眾人諸事

女法官擺香薰 聽審似做 Spa

Ads by Google

《壹》仔記者「游走」法庭多年,聽過亦見過唔少「老爺」、「奶奶」(男女法官暱稱)嘅趣聞,最新一宗係沙田法院有位奶奶,審案嗰陣會將兩樽香薰放喺枱面,令成個法庭香氣四溢。

 


其實法庭本身靜靜哋,又有冷氣,周不時有人瞓着,加埋啲香薰味之後,有行家形容嗰種感覺好似去咗泰國做 spa咁,好鬼 relax。有位喺粉嶺法院多年嘅奶奶個位後面,都長期擺放兩棵盆栽。兩位都係奶奶,係咪女士特別鍾意擺設?
最近屯門法院有位奶奶,一聽到人咳(注意:只係咳一聲),就會叫保安遞口罩俾佢,非常注重衞生。觀塘法院有位老爺每次聽到有人手機響,就會下令佢罰企,幾分鐘至十幾分鐘不等,再沒收手機,散庭後先可以攞番。
記者諗起十幾年前有位外籍老爺,會喺枱面擺個裝咗嘢飲嘅水晶玻璃樽,一邊審案一邊倒落杯飲,幾寫意。但有行家發現,老爺飲咗之後「紅都面晒」,懷疑嗰啲其實係酒,不過至今無從稽考。
城壇傾佔領 傅振中挑機

傅振中(左)趁廣告時段突襲廣播處副處長戴健文(右二),爭取喺記者面前曝光,最後由謝志峰(左二)出面解釋。(《蘋果日報》圖片)

佔領運動一周年,各大媒體都會做回顧系列,《城市論壇》本週日題目係「香港雨傘民主啟蒙,佔領周年政改冰封」,嘉賓包括佔中發起人陳健民、民主黨副主席尹兆堅、青年新政召集人梁頌恆,同埋城大專業進修學院學術統籌宋立功。
不過,有份開工去「示威」嘅藍絲帶傅振中,趁廣告時段搵廣播處副處長戴健文挑機,指佢哋請嘉賓太偏心,淨係請啲撐佔中嘅人,偏向建制嘅宋立功躺着也中槍,退居幕後嘅謝志峰惟有運用佢嘅影響力出嚟擋駕,話呢次只係想檢視番場運動,所以請有份參與嘅人。查實港台「一哥」梁家榮都在場,偏偏傅振中揀「二哥」嚟嘈,睇嚟佢都認為戴健文先係港台人啩。
港大校委收柯打 否決副校任命
港大校務委員會本週二開會,再次討論委任副校長。港大校友關注組呢排四出聯絡港大校委進行游說工作,發言人葉建源大呻游說嘅難度比想像中大得多,向校委發出信件同訊息,大部分「只讀不回」。
唔使問阿桂,最難接觸嘅就梗係幾位特首委任嘅校委,「姓李」嗰位大帝更只係透過秘書回覆,叫關注組搵主席梁智鴻就夠,真係好大官威。但校外校委比較親民,比較願意去傾。
葉建源仲話,有個別願意溝通嘅校委唔知係咪有難言之隱,暗示「要跟番條隊」、「要歸隊」,即係否決委任陳文敏做副校長,唔知邊個落柯打呢?

港大校友關注組發言人葉建源(右三)話游說過程中,有個別校委話要「歸隊」,否決委任副校長。(莫智謙攝)

一名由特首委任、「姓李」嘅港大校委只係透過秘書回覆港大校友關注組,稱唔得閒見面,有乜事搵番主席梁智鴻。圖為特首委任校委兼行會成員李國章。(莫智謙攝)
全新求職騙案 搵 iBank過橋

順豐速遞早排俾好多騙徒利用行騙,公司管理層都要出面澄清。

香港已經變咗詐騙之城,除咗強國人假扮中聯辦同順豐速遞行騙,最近有一款全新求職騙案。話說九月某個星期一早上,兩個後生仔上咗一間外資投資銀行,話第一日返工,人力資源部門出嚟招呼佢哋,發現公司雖然最近喺網頁刊登招聘廣告,但根本未正式請人。
兩個後生仔即刻講番成個「見工」故事。原來佢哋見到招聘廣告後,喺網上填寫求職表,冇幾耐就有人約佢哋見工,佢哋去到 iBank樓下,對方話不如改地點去附近一間咖啡店見面,「面試」過程騙徒做咗功夫,問咗好多關於呢間 iBank嘅問題,最後仲即場表示公司決定請佢哋,仲收咗每人幾百蚊「手續費」,叫佢哋某日某時去公司返工。
講完面試古仔,又知道呢間 iBank根本無請人,冇咗份工,又損失幾百蚊,兩個後生仔即刻報警求助。
撰文:巫不言
插圖:劉志誠
news@nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()