探熱針

現場直擊 拍大台劇 黃宗澤人不如狗

Ads by Google

幾乎肯定會步舊愛胡杏兒後塵,離大台外闖的黃宗澤,在國內一口氣連拍三劇,荷包滿瀉,終於捨得返香港,埋位拍新劇《警犬巴打》。
上週日, Bosco孖住黃浩然同陳秀珠在佐敦拍外景,三十多度高溫冇冷氣,又唔似內地開工有助手服侍替身試位,由頭濕到落腳的 Bosco要自己揸住手提風扇降溫,甚至唔似對手 Bobby狗好命,頻頻 NG都無人詐型,更有替身補位。有好路數, Bosco撇硬!

冇晒表情

上週日(七月十九日)下午三時,半百途人圍住位於佐敦的鴻運大廈出入口,原來黃宗澤孖住病後復出的黃浩然,同 auntie陳秀珠為大台新劇《警犬巴打》開工。
大熱天又冇冷氣,人肉乾煎,見慣世面的陳秀珠,即使被途人圍住狂影,都一於少理,在大廈門外擺好櫈,一有空檔就攝出門外,坐一坐補妝抖涼。至於早前因為患上貝賽特氏症一度停工的黃浩然,西裝加背心熱到不停標汗,其後拍到警犬出場,狗狗頻頻 NG,黃浩然終於忍唔住,熱到要除低西裝褸,但內裡的恤衫已濕透,途人見到都忍不住出聲:「唔怪得之佢(黃浩然)咁熱都唔除褸啦,濕到咁,實好大陣味!」
身為男主角,在國內有兩個助手跟身,又有替身代試位的黃宗澤,明知拍大台戲冇好服侍,亦一早自備手提電風扇吹住以防溶妝,但因為有太多途人圍觀, Bosco大部分時間匿埋唔做人肉布景板。




手提風扇不離身的 Bosco,不時要將身上牛仔衫半褪降溫。





西裝褸內仲有件背心,黃浩然熱到頻頻抹汗。


出絕招

拍了兩小時,終於輪到警犬出場,拍了一陣文戲, Bobby狗已經熱到伸晒脷,之後要牠跳過攝影機扮撲賊,狗狗連番失位,同場的 Bosco和黃浩然重複又重複, take了十多次,拍到無晒表情。
為免費時失事,導演終於出絕招,搵來色澤、身形幾可亂真的毛公仔替身,工作人員將公仔拋過鏡頭,兩 take已收貨。
終於搞掂收工, Bosco turbo腳走人。




Bobby狗頻頻 NG,導演最後唯有出動毛公仔替身,結果兩 take搞掂。


Bobby狗做極都唔達標,同場的 Bosco、黃浩然硬食蝦碌十幾次。


陳秀珠懶理圍觀市民,坐街撥扇散熱。


一口氣連拍三套內地劇的黃宗澤,有望憑擔正做男一的《奶爸•當家》彈出,隨時在內地爆紅。 撰文、攝影:娛樂組
mailto:nextb@nextmedia.com

    全站熱搜

    tvb4life 發表在 痞客邦 留言(0) 人氣()