假如,平治「 C仔」代表豪華,寶馬 3系代表操控,奧迪 A4代表科技,積架如何在 XE身上找出市場定位?答案是:「集各家大成。」而初步睇,確係講得出,做得到,祝你好運!

壹號幹線

有得砌! Jaguar XES

Ads by Google

早十幾年前,積架曾開發過 X-Type,企圖挑戰一眾歐洲中小型房車強敵,結果係點?
咪等同港隊對卡塔爾一樣,有眼睇真係用盡全力,可惜技不如人,贏到掌聲,卻改變不到賽果……在大家都以為積架已無心戀戰,全新 XE卻以一副極挑釁的態度,誓要一雪前恥。
現時論成敗得失,暫時仍言之尚早,不過單睇今次 XE陣容,大可引用球評家常說的一句:「呢場,睇嚟有得砌喎!」

 


頂班價,頂班性能
售價:$809,900
引擎: 2995c.c., V型 6汽缸,機械增壓;前置,後輪驅動
馬力: 340匹/6,500rpm
扭力: 45.9kgm/4500rpm
波箱: 8速自動(附+/-模式)
長/闊/高: 4686mm/1850mm/1416mm
重量: 1635kg
0-100km/h加速: 5.1秒
極速: 275km/h
耗油量: 8.1L/100km(公路及市區綜合計算模式)
查詢:積架汽車
網址: http://www.jaguar.com.hk
讚一讚:外形有格調,眼神銳利,賣相吸引;引擎輸出狂野,車架平衡度高,操控服從性強而爽快。
彈一彈:後視野受車尾設計阻礙,必須依賴泊車鏡做「盲公竹」;後座坐姿一流,無奈空間談不上寬敞。


與 F-Type共用的 3.0公升 V6機械增壓引擎,不過基於 XE S房車身份,馬力卻被調低 40匹,扭力亦有 1.1kgm減幅,但在 Dynamic模式下,瞬間爆發力仍然是「一踩就嚟」,反應比好多 turbo機器積極,最正是 5,000rpm後再向油門催谷一樣後勁凌厲,假如喉聲再 tune得激情點,可評為完美。


以房車計,天窗面積好接近全天幕級別,可以打開,亦設有電動遮光簾,話晒高級車嘛……


全新後驅車架 75%為鋁合金結構,又輕又硬,對操控有直接得益。


前座造型吸引(頭枕有 S壓花),而且包覆能力極佳,坐得舒服又穩陣。


頭燈搞到似相機鏡頭,標明 66mmHID及 3200 lumen,眼神好銳利,配合 sharp醒 LED日行燈,睇見都流口水。


輪圈賣相頗辣,鮮紅卡鉗隱約話俾大家知:「我唔係普通車。」


一般車廂,少啲特色都未必「受得起」 two-tone(尤其是紅黑)撞色設計, XE S在此方面順利過關,個人最欣賞是伸延到門壁的環抱效果,軚盤直徑及握持感也「 fit到漏」,一坐上去,自動進入「血脈沸騰 mode」。


懸掛採用前雙搖臂結構、 50:50前後比重,攻彎能力自然不容忽視,個人最欣賞是 XE S保留到濃厚的 FR操控神髓,一切指令都能快速及忠實地傳遞至車體,轉向準繩兼具肯定性,車架承受能力強又俾到莫大信心,辣都辣得分外有品味。


有尾(箱)車好處,就是無後座翻摺功能,容量一樣極有睇頭。


後座背、側墊剪裁特別誇張,好處是提供更穩固的支撐效能,坐上去似 Egg Chair,包到實一實,係差在腳位「唔爭氣」,贏舒適,輸空間。


後中央座有大大條傳動軸槽,仲有冷氣口對正閣下「命根」,乘客們,上車前請三思。


並未採用最新「 8速波餅」,原因有待調查,下方是行車模式選擇掣,要讚是「變身後」效果毫不含糊,但最右的雪地模式(起步減弱輸出以防止跣胎),在香港就零功能。


基於安全條例,昔日頭冚上的躍豹雕塑早已被取消,換成鬼面罩上的豹浮雕,高貴格調不減。
醒多句
XE S暫時屬最頂級版,代理亦另輸入「較入門」的 Prestige及 R-Sport版,採用 2.0公升 turbo引擎,輸出 200及 240匹,售價分別為$479,900及$609,900。
撰文:廖宏俊
攝影:方保山
攝錄:羅錦波、徐柏然
features.nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()