上週五下午五至七點,陳淑莊由灣仔軍器廠街出發,到中環租庇利街,測試電車、港鐵、步行時間。
電車︰ 18分 56秒

眾人諸事

陳淑莊挑機 薛國強火滾

Ads by Google

退休政府規劃師薛國強早前入紙城規會,申請將中環租庇利街至灣仔軍器廠街一段約一點六公里嘅電車路剷走。記者睇番份申請詳情,發現原來其中一個申請理由係「東港島線」( MTR Island East Line)已竣工,港鐵可以取代電車,連接港島東西交通。咦,明明係西港島線開通喎!

 


記者上期訪問過薛國強,佢話如果去電車沿線地方,搭地鐵仲快,仲話唔使用數據證明添。不過住喺港島四十幾年嘅陳淑莊,上週五放工時間下晝五點至七點同記者做咗個實地測試,由軍器廠街同一個位置出發,將等車、上落交通工具、燈位、塞車、步行時間等等計算在內,睇吓搭港鐵、搭電車、步行,要花幾多時間到終點租庇利街。
實驗證明,電車只係需要十八分五十六秒抵達,港鐵因為要上落地面花時間,竟然要用廿四分三十五秒。至於薛國強提議嘅行路,就要廿七分五十六秒,比電車慢九分鐘,比地鐵慢三分幾鐘。

港鐵︰ 24分 35秒

步行︰ 27分 56秒

薛國強話要剷走電車,結果俾人圍剿,記者拎住數據問佢回應,佢鬧記者為拗而拗,拒絕再做訪問。(郭永強攝)

記者拎住數據問番薛國強回應,佢話最近俾人問到好火滾,強調興建港鐵係為咗淘汰電車,如果唔係點解唔保留人力車,「短途你咪行囉!我同你講塞車嗰時吖嘛!」記者話巴士、私家車都會塞車,佢就鬧記者為拗而拗、轉移焦點,最後仲話唔再接受訪問,然後收線。
呂元聰撐陳文敏摑左報一巴

《文匯報》寫到呂元聰鬧爆陳文敏,但佢接受本刊訪問時,話唔反對陳文敏做副校,最緊要係澄清到戴耀廷捐款件事。

港大四千幾名校友同市民上月底至八月初「聯署」譴責衝擊校委會嘅學生,只得五個人肯開名(呂元聰、史佩倫、鍾慕蘭、張家健、張劍游),相當騎呢。上週二佢哋又出聲明,批評「港大校友關注組」召集人葉建源等人打民主旗號推學生到前線「受靶」,左報再次大篇幅報導。
本刊搵到呂元聰,佢五九年入讀港大歷史系,六八年返母校教書,一教三十八年。佢話聯署唔係佢牽頭,「我都係俾人擺上枱咋!」所謂嘅聯署,係有校友打電話俾佢讀一次聯署內容,接受就喺份表格度剔一剔,「我冇組織㗎,嗰幾個人我唔識。」至於點解開佢名,原來係要搵個最老嘅出嚟。
呂元聰認為,校委會成員由港督、特首揀嘅,係一個危機,「以前嗰班揀番嚟,佢就冇講嘢,冇嘈,冇出聲,呢班呢,我都唔識㗎,冇個識,佢哋多嘢講。」佢又覺得即使係陳文敏做副校長,學術上佢絕對夠資格,只係調查戴耀廷捐款嘅事未完結,希望陳文敏係一張白紙咁上任,更認為校委會用「等埋首副」只係藉口。當然,佢重申反對葉建源等校友「干擾」校政。
咦,呢種論調同《文匯報》本月初報導「呂元聰責陳文敏輸打贏要毀港大傳統」有啲唔同。呂元聰話,記者訪問完佢,唔知佢點寫㗎,但佢就一定唔係報導所講教務委員會主席囉,因為主席一定係校長。咁都錯得嘅?
政治賄賂早有前科

以一班八十後社運人為主力嘅網台兼社運組織 fm 101喺○九年成立,最出名就係一一年佔領中環滙豐總行,死守到最尾,當時呢股力量不容忽視。

最近 OurTV網台主持鄭永健,以網台「測試反應」之名,接觸新成立嘅傘下政團「青年新政」,話代表數個財團接洽,願意捐錢俾佢哋,條件係必須喺區議會出戰指定選區,挑戰泛民人士,每參選一區可獲資助十五萬元,即係擺明𠝹泛民票。報導一出,立即引來賄選疑雲。
有知情者爆料,早喺一二年特首選舉前,一名扮泛民嘅前 AO兼前社民連成員,幫「金主」搵過社運團體 fm101(現已解散),話佢哋鬧建制派或政府都唔緊要,但要用番相同篇幅鬧泛民,金主會每月捐款一萬蚊。 fm101拒絕後,呢名中間人退而求其次,話唔鬧泛民唔緊要,只需要俾佢哋嘅人入去 fm101做職員就得,但 fm101亦拒絕,中間人好無癮咁冇再聯絡佢哋。
劉江華見乳鴿變方丈

新任民政事務局局長劉江華(右二)上週三約見民主黨「乳鴿」,區諾軒(右三)話劉江華可能係想靠影張相向阿爺交差,覺得咁樣會統戰到青年人。(民政局政治助理徐英偉 facebook圖片)

接替曾德成做民政事務局局長嘅劉江華,可能唔想俾人話佢青年統戰工作做得差,上週二同週三連跑兩場約見工黨同民主黨嘅青年黨員。不過其實只約喺立法會旁嘅 i-Bakery見面,可能想俾成日留喺立會附近嘅記者見到啩。
民主黨中常委區諾軒話,佢同劉江華有少少牙齒印,事緣佢一二年出席立會選舉論壇時公開寸過劉江華對雷曼苦主講一套做一套;今年四月政改三人組落美孚宣傳,時任政制及內地事務局副局長嘅劉江華又被區諾軒等人包圍,搞到好狼狽咁匿藏物業管理處唔敢出嚟。會面當日,區諾軒潤佢一句︰「咁多年嚟多謝你關照。」點知劉江華咁答︰「自從美孚嗰次之後,好耐冇見過你。」劉局長心胸真係廣闊喇,會將泛民政黨嘅行動牢記於心。
撰文:袁慧妍
攝影:李啟華
news@nextmedia.com

tvb4life 發表在 痞客邦 留言(0) 人氣()