壹號幹線

懷舊創新之旅  Benz博物館

Ads by Google

Benz新車固然好睇,不過舊車一樣好睇,之不過,要睇,就要睇最舊,例如 Benz第一部「汽車」,如果對舊車無興趣,亦可以睇「新車」,總之,走入位於德國史圖加特的 Benz博物館,好似上了堂汽車工業發展史。



位於史圖加特的 Mercedes-Benz Museum,單是建築已經好特別,樓高九層,用雙螺旋形設計,毋須重複路線,一口氣沿路行就可以睇勻所有展品。



史上首部汽車 Benz Patent-Motorwagen, 1886年出品,採用單汽缸, 0.75匹馬力,三輪式設計,「軚盤」亦是手柄式操作,可見仍未脫離馬車元素,雖然各方面都未成熟,但已經成功揭開汽車工業發展史,意義重大。



點解 Benz廠徽用三星標誌?原來最初廠方是想向海陸空三面發展,所以在博物館內,就見到船同「飛機」展品。



1902年出品,名為 Mercedes-Simplex, 40匹馬力,此車由 Wilhelm Maybach設計,而你不知道誰是 Wilhelm Maybach?此人對德國汽車工業貢獻極大,不但研發出第一台四汽缸引擎,連不少機械部件如化油器、散熱系統等,統統出自其手筆,而 Mercedes-Simplex更被視為是馬車時代與汽車時代的分水嶺。



睇完懷舊車,睇「新車」,型號 C111:超跑外形、鷗翼車門、轉子引擎( 280匹)等等,夠晒前衞,原來…… 1969年出品,當年已經有實物兼進行路試,連宣傳海報都印好,不過最後一刻,決定擱置不投產,死因不明,真正「 dream car」,發夢先有得揸。

撰文、攝影:劉耀祥(德國史圖加特)
mailto:features@nextmedia.com

    全站熱搜

    tvb4life 發表在 痞客邦 留言(0) 人氣()