佔中三子(右起)戴耀廷、陳健民、朱耀明去年十二月初到警署自首,後來被警方「預約被捕」,但律政司至今仍未提出檢控。(李啟華攝)

眾人諸事

「堅料網」狗仔 追擊佔中三子

Ads by Google

臨近九二八,黃絲帶開始討論返回佔領區舉行紀念及重聚活動。中共當然唔會輕易放過佔中三子,最近亦有個資金來源神秘嘅新網媒「堅料網」,派狗仔隊同記者追擊三子。

 


陳健民話最近堅料網女記者趁佢離開中大出去食晏之際,強行進入佢辦公室賴死唔走,一嚟就問佢「做乜仲唔坐監」,陳健民話要等法庭判決先知,點知個記者追問如果法庭判咗,咁佢會唔會坐監,陳健民今勻真係俾佢吹脹,直言:「法庭判咗,有得揀坐唔坐㗎咩?」呢位記者似乎學咗陳佐洱咁,唔多熟悉香港法律。
堅料網亦派記者喺柴灣浸信會守候朱耀明牧師,其間訛稱約咗佢做訪問,最初佢哋唔肯展示記者證,非常鬼祟,後來有一日索性衝入教會辦事處話要搵朱牧,先透露係「堅料網」記者。最後佢哋當然去埋戴耀廷港大辦公室,但套唔到任何「堅料」。本刊查過個車牌,係今年八月底先登記嘅新車,同堅料網推出嘅時間一致,睇嚟呢個網嚟緊都仲有好多任務要做。

有自稱記者嘅男子喺柴灣浸信會等朱牧,但又唔肯 show證件。

呢架新車喺柴灣浸信會擺咗兩日,後嚟自稱堅料網記者衝上辦公室話要搵朱牧,被職員打發離開。
政府贊助 杜可風拍佔中電影
由著名電影攝影師杜可風執導嘅獨立電影《香港三部曲》,將於佔領一周年當日喺香港上映。舊年雨傘運動期間,周不時見杜可風喺佔領區取材,呢套電影嘅第二部曲《愚公移山》,就係講香港年輕人佔領街道,藉以思考未來。
《香港三部曲》獲選今屆《多倫多國際電影節》做首映,記者有位身處多倫多嘅朋友去睇過,發現贊助機構當中,包括香港駐多倫多經濟貿易辦事處。咦?聽落唔係好對路,特區政府贊助佔中電影?
特區政府原本邀請杜可風拍攝一套有關香港細路仔生活嘅短片,喺香港電影節放映。但拍攝期間發生雨傘運動,杜可風想加入相關元素,就自行網上集資完成第二、三部曲《後悔莫及》。由政府資助嘅短片,發展成網上集資完成嘅獨立電影,有佔中題材,唔知政府有冇後悔呢?商務及經濟發展局話,有關贊助詳情要問番多倫多經貿處。

《香港三部曲》將於九月廿八日喺香港上映。

舊年雨傘運動期間,杜可風到金鐘佔領區為《香港三部曲》取材。(《蘋果日報》圖片)
卿姐贈單車 仁哥望減十磅
唔講唔知,民主黨立法會議員何俊仁原來「分量」十足,身高一百六十厘米嘅佢,有成一百六十磅。黨主席劉慧卿可能擔心仁哥健康,幾個月前突然送咗部健身單車俾佢,放喺立法會辦事處,希望仁哥多做運動。
不過仁哥話佢平時返工好少分心踩車,上週五特登示範俾記者睇,聲稱做運動對佢嚟講係 easy job,但佢踩咗三十秒已經上氣不接下氣;當將單車調校至阻力最大時,仁哥仲索氣兼出汗。踩咗四分鐘左右,佢仲趁機停晒手腳,同黨友胡志偉傾偈。
仁哥透露話半年內想減十磅,減唔到就請大家食飯。胡志偉俾貼士仁哥,叫佢開多啲晨早街站,同埋夜晚八時後唔食飯,仲要戒食消夜。唔知仁哥做唔做得到?

何俊仁示範點喺立法會辦公室做運動減磅,但佢踩咗兩分鐘已經標晒汗,踩多兩分鐘就自行停低。究竟減唔減到磅㗎?(翁少陽攝)

卿姐話健身單車淨係送俾何俊仁一個,仲叫佢唔好食咁多豬扒。(翁少陽攝)
朱經緯棍下逃亡 護花女主角曝光
一年前,朱經緯警司毆打途人事件之中,替身旁女子捱警棍嘅 Osman好多人都識,女主角卻罕有現身,究竟護花男嘅護花對象係邊個呢?
記者追查之後發現,呢朵小花叫馬俊怡( Rose),現為網店店主兼全職模特兒,曾經參與廣告、 MV拍攝,又擔任唔同活動嘅模特兒及禮儀小姐, facebook專頁亦有數千人追蹤。
Rose亦係香港第一隊女子電競隊成員,正受訓成為領隊,隊員都話 Rose似大姐姐,會幫佢哋處理情緒問題。咁好嘅女仔,真係抵捱呢一棍,但 Osman強調兩人只係朋友關係,叫記者唔好亂諗。

Osman嘅女友人原來係女子電競隊成員 Rose。(莫智謙攝)

上年十一月朱經緯揮動警棍打傷途人,「護花男」 Osman以身軀為女友人擋棍。(《蘋果日報》圖片)
撰文:巫不言
news@nextmedia.com

文章標籤

tvb4life 發表在 痞客邦 留言(0) 人氣()