Webber

我係香港人 Max

Ads by Google

小學教科書都有教,香港係國際大都會,咩膚色嘅人種都會有,不過,喺香港 YouTube界入面,南亞裔人士做 YouTuber又真係好似少見啲。雖則香港人成日都話要共融、和諧,但實情好多人仲係戴住有色眼鏡睇南亞裔人士,只會覺得佢哋喺香港淨係識排 iPhone同 Jordan,咁諗法認真膚淺。
今期 Webber主角 Max,印度+巴基斯坦血統、土生土長唔係雙非、拎香港永久居民身份證,佢喺 YouTube上面,又會唔會特別多 haters?

(webber's info)
YouTube: Maxer Khan( Max)
訂閱人數:約 2,051
總 Hit Rate:約 68,626

唔想再做強姦犯


Max呢條〈《男女 ICU》港女總是無理取鬧 ft男神 BB,Amy K&霆霆〉就搵嚟其他 YouTubers合作。

Max今年 25歲,唔好睇佢𠵱家肥嘟嘟,曾幾何時都 fit到漏油,「我以前做過 freelance model、魔術師、特約演員,後來做傳銷食錯產品,做 PR時又好多應酬,搞到最肥嗰陣有成 300磅。」百足咁多爪,有冇發現共通點?就係 Max好喜歡站在人前、表演慾好強「一直都好想做幕前,但始終唔係本地人、膚色問題,就算識講廣東話,唔好話第一男主角,連男配角都冇可能做到。以前都做過電影特約、臨記,但做親啲角色唔係強姦犯就黑社會,雖然人工的確會高啲,但我又志不在此。」所以, Max就想喺 YouTube拍片自己製造機會,但佢成條路係非常有計劃,而非純粹為自捧,「想喺網上世界紅,就一定要同其他紅嘅 YouTuber合作;而我亦想靠 YouTube搵食,所以嚟緊都會想試拍廣告,因為好老實,𠵱家嘅商業係同娛樂掛鉤。」

網上世界冇歧視


Max嘅片有好多唔同類型,有一堆就主要係 unbox智能產品,仲要操流利英文,好有 market!

Max雖然年網輕輕,但對呢個世界已經睇得好透:「其實 YouTube係個全球嘅市場,我呢種膚色冇話特別吃香唔吃香,因為網民重視嘅係內容,如果網民唔鍾意一條片,係唔關膚色事!」好比近日『風頭躉』劉馬車,網民唔鍾意佢,絕對同膚色冇關係,擺明係同佢嘅行為有莫大關係!現實世界中, Max呢種膚色嘅人好易被歧視,「我想喺香港呢個地方做多啲唔同嘅嘢,所以我會努力去學廣東話,但老實講,我識有好多我呢種膚色嘅朋友,點解會俾人歧視?係因為佢哋唔肯去融入,自己都已經起咗道牆出嚟。」但網上世界就係個好誠實嘅地方,唔會因為膚色而先入為主,「我都有同過其他 YouTubers合作拍片,伍仔、不滅墨水、甜筒輝, so far網民嘅反應都係好,仲讚我搞笑同得意,網上世界冇歧視。」

香港人好標籤

Max喺香港生活咗 25年,一口流利廣東話、英文、普通話,又識講印度文,「暫時喺香港,我仲未見到有南亞裔人做 YouTuber,所以我覺得我好有優勢去行先一步。」不過佢都覺得香港人其實真係好標籤:「我自己係伊斯蘭教教徒,但因為近排 IS嘅新聞,令到好多香港人即時標籤咗所有伊斯蘭教徒都係恐怖份子。」一向好努力融入嘅 Max,喺早排佐敦地鐵站有班南亞裔人互斬嗰段時間,都曾經被人歧視:「嗰次我搭地鐵,我聽到有個媽媽同佢個大約 14, 5歲嘅仔講『你小心啲呢啲人呀,會斬人㗎!』,我當時係好嬲,但我知道我唔可以開聲,否則只會令件事惡化。」而對於港女, Max第一時間就覺得係:「成日吊高嚟賣,好多負面嘅嘢…」不過 Max相信唔係所有香港女仔都係咁,佢唔想被人標籤,亦都唔想標籤人。 Max曾經同過潮州女仔拍拖,但個女仔好貪錢;同過自己同鄉女仔拍拖,但個女仔又好傳統,所以 Max都話擇偶真係唔係靠睇膚色,最緊要係性格啱唔啱自己。




曾經有個音樂 event因為睇咗佢嘅 YouTube片而搵佢做司儀,巧勁勁呀~


Max今次拍咗條〈關於印巴藉的 5個秘密〉,想睇就快啲下載《 FACEPop》 app啦!

撰文:陳可兒
攝影:陳子禮

文章標籤

全站熱搜

tvb4life 發表在 痞客邦 留言(0) 人氣()