鴨記 sales男(中間黑衣者)用天津大爆炸搵生意,真係可恥。

爆壹爆

鴨記可恥男 天津爆炸 sell電話

Ads by Google

呢排真係多天災人禍,爆哥睇見都冇晒心機。不過有人竟然毫無同情心,攞災難嚟開玩笑,爆哥真想打佢一鑊。好似上星期泰國四面佛附近發生爆炸,有港人死傷,全港市民都好傷感,包括爆哥都係,但竟然有一名「腦殘」港女,唔同情不特止,仲要喺 fb貼文話,「通勝話 9月放炸彈先可以炸死晒 D(啲)遊客」,抱怨恐怖分子太早行動,令佢嘅旅遊大計受到影響,未能去泰國做 spa,更令佢「腦細胞急速死亡」,係咪人嚟㗎?


而一啲發災難財嘅人,更加可恥乞人憎。好似天津大爆炸,死咗百幾人,睇見都覺得慘。但深水埗鴨寮街有售貨員,為咗推銷韓國手機,竟然歪理盡出,話天津之所以發生爆炸,唔關乜嘢化學危險品事,而係因為天津人用國產手機,中國手機容易爆炸,所以就炸咗天津。吓,咁都得?
之後,仲要擺成龍上枱,播番成龍幾年前話中國的會爆炸嘅「偉論」,之後接住播天津大爆炸嘅場面,男 sales即刻話:「咁就炸冧咗個天津,你仲敢用大陸機呀?用韓國手機喇。」搵食啫,唔使用死人冧樓嚟搵生意嘅。爆哥見佢講咗好耐,一單生意都做唔成,可能唔少街坊都覺得佢玩大咗。

天津發生大爆炸後,現場變成一片廢墟。(《蘋果日報》圖片)

嫖客瘋搶免費套
政府都話,出嚟玩,要有一「套」。如果唔係自己瀨嘢之外,惹埋老婆女友真係喊都無謂。有朋友同爆哥講,早排志願團體「關懷愛滋」,為咗提醒嫖友預防 AIDS,想出絕世好橋,喺尖沙咀鳳樓地標香檳大廈嘅樓梯口,放咗一塊巨型宣傳板,呼籲有㩒鐘仔習慣嘅嫖客,去做愛滋病毒測試,十五分鐘就知道結果,正所謂自己知自己事,累人就唔好喇。
最頂癮嘅係,為咗提醒嫖客用套,個宣傳板上面,黐咗幾十個某大牌子嘅安全套,免費俾嫖客掹嚟用。嘩,依家啲安全套唔平㗎,一個都要十幾蚊,有着數,一班麻甩佬完全唔客氣,個個都暫時唔睇女住,一窩蜂衝上去搶套,有啲仲一個人擸幾個,真係幫補唔少叫雞費。不過,有嫖客就唔敢攞,話驚有人大整蠱,靜靜雞㓤穿咗啲套,咁就大件事。


免費安全套(箭嘴),嫖客當然爭住搶。

日本酒廠無酒賣

日本酒廠已經冇原酒賣,烏龍茶就好多。
爆哥係蒲友,鍾意飲兩杯。飲咩多,當然係日本余市威士忌,因為愈來愈多人飲嘛。依家去夜場,不時有人問爆哥:「屋企有冇余市?」皆因佢哋公司早前宣布,因為原酒不足,余市及宮城峽威士忌,將於九月一日停售。
消息一出,余市威士忌價錢立即飆升,有啲限量版價錢仲炒高十倍添,真係誇張。雖然係咁,香港市面嘅余市威士忌都幾乎俾人搶晒,搞到爆哥都入唔到貨。前一排爆哥去日本旅行,專誠叫日本朋友,載爆哥去余市威士忌嘅酒廠,諗住血拼大掃貨。點知一入到去,個售貨員竟然話已經無原酒賣,俾當地人同遊客買晒,只係剩番細細支嘅酒辦,爆哥都唔理咁多,酒辦都照殺,買返屋企擺都好,好過空手而回。
爆哥乜料
金融界撈家,穿梭黑白政商界,朋友遍布旺角至中環,每星期都八到
唔同料,同《壹》仔讀者過吓癮!

tvb4life 發表在 痞客邦 留言(0) 人氣()