蘇敬恆九月六日第一次擔任《城壇》主持,估唔到卿姐嗌佢一聲「傻仔」,《城壇》網上點擊過百萬。(莫智謙攝)

眾人諸事

卿姐帶挈 《城壇》點擊過百萬

Ads by Google

傳媒界男神蘇敬恆週日主持第二次《城市論壇》,題目講虐兒就有啲沉悶,台上台下都冇乜火花,連往日狙擊前主持謝志峰嘅維園阿伯都「失場」。蘇敬恆話上週四定咗呢個題目,直至週六朝早中聯辦主任張曉明聲稱香港唔搞三權分立,於是《城壇》打算改題目,但可能時間太趕,約唔到建制派嘉賓,不過係咩人拒絕出席,佢就唔肯講。

 


港台中人透露,蘇敬恆聯絡過有法律背景嘅建制派,包括梁美芬、謝偉俊,以及行會成員張志剛,但佢哋貴人事忙;港區全國人大兼基本法委員會委員譚惠珠直頭聯絡唔到。相反泛民啲人得閒啲,話咁快答應出席。
講政治嘅題目真係會多啲火花同收視,港台中人仲話,九月六日蘇敬恆第一次「登台」,因為糾正民主黨主席劉慧卿講嘅「香港特別行政區係中華民國嘅一部分」,俾卿姐嗌做傻仔,估唔到網上點擊率兩日已經過百萬,對比七月廿六號謝志峰主持最後一集《城壇》,講 689炒高官,累積至今都係得十萬點擊,差成十倍。唔知啲人係想睇卿姐定蘇敬恆呢?
女神參政 爆粗刪 facebook

青年新政游蕙禎(右)嘅純情 look喺傘兵中突圍而出,但真人原來都幾豪邁,鍾意講吓粗口。 (翁少陽攝)

傘下組織「青年新政」打算派人參選年底舉行嘅區議會選舉,焦點落喺年僅廿四歲嘅靚女 OL游蕙禎身上,佢正積極考慮出戰黃埔東,對手係經民聯嘅梁美芬,禎禎 BB一副純情 look,應該搶到唔少票。
有知情者爆料,話禎禎 BB真人都幾大情大性,喺一啲通訊群組講到興起更會爆粗,但有時又會 send埋啲舔腳 symbol出嚟,令人摸不着頭腦,所以參政前佢將個人 facebook刪咗,即使出嚟接受訪問,都一定要有青政另一個社區主任傍住,擔心佢講錯嘢。
亞洲先生被騙財騙色
《城壇》台上嘉賓討論唔夠激烈,有時靠台下觀眾發言搭夠。不過週日一名中年男觀眾相當騎呢,明明討論緊虐兒,佢話自己被騙財騙色,呼籲騙子唔好再呃人,又希望當局增加對男士嘅支援,離題幾千里。
原來呢位仁兄最鍾意搏出位,佢參選一二年「亞洲先生」時帶咗幾梳蕉去面試,第一圈就被踢出局;佢又自稱未來最受歡迎男歌手,○九年參加《亞洲星光大道》,亦因走晒音被叮走。

本週日《城壇》題目係虐兒,但台下觀眾鄧簡文發言時,一開口就話自己被騙財騙色,搞到蘇敬恆都要忍笑。 (莫智謙攝)

四十一歲嘅鄧簡文三年前參選亞洲先生,用香蕉表演雙節棍,話要用嚟保護心愛嘅人喎。 (《蘋果日報》圖片)
鳩嗚團成員好有米

鳩嗚團喺華人民主書院晚宴用咗過萬蚊買咗三張枱,仲有「金主」花兩萬蚊買咗余若薇幅字畫,非常俾面。

華人民主書院週日晚上舉行十五周年晚宴,平時多數係泛民、學聯成員出席嘅場合,估唔到今年鳩嗚團亦係座上客,買咗三枱,每枱三千六百至六千蚊,都幾俾面。晚宴籌款環節唔少得,何俊仁、劉慧卿呢啲泛民巨星當然俾人揼心口,連鳩嗚團都有人出兩萬蚊買咗余若薇一幅叫「從此以後」嘅字畫,不知幾捧場。
呢班鳩嗚團友唔少係退休人士,佢哋話九月二十日喺旺角舉行三百人 gathering,廿六日就搞紀念雨傘革命活動,當晚暫定六點由旺角西洋菜南街出發,行去尖沙咀再過海去中環或金鐘,呼籲支持真普選人士參加。
撰文:巫不言
news@nextmedia.com

tvb4life 發表在 痞客邦 留言(0) 人氣()