85分

私口味

玩轉腦朋友 Inside Out

Ads by Google

我先睇《巨揪舞壯士》( Magic Mike XXL),才看《玩轉腦朋友》( Inside Out)。原來,《巨揪舞壯士》是拍給幼稚成人看的卡通;《玩轉腦朋友》才是拍給成熟小孩看的文藝片。咁先係現實嘛。



你看看六歲女孩寫真事件,你看看小學學生跳樓事件,成年人有幾時似成年人?仲無知過幼稚園學生啦。個個都說 Pixar的動畫專門拍給大人看,呢個講法,要戒啦。
《玩轉腦朋友》的訊息其實好簡單,就係人在成長過程,總要學懂接受悲喜交集。諗到用一個天馬行空得來極富娛樂性的方法表達,毫不簡單。《太空奇兵•威 E》( Wall. E)的催淚位在結尾,《沖天奇兵》( Up)的催淚位在開場,《玩轉腦朋友》的催淚位處處,最勁一個催淚位在戲的中間,講到在十一歲青年 Riley的大腦內,有一個由 Riley憑空幻想出來的角色,以前常在 Riley的腦海中出現,到 Riley慢慢長大,已被打入冷宮,最後更灰飛煙滅,即係話, Riley今生今世都唔會諗番起自己曾經望見「會飛大象」的往事。我立即爆喊,一定喊得勁過你第一次聽到《羅生門》。然後,我諗起小學時代,睇完《龍虎門》,睇完《射鵰英雄傳》,常幻想如果郭靖遇見王小龍會是什麼畫面,仲創作咗一啲降龍十八掌以外的招式,今日,仲會幻想?有時間也拿來擔心股票價位啦。好彩,啲舊記憶,跌咗落堆填區啫,執得番,執得番。
這才是 Pixar的威力呀,如果只想賺大錢,就畫幾隻 Minions出來,然後賣吓刀賣吓叉,開個主題樂園區啦,怎會咁大犧牲整一齣用五種情緒做主角的動畫來自我突破。我擔心的是,《玩轉腦朋友》的導演 Pete Docter,是 Pixar的開山始祖之一, Pixar近幾年有料到的作品,其實全部也要嗰班開山始祖落手落腳拍出來。內部提升的接班新人,水平似乎有一大段距離。是才能問題是態度問題是膽識問題?我最怕是結構問題,是呢班老人家只信任自己而信唔過班下屬,小心保守反而阻礙創意。不要忘記,你們是 Pixar呀,你們一定要傳承下去呀!

方俊傑
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()