Super Junior成員崔始源將於 11月入伍,最後一套劇《她很漂亮》做男配角,嫌唔夠多戲份?睇番《破風》囉!

電視精

崔始源 當兵前最後爛撻

Ads by Google

2015年係好多韓迷心痛嘅一年,因為好多當紮男星都相繼入伍,朴有天、金在中、崔振赫等等,嚟到年尾,輪到 Super Junior主將崔始源!差唔多每個月都嚟香港嘅崔始源,今年 11月就要入伍當兵,最後一套臨別之作當然備受關注,佢偏偏唔做主角,喺《她很漂亮》入面做男配角,仲要搞到自己爛身爛世,暫別之前已經打破男神形象,唔通真係唔驚 fans變心?

醜小鴨 vs花美男

最近韓劇鍾意拍醫療劇同懸疑劇,好似好耐無愛情小品喜劇跑出,今次《她很漂亮》就試吓水溫,希望可以突圍而出。故事係講黃靜茵飾演嘅女主角,細個好靚好可愛,而朴敘俊飾演嘅男主角,又細粒又怕醜,點知長大後完全逆轉,朴敘俊成為高富帥,係眾人男神,相反黃靜茵家道中落,加上青春期發育,由可人兒變成滿面雀斑,一頭鬈髮嘅大嬸。二人偶然下重遇,不過身邊已經有高俊熙飾演嘅富家女,以及崔始源飾演嘅雜誌主編,四個人發展出一段錯綜複雜嘅多角戀,中間更加係笑料百出!《她很漂亮》被安排喺星期三、四出街,同檔有大熱韓劇《龍八夷》,未播出之前已經預咗做炮灰,不過開播後口碑唔錯,收視每集有升,隨着《龍八夷》即將大結局,《她很漂亮》絕對有機會做收視冠軍!




崔始源現實生活中係富二代,以前做嘅角色唔係大明星就係富家子,今次做粗獷男人,又有另一番味道,靚仔真係大晒。


黃靜茵今次形象大突破,成日飲醉酒發酒癲,難得唔討人厭,觀眾緣真係好重要。


朴敘俊同黃靜茵之前喺《愛上哪個我》入面做姊弟,今次升呢變成姊弟戀,默契十足。


犧牲色相惹共鳴

起初宣布《她很漂亮》嘅主演名單時,好多人嚇一跳:崔始源入伍前最後一套作品,揀小本製作嘅電視劇,仲要係男二?唔係吖嘛?據說佢驚 Super Junior同時間會有工作,為免兼顧唔到,寧願做男二。其實都未嘗唔係一個好嘅選擇,因為近期幾套電視劇嘅男二角色十分討好,甚至比男主角搶眼,今次崔始源要拋開佢嘅富家子形象,做不修邊幅嘅雜誌佬,經常都係恤衫牛仔褲,仲刻意留鬚,望落有啲邋遢,不過 fans們似乎幾受落,大讚佢有進步!另外一個犧牲色相嘅係女主角黃靜茵,今次要扮醜女,真係慘不忍睹,每一集都要化到成面雀斑,又要整到個頭成個雀巢咁,佢喺記者會上都投訴話想快啲變番靚!劇迷大讚黃靜茵嘅演技愈來愈好,做醜女但好想變靚嘅心情令人好有共鳴!劇中主要演員全部收貨,相信始源要風光入伍絕非難事!




朴敘俊之前一直做開男二,今次終於等到做男主角,但焦點又落晒喺崔始源身上,真係唔好彩。


高俊熙一向行型格路線,今次仲特登剪個男仔頭,同黃靜茵個爆炸頭相映成趣。

撰文:關錦雯
mailto:nextplus.nextmedia.com

tvb4life 發表在 痞客邦 留言(0) 人氣()