觀星羅生門

我家女孩拍寫真

Ads by Google

本篇故事如有雷同實屬巧合。話說全城怒插六歲女孩出寫真集,主角原來是 Arke舊相識的姨甥女,身為阿姨想為親人討回公道,一場朋友, Arke亦非一味謾罵,心平氣和來辯個明白。

芯美姨(憤憤不平):藝術有自由,橫睇豎睇輯相冇露點噃,依足規矩,點知又話唔俾,這豈不是「搬龍門」?無所適從呀!

Arke:不雅的定義從來並非一刀切,而且還要顧及世人眼光,身為家長應該比外人所訂立的標準更嚴格更高才是,我反而奇怪點解你家姐(指女孩的母親)會覺得冇問題。

芯美姨:唏,成日估我家姐恨做星媽,有沒有想過根本係囡囡本身恨做童星呢?我家姐只不過成全女兒的心願,唔通咁都錯?

Arke(保持冷靜):做童星,囡囡一早拍過食品廣告,半隻腳踩入了娛樂圈,仲需要去到咁盡嗎?家長是否一定要達成子女願望呢?舉個例,很多小孩子想每天瞓晏啲,假設有些父母亦覺得遲到並非大問題,雙方理念一致;但遲到返學的確違反普世價值觀喎,這時,家長便應該自己守紀律,同時教曉下一代明辨是非。

芯美姨: Arke,我以為你好追得上潮流,點解說話咁古板㗎?

Arke:潮流歸潮流,對錯是對錯。

芯美姨:攝影嘅嘢,家庭主婦識條鐵咩?唯有信晒個攝影師,家姐根本不在現場。

Arke:這是令姐想撇清責任吧?但她愈講到同自己無關,愈反映她不負責任。獨留六歲女孩在家都犯法啦,何況離場任麻甩佬影相?咁同任佢一個人在大海游水有乜分別?

芯美姨(埋怨):啲觀眾成日讚囡囡得意可愛,好啦,徇眾要求一次過影多啲相啦,觀眾又鬧……

Arke:你一時話囡囡自己想做,一時話勉為其難,似係你「搬龍門」多些。

芯美姨:嗱,女嬰拍紙尿片廣告大家覺得冇問題,十八歲拍寫真又冇問題,咁落在中間條線喺邊?三歲得唔得?五歲得唔得?

Arke:遇疑難,可以先交給當局審批,自己決定唔到便由專家決定,這與所謂「新聞審查」不同。

芯美姨(老羞成怒):我家姐已講明非牟利了,仲想點?

Arke:想進一步捧紅個女,花一筆錢當投資,謀取日後更大利益,心知肚明吧。

芯美姨:唉,不瞞你,我家姐就是經濟狀況麻麻,女兒又生性幫輕到家計……

Arke(嘆氣):所以你認吧。我睇,成件事起初由令姐部署,趁書展炒熱話題,與性感寫真潮相提並論,點知玩大咗,收唔到科,自己一身蟻。如今要成名是成名了,但總有好名壞名之分,能否名成而利就,還得看天道人心。

作者介紹

Iris和 Arke是希臘神話裡一對孿生姊妹,托生今世成為本欄主持人,為大家解決情場和職場種種難辨錯對的羅生門事件。
Iris:善良正直的 OL,擅長心理測驗和分析。
Arke:敢愛敢恨的辣妹,擅長星座占卦。

本期撰文: Arke
插圖:朱桂葉
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()