與其「凍顏」,「凍齡」更實際,只要養生有道,即使一把年紀,也可以活力十足,甚至像後生仔般跑街馬。

頭號健康

凍齡有術 耆英迎戰街馬

Ads by Google

自從娛樂圈湧現一批「美魔女」後,年齡似乎不再是秘密,只要「老」得來「靚」,大家都樂於晒命分享。
查實老來靚不靚,都是其次,老得來健健康康,先至最重要。
今次訪問三位長者,年齡加埋超過二百歲,但體能仲 fit過很多後生仔女,他們還約好今年九月一齊去跑街馬,問你服未!與其羨慕,不如的起心肝,學習三位耆英的「凍齡」之道,包你老來一樣咁 fit。

清晨五時,大家仍然好夢正酣的時候,六十五歲的阿儀和六十七歲的昌哥已經起床,準備迎接新的一天。梳洗後,這對夫婦就分頭行事,合力炮製健怡早餐。「我哋唔鍾意出街食早餐,嫌茶餐廳、酒樓啲嘢食太多味精,而且好油膩;自己整呢,簡簡單單,已經好有營養。」阿儀走入廚房,從麵包機拿出剛剛焗好、熱騰騰的多穀麵包,邊切着邊對記者說。
要焗麵包,沒有想像般難,阿儀教路︰「想慳功夫,就用預拌粉,只要加水、加些少牛油攪勻,夜晚臨瞓前,將所有材料放晒入麵包機,校定時間掣,第二朝起身,就有新鮮熱辣嘅麵包食,好方便。」她不諱言,自家製麵包成本一定比購買現成麵包貴,但勝在無任何添加劑,食得安心、健康。

健怡飲食 戒絕凍品


八段錦屬低強度運動,適合長者或 OL作為入門運動,但持之以恒,同樣看到效果。阿儀和昌哥耍八段錦六、七年,血氣運行比後生時更佳,長年可沖凍水涼。

這邊廂的昌哥,則在忙於準備飲料,他弄的飲品非常足料,包括炒過的黑芝麻、快熟燕麥片、熟番薯和香蕉。「將呢啲材料放入攪拌機,加水攪勻就飲得,如果你唔鍾意香蕉,可以改為其他水果,朝朝飲一杯,加一、兩片麵包,已經夠晒飽肚,養顏得來,對腸胃都好好,排便會暢順好多。」
記者試飲過,飲品雖略為濃稠,但黑芝麻的芳香,摻雜着微微的果甜,味道蠻不錯,連營養師都讚兩老識「補」!
註冊營養師潘仕寶指出,黑芝麻含豐富單元不飽和脂肪酸、鈣質、鎂質、纖維素等,有助心臟、骨骼及腸道健康;快熟燕麥片則含水溶性纖維,有助降低體內「壞膽固醇」的水平,促進心血管健康;至於番薯,就有豐富膳食纖維,有助預防便秘;而香蕉屬高鉀質水果,有助調節血壓。但她提醒,這杯飲品碳水化合物豐富,糖尿病人飲用時就要特別留意分量。

踢走三高  BMI正常


兩公婆每朝都合力炮製健怡早餐,黑芝麻燕麥飲料配自家製多穀麵包,清淡得來又有營養。

阿儀和昌哥雖已「夠秤」使用長者卡,但「外在」和「內在」都絲毫無老態,相信「識飲識食」是其中一個原因,「我哋飲食以清淡為主,少煎炸,亦戒咗唔飲、唔食生冷嘢,咖啡、奶茶亦都唔好,因為呢啲嘢好傷脾胃。」就連什麼時間食肉,他們都有諗過度過,阿儀說︰「我哋只會喺午飯時食肉,因為平日六點食晚飯,九點半就上床瞓覺,如果喺晚飯時食肉,會唔夠時間消化,對腸胃唔好。」在這個飲食原則下,兩人既無「三高」,體重指標( BMI)亦正常。
不過,要「凍齡」,單靠飲食並不足夠,還要配合運動。昌哥當了近三十年輔警,早已在年輕時建立起運動習慣,「六十歲前,我仲有做 gym、跑步,以前一星期跑幾晚,由石塘咀跑到田灣,再由田灣跑返來,來回大約兩個幾鐘。不過,而家年紀大咗,唔想做太劇烈運動,驚身體負荷唔到,所以近年就轉咗孖住老婆,一齊耍八段錦。」
對沒有運動底子、半途出家的阿儀來說,八段錦這類相對靜態的運動,比較適合她,「我以前做船務文員,放工又要照顧家庭,所以無乜時間做運動,直到○三年退休,多咗私人時間,先跟老公玩吓。我覺得耍八段錦好好,唔太劇烈,又可以訓練腦筋,因為好多招式要記!」

