覺醒配音組成員輪更上班,今次只有六人亮相。一班六十後至八十後麻甩仔、麻甩佬,入行幾年至接近廿年,不怕挑機寸差佬鬧政府,講起年齡反而最扭擰。

坦白講

為核心價值配音

Ads by Google

警司朱經緯去年十一月底涉毆打途人,並以警棍是「手臂的延伸」作辯解。
八名自由身配音人,組成「覺醒配音組」,以日劇《律政狂人》片段,撰稿兼配音製作《古美門怒審朱警司》,明寸差佬講大話唔眨眼,熱爆網絡。
他們擔心劣幣驅逐良幣,謊話講一百次就當真,慨嘆自由民主太遙遠,現在要先守住「正常」價值觀。

朱警司︰「嗰支警棍,只係我手臂嘅伸延。我哋警察,就係國家權力嘅伸延。」
Benny︰配呢段對白,其實唔好笑。社會發生緊呢啲事,好多留言話一路睇一路喊,我都有呢個感覺。某程度上警察應該同我哋係朋友,係咪有問題出現咗,令警察迫於無奈做咁多嘢?
配音呢行好得意,成日困埋喺間房做嘢,好少講政治,直到近年社會氣氛令大家留意多咗時事。醒覺配音組就係講俾人聽,我哋好卑微,但配音最叻,就用配音發聲。

古美門︰「下個俾警察打嘅人……可能係你,因為你重建唔肯搬走;可能係你,因為你投訴鉛水;亦都可能係你自己,因為你知太多嘢。」
Alex︰我一直政治冷感,啲人話唔好以為唔關你事,遲啲你就知。我以前唔認同,依家好深刻。幾年前簽咗做香港電視配音員,一心諗住發牌,到最後真係關自己事。去到你嘅時候,瞓街都冇用,對方實力鞏固後,你乜都做唔到。依家自己能力範圍做到咪做囉。
啲人淨係覺得佔領係霸住條街,又唔諗吓點解要佔領。周星馳嗰套《武狀元蘇乞兒》,有句對白係皇上話丐幫弟子有幾百萬,梗係驚,蘇乞兒就話,皇上,丐幫弟子有幾多人,睇你㗎啫,你做得好,邊個想做乞兒?

法官︰「請被告喺自辯嘅時候,唔好用空泛嘅比喻。」
Kenny︰咩叫超然於三權分立?大家討論咩係超然,咩係凌駕,律政司司長叫大家唔好斷章取義,扭到盡為梁振英辯解,呢啲咪沉淪囉。擺出嚟係黑色,我話係白色,正常人聽完都擘大個口,依家竟要討論係黑定白,表態係基於立場唔係獨立思考,遲啲可能連太陽喺東邊升起都要拗。
成日話泛民或爭取民主嘅人係敵對,但佢冇你咁有權,有權嗰個你就用到盡。亮相做訪問有冇後果?聽過有員工放工後去旺角佔領,俾老闆叫入房話佢;有個做廠嘅老闆,講明唔請呢兩屆大學畢業生。我唔敢包冇後果,但……是但啦,唔出都出咗。

古美門︰「過去呢一年,每一單控告警方濫權、俾假口供、暗角打人、故意傷害他人身體,全部都告唔入。」
Raymond︰暗角七警件事,印象好深,一條咁嘅片流出,黑白好分明,竟然仲有得拗。有人覺得個示威者抵打,但究竟邊個決定邊個抵打?我以前做過副刊記者,有少少感觸,有份負責呢條新聞片嘅記者或編輯,走得就走,但點解顛倒是非嘅人可以喺呢個圈生存?
呢啲二次創作嘅片段,我負責做宣傳。上年九月配音組配完《古美門袋住先》,一擺上 YouTube冇耐就因為版權被 block,今次呢段片可能會喺訪問出街後就冇咗。




配音組今次一手包辦撰稿和配音,用《律政狂人》片段製作《古美門怒審朱警司》。有網民不滿他們明寸警察,揚言向日劇所屬公司投訴配音組侵犯版權。

古美門︰「你哋最緊要係放工返屋企有 TBB睇。」
Ken︰我配咗音咁多年, TBB先話我知,原來配音有文化差異,有啲外國文化係粵語配唔到,所以明珠台外購劇唔配音喇。我由細到大睇 TBB,你昆咗我廿幾年,真係好大打擊,頂你個肺。
今次配音,係 Kevin喺 facebook問邊個有興趣,咪有啲癲嘅、傻嘅應承囉。親朋戚友睇完條片,冇乜反應。香港人,叫佢表明立場好似係一種忌諱,唔可以揭開件衫俾個肚皮你睇。

古美門︰「呢個世界上,總係有一啲蠢人唔甘心就咁接受現實,唔顧自身嘅安危,自願走出嚟捱打。託呢班蠢人嘅福,呢個城市沉淪嘅速度比預期中慢咗少少。」
Kevin︰我負責撰稿,警察濫權呢個題材我覺得嚴重。以前示威,同警察有講有笑,反高鐵之後,我覺得係俾警察「行住」,佢哋眼神敵意好明顯,對立意識好強。
依家好需要每個小市民表態,但香港人做嘢都係希望有成效,否則冇動力去做,香港人好現實。我覺得依家香港人嘅抗爭方式,就係唔好俾人令你原有嘅價值觀崩潰,一動搖你就死。配音組唔一定講政治,我哋嚟緊想寫十一月嘅中港足球大戰,如果場波搬去小西灣球場踢,我哋一定會做條片。

撰文:袁慧妍
攝影:鄒潔珊
攝錄:郭永強
mailto:news@nextmedia.com

文章標籤

全站熱搜

tvb4life 發表在 痞客邦 留言(0) 人氣()