏小屏幕,轉去後波就自動啟動,加上睹後鏡具有防眩光功能,夠實用。



「兩圓一方」的儀錶板,無論歐、日、韓車廠都樂於採用,優點:一睇就明,上手無難度;缺點:無新意,換完車等於無換。



雖然新 Tuscon採用前輪帶動設定,但亦無忘其 SUV身份,設有陡坡緩降(紅圈)功能,「撈泥」或者濕地落大斜路,都可以幫到手,而三種駕駛模式( eco、 normal及 sport)就分別不大,踩深少少,效果差不多,反而欣賞加入 USB插頭外,仲有兩個 12V點煙器,駁完車 cam,仲有位插吸塵機,毋須掹來掹去。

醒多句

新 Tucson分為基本版及 Premium版,前者售價$228,000,後者$268,000,分別在於 Premium版多了天窗、電動尾門、 Keyless啟動及 18吋輪圈,計計數,基本版較着數。

Honda Vezel

斜尾、再加上將後門抽隱藏於 C柱便成為 coupé款 SUV,望落確係 sporty好多,更要讚是車架採用 G-CON力學設計,夠晒硬淨,行山路靈活,巡航又夠淡定。



EX版有原裝真皮椅,摸落質感 OK,但當然不可太貪心要電動調校啦。另外,本田已全面放棄天窗(因日本需求低),愛「同陽光玩遊戲」的話,只好無奈妥協。



後座腳位闊落得可怕,全平地台好讓中央乘客都坐得舒服, coupé式斜頂又沒有頂頭情況出現,真心佩服。



尾箱離地距僅 65cm,間隔四平八穩, 6/4分割後座提升容量更加是 SUV的「指定動作」。

Hyundai Tucson


如果數新 Tucson「靚仔位」,一對車尾燈,絕對可以高票當選,造型異常醒目,配合全車「起晒角」風格,襯得好好睇。試車當日,風雨交加,風聲、雨聲加外間車聲,但身處車內,竟然相當寧靜,查實車廠暗地開動「靜音計劃」,所有柱位同地台加入高密度隔音棉,愛靚聲,先天環境已在眼前,放心投資,換套靚音響。



廿萬出頭價錢買部 SUV,有全車皮椅,話你知仲有電動功能,感覺好超然?查實得司機位有電動,不過坐得舒服,已經合格,無將貨就價,所以總括來講,依然,對得住個價錢。



就算上代 Tucson,後座空間都極少被人投訴,今代繼續保持傳統,就算六呎幾高,頭部同腳部空間亦不會叫你好屈就。



無空間,點叫得做 SUV,問題只在乎是「好大」定「勁大」,而 Tucson則可列入「好大」一族, 513公升,放盡椅背則有 1503公升,要挑剔的話,就嫌椅背放低時未能做到百分百平坦,一般使用,無問題。

撰文:廖宏俊、劉耀祥
攝影:方保山
攝錄:羅錦波、徐柏然
mailto:features.nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()