So Comment

孝子俄國菜   WHEATFIELD 地址:銅鑼灣邊寧頓街 13-15號隆堡柏寧頓酒店 2樓 電話: 3422 8803 (乙+)

Ads by Google

你可以咁孝順嗎?
Andrew原本係 banker,父親叫「鬍鬚佬」,後生時喺銅鑼灣皇后飯店做廚,退休後最希望就係自己開自己嘅餐廳。 Andrew為咗完成父親心願,在銀行賺了些錢,決定辭工,開間餐廳畀父親打骰,自己就跟父親學做廚。你有咁孝順嗎?!我肯定無!!!

 


當你喺餐廳坐低,可能就明白 Andrew點解會咁孝順,原來佢係位虔誠基督徒。枱面啲紙都好有意思的,皮 menu都見到個十字架。
四周圍亦會見到聖經句語,酒吧啲磚亦係一些教會朋友畫的。

 

 

甲+ 全香港最正嘅羅宋湯!


食俄國豉油西餐當然第一樣係叫羅宋湯($58)啦!我同朋友時常話,而家啲羅宋湯搵笨,舊陣時如果淨叫羅宋湯,湯裏面一定有片牛肉或牛𦟌,有些闊佬啲嘅餐廳,連餐湯都有一片或一嚿仔牛肉㗎,不過近呢十幾二十年,牛肉不見了。
WHEATFIELd第一個驚喜係牛肉回歸!!!第二個驚喜係好耐無飲過咁好味嘅羅宋湯了,呢個味道正正就係兒時羅宋湯,好濃味,亦好複雜嘅味,複雜味當然係好足料啦, Andrew話一煲羅宋湯要煲兩日,煲到啲菜溶晒,第二日又要加新菜落去。上枱時重放咗幾塊紅菜頭响面,又靚又好食。「鬍鬚佬」嘅羅宋湯辣味好正!記得細時一路飲羅宋湯一路要飲水救火的!好刺激的。 Andrew話父親會炒過啲指天椒再放入一個湯袋,去畀個辣味。 WHEATFIELD嘅羅宋湯亦比較杰,原來係煲好湯後,就打爛些薯仔放落湯。我飲完一碗,食完晒 main course,心思思再叫多一碗羅宋湯飲,真係好耐無飲過咁好味嘅羅宋湯。
各位老友,我成日話我哋細個啲嘢好食,而家愈來愈無嘢好食,多謝 WHEATFIELD證實我唔係亂噏了。
其他食物有點比下去了。

雜肉拼盤$135
舊式薯仔沙律,正!

蝦多士$68/6件
還好。

iberico pork chop$250
普通

chickenà la king$150
唔好食
一碗羅宋湯已經足夠令我再次又再次又再次返去幫襯了。

WHEATFIELD

地址:銅鑼灣邊寧頓街 13-15號隆堡柏寧頓酒店 2樓
電話: 3422 8803


蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。
攝影:蘇施黃
(蘇施黃)

tvb4life 發表在 痞客邦 留言(0) 人氣()