插圖:祝健中

八卦陣

「中聯辦」騙徒急 call泛民

Ads by Google

政改方案被否決後,政界中人估計中聯辦一定會做更多統戰工作,甚至向泛民「釋出善意」。最近泛民政黨收到唔少操普通話嘅大陸人電話,公民黨陳家洛更直接收到「中聯辦」嘅電話添,唔通想叫佢等埋發叔?

陳家洛話,近日立法會辦事處收到好多來歷不明嘅大陸電話,有人聲稱係中聯辦官員,話佢喺大陸犯咗法,叫佢匯錢去某啲戶口,助理一聽就知係騙案,諗住問多兩句,睇吓對方有幾了解國情啦,點知騙徒即刻收線。陳家洛大嘆啲助理太冷靜,下次要扮驚慌先套到料。
騙徒假冒中聯辦行騙,好多港人中招,總共損失幾百萬,西環都罕有咁發表聲明澄清。其實,中聯辦經常向唔聽話人士發出「午夜凶鈴」,為達政治目的又嚇又氹,呢次被騙徒偷橋,西環可能唔多 likely。
騙徒亦利用「順豐速遞」名義出招,民主黨立法會總部職員收到電話,騙徒首先用機械聲扮電話錄音,叫職員㩒一、二、三、四數字鍵,㩒完之後同一個人用番正常嘅人聲,聲稱職員有郵件喺大陸被扣查,職員覺得騎呢,「要呃人都俾啲誠意,搵另一個人聽電話啦!」職員同騙徒講佢打錯咗去民主黨,對方即刻收線。

Telegram變反政府工具

本刊上週三報導中共大舉搜捕大陸維權律師,同日早上約十一時,其中一名被失蹤嘅北京鋒銳律師事務所維權律師王宇,無端端加入 Telegram,唔通已經被釋放?大陸維權人士話,最近幾個被失蹤嘅維權律師都有上 Telegram,懷疑係國保開佢哋電話睇裡面嘅資料,如果有人發訊息俾呢班律師,國保會記錄在案,日後用嚟翻舊賬。
Telegram由俄國 Durov兄弟開發,總部設喺德國柏林。 Telegram本月十日至十二日受到分散式阻斷服務 DDoS攻擊,亞洲用戶收發訊息都有問題,呢幾日正正就係維權律師被捕嘅時間。 Telegram話由於大陸維權人士用 Telegram作加密通訊,被大陸政府列為「反政府工具」(anti-government tool),依家大陸部分用戶仍未能恢復使用 Telegram。咦,唔知香港建制派又會唔會用呢個「反政府工具」通訊呢?




北京鋒銳律師事務所被查抄,其中被刑拘嘅維權律師王宇至今下落不明。


上週三早上,被失蹤嘅王宇突然加入 Telegram,大陸維權人士話應該係國保用王宇嘅電話睇吓有咩算賬嘅線索。 馮煒光撐錯 689

話說 689上週二宣布免去曾德成同鄧國威嘅局長職務後,梁營「齊心基金」網站《港人講地》引述「政府權威消息」,連刊兩篇文章力數兩人佔領期間表現不濟,今次係 689炒人而非局長跳船,呢個權威消息,據講來自新聞統籌專員馮煒光。
不過文章刊出唔夠一個鐘即被刪除,立法會主席曾鈺成週日直斥放料者「蠢到不得了」。據了解,中聯辦唔鍾意梁營唔齊心,有人聞到𤓓味,《港人講地》惟有急急刪文,但梁營亦有聲音反對,認為唔可以令人以為局長跳船,影響梁班子「聲譽」。
今次 689炒人,除咗為搏連任作瀕死一擊,唔多唔少都係新建制派打老左小報告,皆因建制塊餅開始唔夠分,嚟緊又要做選舉工程,遂用佔中做藉口,踢班老左走。消息人士指中聯辦早就過咗乜都壓住嘅日子,總之今次區會、立會選舉搞得好好睇睇就掂。




不怕神一樣的對手,只怕……。查實馮煒光喺梁班子中唔算得寵,不過佢嘅存在可以「證明」投共有前途。


梁粉媒體《港人講地》極速刪除有關局長換人嘅報導,相信係同中聯辦唔鍾意唔齊心有關。 外傭出賣張建宗「密照」外洩


原相相信係有本地僱主突然見到張局長「密照」出現喺自己 facebook,所以 post出嚟,希望有好心人提醒吓佢。

「香港外傭關注組」近日喺 facebook專頁轉載咗勞工及福利局局長張建宗同親友嘅生活合照, caption仲好抵死話「張建宗局長呀!你工人真好! Post晒你們生活照片,私隱不太在意?」懷疑係張局長嘅外傭 upload咗佢啲私人相俾大家飽覽,幅相仲特登 tag咗四十幾人,相信係嗰位外傭嘅同鄉。
記者問過關注組召集人,佢話轉載局長幅相,一來藉此提醒僱主注意私隱,唔好咁容易俾工人亂放家庭相上網,二來都係想關心吓局長知唔知有「密照」流出。但佢相信局長咁有經驗,唔會係一時蝦碌,但好心提醒局長如果想影合照,盡量用番自己部手機,咁肯定萬無一失。局方就回覆話張局長近日才得悉事件,原來上載者係局長家人聘請嘅家傭,上載前冇得到局長屋企人批准,局長方面已提醒對方尊重私隱,對方最後致歉並將照片刪除。

mailto:centipede@nextmedia.com

    全站熱搜

    tvb4life 發表在 痞客邦 留言(0) 人氣()