Frankie替客人紋身前,會先畫圖讓客人過目。他的創作靈感來自神話傳說,右圖的「摩羯」是印度佛教故事中的神獸。

坦白講

紋身要有品

Ads by Google

Frankie Ho, 35歲,「白夜刺青」紋身店老闆,開業五年曾在住家劏房替人紋身。他的 facebook專頁現有近萬人 like,賣點是按客人的經歷和性格,為客人身體留下獨一無二的圖案,但他並非個個客都接。

我覺得做紋身師,最緊要係有品。試過有個客走上嚟,話要跟碧咸紋佢嗰句:「生死有命富貴由天」,咁 Q戇居我梗係第一時間話 no。紋身,跟足一世搣唔甩,圖案係一個人嘅生命符號,代表住佢嘅性格、經歷、審美觀,抄碧咸?唔該,紋完係唔會令你變碧咸。
我間鋪頭唔會有本圖案 menu俾人睇住叫餸食飯,我鍾意聽吓客人講佢嘅古仔,再引導佢諗吓,自己想要放啲乜上身。
有個女仔啱啱夠十八歲合法紋身年齡,上到嚟急急話,要喺手腕到虎口位紋隻蠍子,用嚟遮住個疤痕。我叫佢返屋企攝高枕頭諗清楚先,隻蠍子紋喺咁當眼嘅地方,第日出嚟打工,會影響好多人對佢嘅印象,將來行嗰條路,可能會因為隻蠍子而改變,我唔想佢後悔。結果,個女仔無再嚟,我個心反而舒服。
人要紋身,不外乎三個原因:遮疤痕、貪靚、紀念。我好記得有個六十五歲嘅阿伯,話成世人咩都做過,係差紋身未試,想百年歸老之前,將自己最錫嘅仔女個名紋上身,等自己有件藝術品帶入棺材。我即刻郁手幫阿伯整到最靚,因為佢好知道自己要乜。
有唔少情侶上嚟,話要紋對方個名上身,我通常推得就推,反問佢哋:「你哋真係咁肯定會一生一世?」無論佢哋呢一刻幾鍾意對方都好,萬一將來分開咗,百分之九十九點九都會後悔。我唔係咒佢哋一定分手,而係世事難料,而且人,始終係獨立個體。我隻手臂紋咗兩個字:「戰鬥」、「 Struggle」,都係與別不同。

神奇力量

我十五歲由廣州嚟香港,英文跟唔上冇心機讀書,十七歲就退學,做咗十幾年廚房,不過始終唔係自己杯茶。諗番起細個嗰陣,阿媽送俾我第一份生日禮物係一盒顏色筆,諗到咩都可以隨心所欲畫出嚟,到三十歲我問自己:「點解唔可以靠畫畫搵食?」
以前有朋友搵我畫圖,拎去俾坊間紋身師,有次朋友發脾氣,話我畫嗰幅圖好正,但個師傅紋出嚟好肉酸,咁我就諗不如自己紋埋。一開始靠網上自學,後來識到一個神龍見首不見尾嘅美國紋身大師, MC Jin個「靖」字都係出自佢手。佢唔想人提佢個名,但佢提我一幅畫要畫一千次,畫到合埋眼都畫到出嚟,先可以幫人紋身。
古時部落的人相信,紋身之後上天會賜予人神奇力量。我一路都信紋身會改變人嘅命運,因為身邊人對你嘅觀感唔同。有個客紋咗三條錦鯉之後,話做生意順咗,睇相佬同佢講,錦鯉同佢個命格好夾。我就話,睇相佬呃你十年八年,係個圖紋得靚,令佢個人變得自信開朗至真。
正如我手上嘅「戰鬥」、「 Struggle」,時刻都提住我,點都唔做番廚房。

由你開講

一切好人好事,壞人壞事,先吐為快。
你敢坦白,我敢講。
電郵: mailto:voice@nextmedia.com

撰文:關冠麒
攝影:高仲明

    全站熱搜

    tvb4life 發表在 痞客邦 留言(0) 人氣()