爆壹爆

賭王情傾汪阿姐

Ads by Google

接受客少不如爆料,爆哥前一排過澳門,撞到呢排成日爆料嘅賭廳廳主何大志,佢之前接受訪問,都爆過唔少澳門賭業不為人知嘅內幕,好似澳門有賭廳為避稅而暗中賭枱底,又有女人為賭錢甘願陪男人上床,之後又狂插台灣前總統陳水扁太驚老婆而累事。爆哥睇完都大叫過癮,驚澳門街黑白兩道圍揼佢。但佢話冇有怕,橫掂澳門呢期個個自身難保,晚飯期間,佢飲幾杯後又有料爆,今次輪到賭王何鴻燊喇!


何大志話,同賭王識咗好多年,大家好好朋友,佢仲好尊重賭王家族添,但佢就唔覺意講咗少少賭王風流韻事。何大志話,雖然賭王追女仔有一手,特別係女星,但都有食檸檬嘅時候,「何鴻燊以前好欣賞汪阿姐,追咗好多年想做朋友喇,不過都係唔成功。」何大志估計,可能有人覺得賭王「唔係佢杯茶」,所以拒絕賭王好意,「你要明白,點解汪明荃會做到政協,佢就係正氣嘅女人,係好唔同。」汪阿姐好嘢!
追唔到汪阿姐唔緊要,風流倜儻英俊瀟灑嘅賭王,一樣大把紅顏知己。何大志又爆,有一個依家做咗星媽嘅艷麗女星,以前其實同賭王行得好埋,賭王仲好照顧佢添。呢個星媽當年使咗賭王唔少錢,而且為人仲玩得好爛好癲添。係邊個?爆哥唔敢開名啦,各位大佬自己估喇!
空姐晒黑絲長腿


空姐就梗係正啦大佬,爆哥有唔少女性朋友就係空姐。呢兩日,有空姐同爆哥講單料,話港龍航空內部收到一張空姐相片,當然唔係好事喇!相中人幾靚女兼著住制服,坐喺機艙座位上將隻腳放上椅背,黑絲長腿好香艷任睇,令爆哥好有遐想想約佢飲酒。空姐朋友就話咪搞啦,個空姐因呢件事有排煩,事關航空公司對空姐一向管得好嚴,食香口膠都話唔得,更何況影埋黑絲誘惑相,聽講已有人投訴,相中人今次多數會俾人炒,細路女梗係貪玩啦,俾次機會啦!
爆哥打俾國泰工會主席黎玉嬋問吓,佢就認為,只要著住套制服,就要保持空姐嘅良好形象。佢覺得個空姐可能只係貪玩,但唔好彩惹上麻煩。佢呼籲空姐同事要小心保管私人相片,盡量唔好放上社交網站平台,因為人人睇到,有可能俾人報仇㗎!
港鐵變成髮廊


香港人生活節奏一向急速,總之乜嘢都要講效率,所以朝早搭地鐵返工時,成日都會見到一班 OL,一路坐車一路執番靚個樣,不過多數都係搽唇膏,又或係搽粉底,咁就可以慳番屋企化妝嘅時間。不過, OL化妝只係小兒科,爆哥前排見到嗰幕先叫震撼。
早幾日喺牛頭角港鐵站上車,見到一個年約六十歲阿婆,用膠袋包住個頭,搞邊科呢?八卦望多兩眼,先發覺佢竟然喺度染髮焗色。吓,咁都得。個婆婆仲應該好眼瞓,你有你望佢全程合埋雙眼,話之你啦。真係諗極都唔明,點解佢要染住髮去坐車,好趕時間呀?睇來婆婆應該退咗休㗎喇,咁急趕去邊呢,唔通三缺一俾人急 call去開枱?由於婆婆造型太出位,成個車廂乘客全部 O嘴望住佢,唔少人仲靜雞雞用手機偷影添。
爆哥乜料
金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

文章標籤

全站熱搜

tvb4life 發表在 痞客邦 留言(0) 人氣()