壹科林

iPhone 6s仲有隱藏功能!換機嗎?

Ads by Google

iPhone 6s同 iPhone 6s Plus(下簡稱 iPhone 6s)開賣,有人歡喜有人愁,前者毋須再等足幾個月就買到新機,後者炒價炒極都無起色。不過,對於不少「中游」用家,仍然心大心細,始終外形睇落無太大變化,規格亦都未算太突出,就算新加入 1200萬像素相機同 3D Touch等新功能,都未夠理由換機。
其實今次推出的新機,仲有隱藏功能未被發掘,睇完,可能會令你心動。

原來防水?

雖然 iPhone 6s一路都無提過具有防水功能,但原來就算手機不慎跌落水或者被水淋濕,依然行得走得。有外國網站更加做測試,將部 iPhone 6s放入水,浸住超過 45分鐘都無事。當然,放入水無事,並不代表百分百防水,有可能是機身裝嵌功夫做得好,令到機身不易入水,始終,官方無講明防水,如果因入水出事,都有機會失去保養,但起碼最低限度就算跌落水,都仲有時間做備份資料,先最重要。




開住計時器,無花無假浸足超過 45分鐘,仍然幫你計時。


拎上水,機都未抹乾,一樣操作正常。 濕水都用到?

自從 Apple為 iPhone加入 Touch ID(指紋識別功能)後,好多用家都 buy,因為識別速度快而準,但對於有大量手汗或者手濕的人,就未必用得到,因水會導電,令指紋感應器感應能力降低,無法開機。而今次用在 iPhone 6s的 Touch ID,已經是第二代,敏感度大幅提高,令識別速度比 iPhone 6更快之外,就算濕手都一樣識別到,方便好多。




老實講,手指全濕都認不到,不過少少濕就無問題。


第二代的 Touch ID反應快過一代好多,㩒掣、開機,幾乎同步搞掂。 鋁合金夠硬?

好多人都話 iPhone 6s同 iPhone 6外形分別不大,極其量就多款玫瑰金色,查實,機殼物料都有分別。之前 iPhone 6,主要使用 6000系列的鋁合金製作,而新機則改用 7000糸列鋁合金。兩者有什麼分別?最重要當然是硬度,因為 7000系列比 6000系列可承受多一倍的壓力。之前有人試用徒手可以將 iPhone 6拗彎,而 iPhone 6s則最少要兩個人先得,而根據測試,新機最多可承受 60磅壓力,放在褲袋都不容易變「曲芒」。




一個人拗到手痛都無反應,即刻搵多個同事幫手。


兩人出盡力先可以拗得彎部 iPhone 6s,想在女士們面前扮型拗電話,應該無可能。 自拍屏補光?

好多女仔都鍾意玩自拍,所以不少 Android機都力谷自拍功能有幾勁。而 iPhone 6s自拍能力亦有 upgrade,由 120萬像素,升級到 500萬像素之外,其實仲有一個自拍補光燈功能( Retina Flash)。自拍補光燈?睇勻機面都無燈,點用?只要轉用前相機,開啟補光燈功能,當影相時,屏幕會快速變白色,並發出三倍光度進行補光,補光效果亦相當自然。而除了自拍,亦都可以用來影食物,就最適合。




Retina Flash的光度都幾高,全黑環境之下,都夠光。


無用 Retina Flash,雖然光度自然,不過主體就變得好平淡。

撰文:蘆甘
攝影:徐柏然
mailto:features.nextmedia.com

文章標籤

tvb4life 發表在 痞客邦 留言(0) 人氣()