懶理犯法,工人僭建寮屋劏房兼收租。

爆壹爆

複式單位 月租五千

Ads by Google

波叔話香港樓市又來八萬五,嚇鬼呀,眼前香港樓價就堅離地,大把人連樓都租唔起,最近有古惑仔就向爆哥推介「窮人恩物」,起勢咁 sell好乜抵。「五千蚊,租一個複式單位啊!」嘩!複式單位紙紮嘅咩,爆哥唔買都去望吓堅定流。

 


原來個「複式單位」喺洪水橋和平新村 64同 65號,由豬欄寮屋改建,行去輕鐵站只需要十分鐘,複式單位搵隔熱板興建咋,一嚿磚頭都冇好牙煙,爆哥睇見火都滾,隨時火燭就要跳住唱焚身似火。
爆哥捉個村陀地來盤吓,喂老友,改建寮屋再轉租售一睇就知犯法啦!但寮屋負責人話之你,總之有地就霸,仲起多幾間添,佢話又多一個平房落成,有六個劏房出租,最平月租要三千五,另外佢仲起緊十一間劏房,估計月尾就搞掂,仲話大把人租。
爆哥同租客吹兩嘴,個個都埋怨:「而家樓價太貴,冇辦法,想住得舒服啲都唔得,我呢間劏房算企理啦。」
波叔同 689又話樓市嚟緊大把供應,真係廢噏當秘笈,山邊爛鬼寮屋劏上劏都供不應求,睇嚟想樓市跌都好難。

寮屋劏房街招周街貼。

 

借軍醫個朵搵食
早排習總搞閱兵,仲扮有型話正義必勝,然後即場裁軍三十萬,咁多人裁去邊呢?身邊班人妻蒲友口痕即刻話,紅磡已經見到有解放軍打正牌頭開醫館哦!
咁有型?爆哥冇理由唔去八吓。呢位叫唐文儀嘅中醫師,鋪頭門口大大隻字寫住「北京軍區中醫」「軍醫秘方一次見效」,專醫皮膚同跌打,每次診金五十,藥費另計,跌打扭傷就四嚿水。咁巴閉,係咪堅喺北京軍區派來香港統戰爆哥先?佢耍手擰頭,扮神秘話涉及政治要封口:「好敏感,唔講!」爆哥又問唐醫師有冇去過領導人入住嘅「三○一醫院」(解放軍總醫院)應診,佢又乜都唔答。大佬呀!又要喺招牌大大隻字寫自己係軍醫,問兩句又話係軍事秘密,你家陣拍緊周星馳啲戲呀,頂。

嗱!大大隻字寫住軍醫㗎!

上海仔有錢老友曝光
呢期澳門賭業變成冰河世紀,勝和「上海仔」都要由澳門返香港搵食,爆哥喺砵蘭街打完麻雀,成日都見著住中山裝嘅上海仔出現,攞住把梳梳理冬菇頭,真係好難認佢。
上月頭,爆哥又撞到上海仔喺砵蘭街蒲喇,今次拉埋佢「大佬」、勝和超級元老「國華」幫一間順德菜餐廳剪綵,差唔多成個勝和啲高層都送花牌到賀,搞到成隊反黑嚟鎮場。查實呢間餐廳個老細好猛料,叫陳華,大圈仔話事人,佢咪喺雙魚星號開賭廳囉,平時佢好疏爽。據知陳華有錢得來又好鬼爛賭,玩百家樂閒閒哋一、二百萬一鋪,咦,上海仔泊到好碼頭咯。

開張當日,成條街都係花牌。
爆哥乜料
金融界撈家,穿梭黑白政商界,朋友遍布旺角至中環,每星期都八到
唔同料,同《壹》仔讀者過吓癮!

tvb4life 發表在 痞客邦 留言(0) 人氣()