經「換算」後, GLC級數,查實等於之前的 GLK,不過 GLK以往只得左軚版,香港絕少見到,其實, GLC體積介乎 GLA與 GLE之間,軸距 2.8米,坐得舒服空間夠大,香港地日常使用,好適合。外形就似放大版 GLA, D柱側窗採用 coupe線條,成功呃到雙眼,無一般 SUV方角尾的累贅感,整體以穩重為主,當然,買得 GLC,大多屬家庭客,「四四正正」之外,出入高級場所,亦一定無失禮,正正是 Benz價值所在。

壹號幹線

終於都是一家人  Mercedes-Benz GLC

Ads by Google

講 SUV, Benz當然絕非新手,之不過,多年來予人印象始終面目模糊,最大問題,在於各「家族成員」都各有不同面貌,好難聯想到,其實「同一條腸出」。
眼見其他 SUV家族夠齊心,車廠終於上年開始改名換姓,統一姓 GL( G系除外),再沿用同廠房車命名方式,分為 A、 C、 E-Class,所以,繼 GLA同 GLE之後,最新成員,就有部 GLC,一家人,終於可以齊齊整整。
論資排輩,由內到外都全新設計的 GLC,可當作 SUV版 C-Class看待,不過換上 SUV車身,既有 C-Class豪華氣派,又有全新駕駛感受,點計,都肯定受盡萬千寵愛。

香港必入


圖中為極大機會引入香港的 GLC 250, 2000c.c. turbo引擎, GLA 250都用緊,但放落「高咗長咗又闊咗」的 GLC車身,講爆炸力,自不能同 GLA相提並論,頭段略為柔順,但開啟 sport+模式後,喉聲變得亢奮,話你知已經 ready to go,加速力隨傳隨到,就算上到四千轉後,都未有力竭跡象。

售價:待定
引擎: 1991c.c.,直 4;前置,四輪驅動,渦輪增壓
波箱: 9前速(附+/-模式)
馬力: 211匹/ 5,500rpm
扭力: 35.7kgm/ 1200-1400rpm
加速: 0-100km/h, 7.3秒
極速: 223km/h
長/闊/高: 4656/ 1890/ 1639mm
重量: 1735kg
耗油量: 6.5-7.1L/100km(公路及市區綜合計算模式)
查詢:仁孚行
網址: http://www.zungfu.com 
讚一讚:行車穩定、隔音寧靜、設備好玩、空間闊大,豪華 SUV條件,統統有齊。
彈一彈:內籠布局跟 C-Class近乎一樣,如果作為 C-Class車主,換車動力應該會稍減。

話你知

既然有 GLA、 GLC同 GLE,自然會問: S呢?毋須擔心,官方已經講到明「大阿哥」 GLS已經 on the way,幾時?估計出年就會現身。



GLC的目標,絕非以狠劈狼踩為主,舒服最重要,所以濾震能力極為出色,「路見不平」,亦無令懸掛露出醜態。此外, GLC隔音功夫做得相當足,先後測試汽油及柴油引擎,傳入車廂的雜音相當微弱,由於太寧靜,所以快車時,記得睇住咪錶,好易超速都唔知。



大量真皮加木紋裝飾,無論賣相及造功,肯定無令人失望,不過 GLC定位屬 C-Class級 SUV,內籠充滿 C-Class風格,情有可原。



既然中控台都是由 C-Class搬字過紙,所以儀錶板亦同 C-Class相似,意料之內。

近年 Benz主打大型 Comand旋鈕,一個掣,已經可以照顧大部分操作,所以用上簡約式中控台加懸浮式屏幕,已經綽綽有餘, Comand旋鈕旁可直接轉換行車模式及車身高低設定,完全單手搞掂。






360度行車鏡頭,不止泊車時先有用,窄路掉頭,一樣幫到手,加上行車線警示、自動軚盤修正及盲點警示燈(設於兩側睹後鏡)等安全設備,安全指數極高,不過香港版會否全部有齊,暫時未知。









講豪華,全車 Burmester音響系統、冷暖座椅兼三區冷氣,想歎?無問題。



格仔紋座椅有新鮮感,坐得舒服,功能亦非常齊全,連同後腰及小腿承托位,全部電動操作,但就嫌包裹程度未算好高,始終以舒適為主,太「逼狹」反而有違原意,理解。



雖然有人嫌 GLC欠缺 GLK四四方方的霸氣,但其實 GLC比 GLK更長更闊,車重亦比 GLK輕 80kg。骨子裡,亦都「好 GLK」,配備氣壓懸掛,㩒個掣,車身即時升高成吋,打風落雨、荒山野嶺,就會發現好有用。



設計與前座襯到絕,只嫌造型太過老正,線條未夠美感,好在空間夠大,能夠「盡展所長」,總叫完成任務。



繼 GLE後,第二部 Benz配備九前速波箱,轉波反應極之敏銳,可以三數秒內,面不紅氣不喘轉三幾個波檔,在 sport+模式,時速達 160km,先會成功上到「九波」,轉個 comfort模式再試,時速約 110km就可以「撻着」。如果 kick-down,更會一口氣連落四個波檔,馬力即時湧出,過程清脆流暢,絕無半點水花,九個波,十分!



買 SUV,無非貪有大大個行李箱, 580公升,夠用未?放低埋後座椅背,更有 1600公升任你擺,三幾部單車,毋須左度右度。



其實, GLC越野底子相當厲害,大會特別安排越野路段供傳媒測試,要連續上落多個近 45度的斜坡外,更經過大型窪地,難度頗高,之不過, GLC不單有四驅幫手,測試車更裝上陡坡緩降系統及多段式氣壓避震等「撈泥」設備,最重要有個硬淨車架,連毫無駕駛越野車經驗的筆者,亦安全完成,原來,撈泥好好玩。

壹車在手

想睇最有動感試車片段,想掌握全城最強汽車資訊,就要 bookmark「 nextcar.next.hk」到你部 smartphone!

撰文、攝影:劉耀祥(瑞士巴塞爾)
mailto:features@nextmedia.com

    文章標籤

    Mercedes-Benz GL

    全站熱搜

    tvb4life 發表在 痞客邦 留言(0) 人氣()