松山研一以往演過好多漫畫角色,今次《青蛙小靈精》又係,不過依然有好多人懷念佢做嘅 L。

電視精

老 L松山研一 打殘《死亡筆記》

Ads by Google

《死亡筆記》日劇版播出,角色被改至體無完膚,好多網民不禁慨嘆一蟹不如一蟹,仲話寧願重溫多次舊版!
如果想睇舊 L松山研一,其實佢今季都有新劇上,改編自 70年代動畫《青蛙小靈精》,今次首次拍成真人電視劇。松山研一由當年性格陰沉嘅 L, 180度變成大細路小宏,淨係演技都贏晒啦!

青蛙版《多啦 A夢》

《青蛙小靈精》於 1970年喺日本播出, 90年代喺亞視都有播過。今次第一次拍成真人版,勾起好多七、八十後嘅童年回憶!原著係講中學生小宏唔小心碌落樓梯,將青蛙平吉壓扁黐喺 T恤上,於是佢哋就開始一齊生活。小宏一向被視為欺凌對象,暗戀女同學又唔敢開口,喺平吉嘅鼓勵及超能力下,激發自己嘅鬥志,用毅力面對困難,慢慢成長。其實成個故事同《多啦 A夢》大同小異:男主角係無用鬼、有非人類嘅夥伴幫忙、跨越困難後又再闖禍,其實咪就係大雄同叮噹!今次電視版嘅故事背景設定為原作嘅 16年後,小宏已經 30歲,依然一事無成,重遇離咗婚嘅初戀情人,再次激發佢改變渾渾噩噩嘅人生態度,希望用毅力追到女神!




小宏嘅打扮係白 tee、藍褲配上一副大太陽眼鏡,網民大讚忠於原著。


大雄嘅情敵係高木杉,小宏都有對手,仲係麵包店太子爺,輸在起跑線。


拍真人版最怕唔似原著,今次演員陣容全部得到原著作家批准,完全呈現漫畫世界觀。 相隔六年再戰電視圈

松山研一相隔六年再次主演日劇,其實佢拍過嘅劇一直都係贏口碑,收視麻麻,於是轉戰電影圈,繼續琢磨演技。不過 4年前佢同女演員小雪結婚, 30歲已經係三個小朋友嘅爸爸,形象變得入屋,而今次嘅角色同佢之前演過的好唔同,令佢覺得挑戰性大增。女主角係前 AKB48一姐前田敦子,原來佢細個有睇過《青蛙小靈精》,所以今次可以做女主角特別開心,不過敦子自從由 AKB畢業之後,人氣大不如前,又被指係最無演技嘅女演員之一,令人擔心佢同好戲之人松山研一做對手戲時被比下去。至於青蛙跳吉就起用女演員滿島光配音,刻意唔用男聲,表現俾日本網民大讚呀!




前田敦子今次做失婚婦人,唔知係咪為咗角色要肥啲?包包面好明顯!


松山研一配前田敦子,感覺上似兄妹多過情侶,好難投入喎!


小青蛙平吉會喺 CG效果下變得立體,喺 T恤跳出嚟,加上鬼馬配音,成為劇集特色。


撰文:關錦雯
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()