眾人諸事

港大校委捉鬼 劉麥嘉軒收手機

Ads by Google

話說港大校委會每次討論副校長任命事宜,記者都有辦法報導會議內容,聽聞有校委覺得不滿,聲稱窒礙自由討論。知情人士透露, 689委任嘅校委、行會成員李國章,一顯沙皇本色,想喺八月底嘅會議玩「捉鬼」,要求 check委員手機 message,最後因私隱問題未能得逞。

去到九月底嘅會議,另一校委劉麥嘉軒早有準備,要求所有人交出手機,用膠袋一次過裝住,交俾保安看管,務求令到冇人可以洩密,但唔知點解盧寵茂嘅平板電腦又唔使收埋,厚此薄彼。
不過,呢個年代仲有紙有筆,學生會會長馮敬恩當考公開試咁狂抄 notes,但忙中有錯,唔覺意抄錯陳坤耀發言,所以馮敬恩開記招公開各委員反對副校長任命嘅理據,只有陳坤耀作出反駁,其他人只係指責馮敬恩洩密,係咪變相承認洩密內容係事實?

本土派騎劫音樂人

揚琴老師龍文慧早前網上號召大批音樂人上星期六去大圍站,帶埋佢哋嘅大型樂器入閘,甚至喺站入面演奏。點知佢連本土派都號召埋,熱血公民成員鄭松泰、四眼哥哥、美國隊長等人都到場示威,乘機反水貨客。
本土派仲一度追擊一個大陸人,困住佢喺𨋢入面,最後要警方出面調停。
對住班咁激進嘅本土派,成班音樂人呆晒,只能企埋一邊,有人見情況混亂唔敢入閘。難怪龍文慧一臉無奈咁話,大家都有眼睇個活動有冇俾人騎劫,唔使佢多講。好彩班本土派之後轉戰沙田,音樂人先有機會攞番個場,喺站入面演奏唱歌。




幾十位市民帶樂器入大圍站內表演,點知引埋龍獅旗入場,差啲搞到變咗光復行動。(郭永強攝)


龍文慧本來以為搞個港鐵音樂會抗衡港鐵霸權,點知被本土派騎劫,唔怪之得全程嬲爆爆。(郭永強攝) 大班遙距撐煲呔


大班(右)一向同煲呔老友鬼鬼,今次煲呔出事,大班話曾先生「過去三年」飽受人格謀殺。(《蘋果日報》圖片)

前特首曾蔭權地位唔夠超然,週一俾廉署落案起訴兩項公職人員行為失當罪。有「煲呔針」之稱嘅大班鄭經翰,係煲呔嘅知心好友,亦係當時涉案嘅雄濤廣播(現稱香港數碼廣播)股東之一,絕對係煲呔同雄濤主要股東黃楚標嘅「 mutual friend」。
大班同煲呔有非一般交情係公開秘密,依家煲呔落難,可惜大班飛咗去加拿大,冇辦法親自力撐,唔知心中會唔會有遺憾呢?大班以短訊回覆記者,話佢絕對相信煲呔嘅品格,亦對今次「政治檢控」事件感到不安同遺憾,「曾先生過去三年飽受精神滋擾及人格謀殺、非外人所能道。」佢仲話雖然佢唔係教徒,但希望煲呔虔誠信奉嘅主會保佑呢個好友。

李輝心繫北京


李輝喺北京師範大學畢業,廣東話唔係講得好正,佢出席《城市論壇》時將「涵養」講咗成「痕癢」,全場聽到側晒耳。(莫智謙攝)

港大教育學院副教授李輝連環批評陳文敏,理據要幾騎呢有幾騎呢,包括自稱學術上「影響因子係陳文敏二百倍」,所以呢排爆紅。週日《城市論壇》結束後,記者同李輝交換卡片兼想做訪問,但佢直接話:「《壹週刊》,唔做喇!你引用我台上講嘅嘢啦!」
根據港大教育學院網頁,李輝喺北京師範大學攞咗學士同教育碩士學位。一九九七年來港修讀博士課程,畢業後留校任教,專門研究幼兒教育,不時返母校開講座搞研討會。現時佢係免費幼稚園教育委員會屬下資助模式工作小組成員。
原來,佢緊跟北京路線已非最近嘅事,過去幾年佢一直喺 facebook高調反「反國教」、反佔中。今年八月初寫文批評學生一系列有關副校任命嘅行動,其後被指為內地人而感到不滿,反駁話香港大多數人都係內地移民,相當心繫祖國。

撰文:巫不言
插圖:詹震寰
mailto:news@nextmedia.com

tvb4life 發表在 痞客邦 留言(0) 人氣()