輪廓上仍保留其「大佬」 SLS(已停產)影子,體積略為縮小,順手將所有硬線條圓潤化,至於鷗翼車門…… sorry,不太實用,取消了!
其實,更值得留意是高規格結構,包括全鋁合金車架、鍛造懸掛、碳纖中軸、後置波箱……等,前後重量比為極理想的 47:53,以 FR(前置後驅)布局計,頂呱呱!

壹號幹線

動作驚慄片 Mercedes-AMG GT S

Ads by Google

揸 GT S,就好比睇齣 A級動作驚慄片,動作場面拳拳到肉,真功夫、無特技;而靈異橋段又夠晒恐怖,愈睇愈驚,愈驚卻愈想睇,搞到肌肉長期繃緊,手心不停冒汗,既刺激,亦緊張,膽小者切勿進場,後果自負。

 


快到唔似「 Ben士」
售價:$2,398,000
引擎: 3982c.c., V8;前置,後輪驅動;雙渦輪增壓
馬力: 510匹/6250rpm
扭力: 66.3kgm/1750-4750rpm
波箱: 7前速自動雙離合器(附+/-模式)
加速: 0-100km/h 3.8秒
極速: 310km/h(電子限制)
長/闊/高: 4746/1939/1288mm
重量: 1645kg
耗油量: 9.4-9.6L/100km(公路及市區綜合計算模式)
查詢:仁孚行
網址: http://www.zungfu.com
讚一讚
有可能是現時最癲喪的 FR(前置後驅)快車,孖 turbo發圍反應奇快;車架敏感度高,出入彎身手亦快如閃電,操控「上級者向」,好有挑戰性。

彈一彈
動力輔助太多,慢車時轉向感亦相當古怪,特長車頭有礙睇位,出入狹窄停車場保證嚇到「青面」。


論速度, GT S所展現的快,比一般平治(甚至一般 AMG)快車都……更加之快,它既集合了自然吸氣引擎轉數零舍生猛的特性,同時又有 turbo偈的狂野及瞬間突圍能力,運轉順暢兼且喉聲極為懾人,時刻都誘惑你對油門施壓。


吸睛位固然是波箱槽上滿布按鍵的控制樞紐中心, Edition 1版更以 Nappa皮襯鮮紅繡線,氣氛有型到爆,唯獨是乘客間距離頗遠,拖手仔、摸大髀都有難度,還是緊握軚盤,專心揸車為上策。
響喉模式下排氣聲浪震耳欲聾,咁到底係喉聲勁抑或 Burmester音響醒?自己揸,一定揀前者。



桶座熟口熟面,無錯,就係 A45 AMG那張,不過中央換成 Nappa皮,質感、觀感都高級點,勉強算做有誠意。


高級跑車自然有行車模式選擇,要盡展 GT S潛能,而自問有一定「斤兩」的話,建議多用 S+,至於 RACE模式,太癲、太過大解放,還是少用為妙。


GT S懸掛並非「死硬派」,但底盤調校卻異常敏感,任何細微動作,都能忠實反映於行駛動態之上,它不單入彎快而準,更厲害是車尾動態非常「生鬼」,稍微大油出彎就即時橫移(甩尾),在 S+及 RACE模式下,技術要求相對高,每次駕馭都充滿挑戰性,對超跑來說,反而是優勢。


波棍(細細支)設計上及擺位上都有戰鬥機 feel,真心覺得係有型,不過操作時卻被座椅兩側阻礙(嚴重頂手),又一次證明,要靚,從來都要付出代價。


尾箱 350公升容量,以跑車計,算大;無任何翻摺功能,搬動物品時小心刮花座椅後的全碳纖「塔頂」撐桿,否則必定非常「肉痛」。


Edition 1版採用固定式尾翼,居然並非碳纖製品,觀感不太搭配,似「土炮改」。
與 C63共用的全新開發 4.0公升 V8雙 turbo引擎,採用賽車規格的乾式油底(潤滑系統),重心特低外,安裝位置亦刻意貼近前軸,營造出分布更理想的前中置布局。另外,兩個增壓器位於兩組汽缸夾角中央,好處是可縮短管道,有助提升反應。



GT S用上更輕及煞車效能更強的碳陶瓷制動碟,有金色卡鉗識別,好 match。
醒多句
除 GT S外,另有 GT型號,相同引擎結構但馬力調低至 462匹,取消碳陶瓷制動碟,尾差速亦由電子改為機械式,售價為較便宜的$2,138,000。點睇?當然唔爭在啦!

環顧市場,再比對機械規格, AMG GT其實沒有真正同級對手,但平治的「瞄準器」,就好明顯對正保時捷 911,北美及歐洲的超跑市場,看來將有好戲上演了。
撰文:廖宏俊
攝影、攝錄:方保山
features.nextmedia.com

文章標籤

全站熱搜

tvb4life 發表在 痞客邦 留言(0) 人氣()