「有次睇報紙見到有隻股叫富貴鳥( 1819),咁都上到市,我就將間鋪改名做發達鳥。」問 Eric天天對着大堆銀紙,有得數無得使,是否難受?他答道:「有得數都幾好呀,我不嬲對錢睇得好輕。」

財經坦白講

Working holiday 5年「發達鳥」

Ads by Google

「廢青」?我覺得呢個只係一個名詞嚟嘅啫。我叫王偉霖,洋名 Eric, 80後,在演藝學院畢業前已獲 nowTV聘用,但我唔想坐喺 office,拒絕咗。一個人去咗 working holiday,足足五年。
呢五年,我先後去過英國、加拿大及澳洲,仲因此識咗有屋、有地、有森林嘅加拿大籍女友。最終分咗手,但咁多年工作兼 part time,竟然儲到過百萬,好搵過留港工作!返來後我喺深水埗開「發達鳥」兌換店,專攻行家唔做嘅日圓「神沙」,試過一日賺得幾蚊。但唔緊要,起碼我將無人要嘅銀仔變番做「錢」,我覺得有意義囉!

嗰個加拿大鬼妹女朋友,係我喺英國 working holiday、做 Starbucks時識嘅!我一畢業就申請,喺英國兩年;佢 visa到期,我亦申請埋去加拿大。嗰時先知,女友原來好有錢,喺加拿大有屋、有地,仲有個森林!佢屋企人係幫當地政府整滑雪車。喺嗰度一年,女朋友逼婚。諗深一層,如果真係結得成下半世唔使憂呀,但咁就一世我又唔甘心,最終都係分手。
返回香港,已儲咗六位數字,想創業,又差少少,結果再申請去澳洲打工。當地麵包師傅幾渴市,人工唔錯,一個鐘有二百蚊港紙。我打多幾份 part time,做埋樓面、清潔、執頭執尾,食就食公司嘅,死慳死抵,四十度都唔開冷氣,一日做足十幾粒鐘,儲到七位數後,走人。
返來後,我用幾十萬買咗深水埗商場深之都三個鋪位(編按:著名死場)。兩個租出去,一個自己用。自用嗰間太細,最好就係做兌換店。

換神沙 賺差價


對於外籍女友答應照顧一世, Eric表明不想「食軟飯」:「做男人無理由要人哋屋企養嘅!」但看過他與前女友合照後,記者反而覺得相當「走寶」。

一間正常嘅兌換店,起碼要千萬儲備,但我覺得多有多做、少有少做。我呢間「發達鳥」兌換店,特別嘅地方,係專去其他兌換店,搵來日圓等細面額嘅紙幣及硬幣,亦即「神沙」,再用一個優惠利率兌俾客人。其實市面好多小型兌換店,都係換人民幣為主,但總有遊客用外幣兌港紙,佢哋收埋啲零碎外幣,去銀行兌換要俾手續費。而儲埋唔兌,亦有貶值風險,尤其係日圓。呢啲鋪頭,就係我 target,每日我會去收集零碎外幣。只要佢哋嘅匯率夠好,我轉頭兌俾客人就可賺差價了。
開始時,我連買入賣出係咩都唔知,問人都無人肯答,惟有慢慢試。仲試過去附近兌換店 mark價,去得太密俾人認出趕走。開張頭一個月,每日只得一單生意,每次賺幾蚊。悶得滯,買咗部 PS4返嚟玩。玩玩吓,之後情願花時間同啲客傾偈,傾傾吓又真係會介紹人上嚟。到而家半年,叫儲到啲客,價都可以開得順啲。我仲用 WhatsApp同客人互動交流,競爭力大咗。
而家雖然搵得唔多,但都夠自己出糧。有人話我呢啲係「廢青」,我覺得呢個只係一個名詞嚟嘅啫!我開鋪都唔係為咗搵錢,要賺得多都唔留喺香港啦!話晒澳洲可以搵到四、五萬蚊一個月。我嘅目標,係想用自己力量去改變呢個市場!好似令無人要嘅銀仔變番做「錢」咁。打工?我唔會去做大財團嘅一粒螺絲仔囉!

撰文:梁延宇
攝影:張國慶
mailto:ed_bn@nextmedia.com

    全站熱搜

    tvb4life 發表在 痞客邦 留言(0) 人氣()