賺就政府袋,蝕就公司啃,有冇咁大隻蛤乸?

中環人語

新世界外圍搵食圈

Ads by Google

689當選特首嗰刻,新世界老細純官撲上台支持,都推算到尖東條咁長嘅海濱批俾新世界去管理。新世界講得好好聽,負責營運的屬非牟利機構,賺就歸政府,蝕就歸公司喎;只不過將來海濱長廊有成萬呎餐飲設施,租客點揀,租金又點定呢就無講。 


新世界鄭家子姪多籮籮,好多唔入上市公司坐,就喺外圍搵食。呢,好似純官個大婆葉美馨,嫁入鄭家後都唔係繑埋手做少奶奶,一九七八年就喺新世界旗下麗晶酒店開 Blooms N Blossoms花悅賣花,此後每間新世界旗下嘅君悅、尖沙咀及沙田凱悅、萬麗海景都附設一間花悅,唔好睇小花檔呀,新世界旗下嘅公司,凡有租客開張,紅事、白事、酒店、辦公室嘅花籃擺設裝飾,又點會唔幫襯自己人呢,花悅唔使𢱑都大把生意啦。咁,未來嘅海濱長廊食肆,又會唔會預埋純官女婿、專搞紅酒食肆生意嘅龐建貽呢?話晒喺新世界大廈都有佢搞間 Classified餐廳分店吖!

老婆葉美馨拍住凱悅系酒店開花店。(關永浩攝)


女婿龐建貽在新世界大廈開設 Classified,踢走 Starbucks。(關永浩攝)

金融逍遙客: Uber完美擊倒的士佬
游走於中港台併購、私募投資的金融多棲動物,現為多間上市公司主要股東及董事


職業緣故,逍遙客每年要睇過百個項目,也經常要試日新月異的互聯網產品,從旅遊、教育、交友到科技,每年下載兼嘗試使用也不下百種,但體驗後仍會留下嘅真係百中無一。用後離不開嘅,至今只有最近港人力挺嘅 Uber。
呢個所謂共享經濟代表產品,確實犀利,任何人有架車又有時間就可開工。客人任何地點叫車都總有一架喺左近。判斷一個互聯網產品價值,先決條件是問呢個產品解決咗客戶什麼痛點?又提供了什麼價值?估值大細就看市場規模及快速複製能力。呢三個問題差唔多係所有互聯網投資人核心思維。 Uber提供一個完美示範,首先它解決咗傳統的士佬不思進取服務、遠離乘客期望呢個痛點, Uber對車和司機都有一套標準,逍遙客喺洛杉磯就遇上全身酒店式禮服打扮,戴白手套加對皮鞋擦到比我「令」嘅 Uber Black司機。而 Uber為有時間又有架生嘅司機提供一個隨時開工機會。在美國某晚,一對父子喺屋企睇電視收到附近有客,就接咗我張柯打送我回家。需求加供應都解決咗,剩下就是如何快速複製。
Uber核心能力之一,就係 IT能力及一套嚴謹服務制度,資產輕到無倫,幾乎可以一個 iPhone或 iPad就可走天下,難怪可以瞬間席捲全球。一架車都唔使擁有嘅 Uber,最新一輪估值已是 500億美金,反觀有七百幾架飛機嘅聯合航空先值 220億。一個的士牌值 700萬,呎價 90萬地鋪嘅黃金歲月肯定一去不返,新經濟的確要用新思維先可以理解。
中環寸嘴:我唔姓楊,改姓𡁻叫……「完唱」

打番條金澄澄領呔,俾面你福臨門澳門開張,隔籬咪九福個經理。(關永浩攝)

工廈大王楊耀松長子,是各大有名食肆之 VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

有相為證,舊年隻南非龍蝦,開邊原隻上㗎!

上個禮拜我寫福臨門個侍仔話少爺嫌 cheap唔賣$350隻嘅南非龍蝦,少爺 Duncan澄清話佢哋有賣南非龍蝦,仲問邊個侍應亂講嘢,同我講經理如果「耍」楊公子,便話聲佢知,咁先知道公司的問題,再改善服務。
我哋啲麻甩佬好簡單,話食就食,使乜特登通知你啫。我依家唔姓楊,我姓𡁻,叫「完唱」,我係搞搞震,少少幫襯、多多貼士。舊年去福臨門,個侍應先至話南非水質好,啲龍蝦好正。哈,今年你九福話嫌 cheap無入貨!我夠知你港島福臨門有南非龍蝦食啦,不過係龍蝦伊麵上。我舊年食嘅係原隻薑葱芫荽,我教埋個廚將南非龍蝦原隻上「扮上菜」,雖然你福臨門有品牌啫,都要睇唔同地區嘅消費力,九龍區消費力梗係弱過港島區,你將隻南非龍蝦放喺港福賣?太子爺恐怕唔夠我落得福臨門多呀!
唉,成個尖東海濱伸到去紅磡,淨係益一個財團,梗係貓刮咁嘈啦,遠水救唔到近火。鬍鬚曾之前提倡搞美食車,度嚟度去都唔掂,話無位泊。計我話就泊晒喺海濱,等啲年輕人創吓業,炒栗子、煨番薯,再搵埋過氣港姐譚小環賣魚蛋,退選港姐賣牛雜, promote吓香港地道美食,咁就唔使等三年先有嘢睇啦!
煲呔要搵龍爺
貴為前特首,煲呔曾居無定所,情何以堪。佢住緊渣甸山畢拉山道公務員宿舍二千幾呎單位,露台大到可以坐六個人 BBQ,廚房大過人哋個廳,地板嘅柚木仲厚過一般石屎瓷磚。只不過,風水就……麻麻囉。
小宗支渣甸針住過煲呔曾樓上,住咗無耐已經無鞋挽屐走,露台望住個恍似雀巢嘅勵德邨,唔惹官非都有口舌之爭;後面又有個地盤動土斷財路;樓上以前住咗個北角吞槍自殺總督察,同埋有個精神病鄰居。不過咁,聽聞呢度有「暗財」喎!以往住喺禮賓府嘅煲呔搵開龍爺(龍景銓)睇風水,先至搞咗個魚池養錦鯉,睇嚟龍師傅要出場,不過家陣無公帑開數睇風水,要自己撢荷包囉!

渣甸山公務員宿舍並非有錢就租到,還要睇背景,是否身家清白。
(關永浩攝)

煲呔曾住嘅單位,露台甚少雜物。(關永浩攝)

目測有賞
唔少司機都要搵地方泊車,隨時等老細 on call,估吓早排飲咖啡嘅上市公司主席黃英豪,呢日喺邊條街 stand-by?
A.荷李活道
B.必列者士街
C.干德道

邊個估中,送你 FX CREATIONS Flint直身公事包一個
有意參加者,請於八月二十六日(星期三)下午一時後,將答案、姓名及聯絡電話電郵至 centralman@nextmedia.com
小宗只接受電郵,郵寄免問。

上週人語揭曉
答案: B.香港 Ritz-Carlton
得獎者: Sze C.W.
中獎時間: 1:00pm 19/8/15

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。
(宗菁華)
centralman@nextmedia.com

全站熱搜

tvb4life 發表在 痞客邦 留言(0) 人氣()