耍八段錦 舒筋活絡


已報名參加九月街馬的華叔,在物理治療師指導下,學習正確的拉筋方法。

八段錦是氣功的一種,港大行為健康教育研究中心早年便研究過,八段錦的八個招式,可促進身體血液循環,緩解內臟擠壓,兼有助寧神靜氣,改善睡眠質素,最適合經常「奄奄悶」、「周身攰」的都市人。
自從每天做兩小時運動後,阿儀笑言身體強壯了很多,「後生時要沖熱水涼,而家反而可以沖凍水。」雄心壯志的她,還夥拍老公,以及聖公會耆英進修學院二十幾名老友記,齊齊報名參加今年九月全城街馬的三公里賽事。
難得老婆肯「落疊」,昌哥不知幾興奮,「終於有機會做跑手!我哋咁 fit,又有義工陪跑,我好有信心可以完成。」
積極備戰的,除了昌哥和阿儀,還有七十一歲的華叔。擁有一身黝黑皮膚,一看便知他喜歡戶外活動,他笑瞇瞇道︰「我踢咗幾十年波,以前一收工就去踢,但近幾年,年紀跟我差不多嘅波友,都陸續淡出唔玩,於是我就改去行山、游水。」

持續運動 養生之道


年屆七十一歲的華叔,仍保持每天游泳的習慣,加上不吸煙、少飲酒,體魄絕不遜於年輕人。

華叔退休前是車房師傅,現樂得清閒,他每天吃過早餐後,便去深水灣游水,「除非冬天或者落好大雨,如果唔係,我日日都去游,但年紀大咗,要量力而為,所以頂多游半個鐘。」
暢泳後,華叔會步行半小時往香港仔隧道口乘車返家,「其實做運動,唔一定要好劇烈,行多啲,已經係運動。」晚飯後,華叔又再繼續他的「行」程,他會在屋苑附近散步,行夠半小時,才回家休息。
聖公會福利協會一級物理治療師陳建東表示,每日持之以恒做半小時運動,的確可達到養生效果,「如果唔係為消脂,又或者目標唔係提升心肺功能,只係純粹想鍛鍊肌肉、促進血液循環,增加新陳代謝的話,其實每日做半個鐘嘅低強度運動,效果仲好過久不久先做一次幾個鐘嘅高強度運動。」
華叔雖然好「腳骨力」,但從來沒有想過參加跑步比賽,今次「處男」作賽,原來肩負神聖使命,「我雖然一把年紀,但託賴身體仍然好健康,無乜病痛,我估肯運動係一個好重要嘅元素。所以,中心社工推薦我參加今次街馬,希望我能夠鼓勵更多長者多啲做運動,唔好做獨居老人。」陳建東補充,該會將提供四堂跑前訓練班給參賽的長者選手,講解跑步技巧及賽前準備功夫。

話你知

康文署將於八月二日舉行「全民運動日」,屆時將免費開放康體設施供市民使用,包括室內、戶外康樂設施及公眾游泳池等,每人可預訂設施一節;各區指定場地亦有免費康體活動,歡迎市民報名參加。
網址︰ http://www.Icsd.gov.hk/specials/sfad2015 

評估運動強度

美國衞生及公共服務部在一九九六年曾經做過大型研究,指出運動能減低患病風險及死亡率,成年人每天最好能累積三十分鐘或以上的運動時間,即是可分開幾段時間進行,每次不少於十分鐘,但以中等強度運動為佳。要評估運動強度,可參考以下方法︰

飲食有法

做運動,固然不能餓住肚皮,但亂吃一通,亦隨時影響運動表現,也達不到健身效果。
究竟應怎樣揀飲擇食?由聖公會福利協會註冊營養師梁俊賢教路。

話你知

想抗病、抗衰老,保持理想體重是不二法門。想知怎樣計算 BMI?何謂中央肥胖?
如何健康瘦身?可參考醫管局網頁,內有詳盡講解。
網址︰ http://www.ha.org.hk 
keyword:「社區伙伴」>「理想 BMI防病工程」

撰文:沈雅詩
攝影:關永浩、鄭樹清
mailto:features@nextmedia.com

    全站熱搜

    tvb4life 發表在 痞客邦 留言(0) 人氣()