搵槍指住喪屍,嚇吓佢哋好喇,千祈千祈千祈唔好開槍爆佢哋頭呀!

Play House

真人《 Biohazard》 密室.喪屍.玩氣槍

Ads by Google

年年萬聖節都係去哈囉喂或者黑色世界玩鬼屋,難免少咁啲新意,做搞手幫 friend諗節目嘅話,更隨時俾人話你悶。好彩,除咗兩大主題公園同一眾商場會利用呢個商機外,呢兩年都多咗啲大家估唔到嘅地方識得食萬聖節呢個主題,提供新式應節玩意畀人玩。
就好似搞開氣槍射擊活動嘅 PTS Infinity平台,今年就喺一間工廈 war game場入面,推出名為「潛逃喪屍工廈」嘅遊戲,唔只照舊有得玩氣槍射靶,仲加入埋逃出密室嘅解謎元素,中間更加有真人喪屍乘機嚇人,帶出玩鬼屋嘅感覺,一次過滿足晒三個願望,新鮮感一定多過玩傳統鬼屋!唔想俾人話你悶?今年轉吓玩新嘢囉!

射靶趕喪屍

呢個潛逃喪屍工廈 game,成 team玩家要一齊持槍走入俾喪屍佔據咗嘅工廠,搵番 5支能夠化解屍毒嘅血清,然後解謎逃走。布景唔只 keep住一般 CQB室內射擊場嘅多障礙多暗角格局,仲要熄晒燈,再有埋失驚無神會超大聲響嘅音效,走入去堅似玩緊鬼屋。




射靶除咗係完成任務嘅其中一個動作,射得高分仲有機會上神槍手榜,贏到$300 coupon用嚟玩下次 war game添。


每局 game可同時畀 4至 10個玩家一齊玩,你同 friend唔夠 4個人嘅話,都可以 join埋其他人組成一隊。玩之前要先喺試槍區學點用槍同睇片了解劇情,幾認真!


若然射得中啲靶(喪屍誘捕器),就能減少你喺解謎過程中俾佢哋騷擾嘅機會。

唔難估到當玩家摸黑進行任務嗰陣,啲喪屍會突然彈出嚟嚇人,但係扮喪屍嘅演員都有阿媽生,千祈唔好搵氣槍射佢哋,玩家要射嘅其實係槍靶!啲槍靶被設定為喪屍誘捕器,射中就能分散喪屍注意力,等佢哋走咗去,免得佢哋阻止你搵血清同解謎。每局 game限時 20分鐘,成功逃出工廠就算贏。成個氣氛唔算好恐怖,但勝在有嘢玩同要用腦,有啲似玩緊真人版《 Biohazard》,大家就算好大膽唔怕俾喪屍嚇,都唔會有 hea行鬼屋嘅感覺。




過程中會經過幾撻布滿雜物嘅地方,過關需要嘅血清(螢光棒)好可能就係收喺雜物堆中。


要解謎搵密碼解鎖先能逃出喪屍工廠,萬一過咗限時 20分鐘都走唔甩嘅話,就會 game over俾人請離場,勁冇面。


槍火冇眼,啲喪屍失驚無神彈出嚟嚇人時始終有可能中流彈,所以同玩家一樣要戴眼鏡護眼。


現場環境勁黑,冇睇相咁光㗎,唔會估到啲喪屍喺邊度彈出嚟嚇人。 潛逃喪屍工廈

開放日期: 10月 23日至 11月 1日
開放時間: 07:00pm至 11:00pm(部分日子於 12:00mn或 09:00pm結束營業)
每節時間: 20分鐘
每節人數: 4至 10人(最少 2人同時報名)
票價:每位$100(玩 1節)
地址: Milsim CQB and Training Centre(長沙灣青山道 550至 556號恆發工業大廈 11樓全層)
查詢: PTS Infinity( 2332 7128 ext.:112)

撰文:陳兆奇
攝影:胡景禧
模特兒: Leo@UStar

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()