擁抱逝亡的思憶 蕭厲理澤

身為公關,除了要處理記者、名人及品牌要求,更要考臨場應變功夫,確實不是一件容易的事,但有「公關界始祖」之稱的蕭厲理澤(Lisa),總能把危機化成轉機,連我都要寫個服字。

Ads by Google

Lisa為已故香港殯儀大王蕭百成的太太,縱橫公關界近四十年,八三年創立利華達(Lee Wolter)公關公司做老闆,見慣Ball場大小事,更是不少紅人巨星好友。

雖然事業做到有聲有色,但四年前因丈夫患病去世,令她人生陷入低潮。提及丈夫,Lisa眼泛淚光、哽咽地說:「自從佢走咗之後,我先發覺原來自己係一個好唔稱職嘅太太,我將所有時間俾晒我啲仔女同阿媽,根本無時間陪佢,我好對佢唔住。」

逝者已矣,生者如斯。遺憾過後,堅強的Lisa,還是要走下去。

生活樂得清閒的她,懂得安排活動享受生活:「我一星期會做三次Pilates,每次做個半鐘;閒時會去行山同去超市買嘢,中、西式都識煮;最鍾意睇書,由烹飪到哲學嘅書都會睇。」

十三年前,Lisa(右一)與(左起)郭炳湘夫人、郭志怡等人,結伴出席Giorgio Armani中環開幕活動。

從來不邀請丈夫蕭百成出席公開活動的她,二十年前獲丈夫「突襲」支持:「佢喺無通知我嘅情況下,突然出現喺活動上,我好驚喜,就企定定畀傳媒影咗張相。」

縱橫公關界

出生於上海、現年六十歲的蕭厲理澤,七歲來港生活,中二時到瑞士讀書,其後再到美國唸大學修讀藝術,十九歲便與第一任丈夫結婚生仔。她坦言,一生中幾乎做所有事情,總是處於被動狀態,包括加入公關行列。

「當初係因為我第一任丈夫,返工返得唔係咁開心,我就叫佢不如辭職,由我出嚟做嘢養個仔。咁啱嗰時Cartier(卡地亞)個MD(董事總經理),已經問咗我一年有無興趣入去做嘢,我就決定入去Cartier做PR,一做就做咗七年,亦係我唯一一份長工。」

本以為經驗老到的她,離開卡地亞後,一早想另起爐灶,但Lisa表示,她根本沒打算創業,公司全是第二任丈夫蕭百成幫她創立的。「我八三年離開卡地亞,仲諗緊可以做咩之際,好多傳媒朋友都叫我開公司,但我又咩都唔識,嗰時我已經同我第二任丈夫拍緊拖,佢話佢會幫我搵律師、寫字樓、買家具,仲畀埋資金我,咩都幫我做晒,公司都幫我創立埋,咁我就開咗間公司,直到o依家。」

奀星耍大牌

從事公關界近四十年的她,看盡上流社會真面目和假面具,慨嘆所有人與事已大不如前,新一代不如舊一代。

「舊一代嘅明星例如周潤發、劉嘉玲、梁家輝等等,個個都好nice,好識做人,每次見到劉嘉玲,都好似朋友咁,好多嘢傾,反而係新嗰啲(明星)懶大牌。

「一個活動,紅星壓軸出場係好正常嘅事,梗係要其他星出場先,但細嗰啲個個都唔肯出,係要爭最遲出場嗰個,懶大牌。所以你見劉嘉玲、周潤發份人咁謙虛就係咁解,一個人愈叻,就愈有禮貌、愈謙虛!」

除了明星外,就連活動方式都跟以前相差很遠,「o依家我哋做一個event,都唔知要畀幾多錢啲天王巨星,佢哋先肯嚟。我記得以前做一個Givenchy香水活動,有周潤發、爾冬陞、張學友、阿B(鍾鎮濤),個個都come for free(免費到場)。仲做過一次有梅艷芳、翁美玲,都係一個仙都無收過,因為佢哋真心覺得個event正,所以先嚟,唔同o依家,真係時代唔同,個game已經唔同咗玩法!」

文章標籤

tvb4life 發表在 痞客邦 留言(0) 人氣()