受過三次被飛的教訓,胡定欣變得小鳥依人,溫柔地依偎住男友 Terry,冧死佬。

娛頭

鑊鑊俾仔飛 胡定欣戒做港女箍 band佬

Ads by Google

就滿三十四歲大台花旦胡定欣,去年底宣布同拍拖超過兩年的廣告界才俊沈栢淳( Patt)甩拖,但話咁快又搵到新碼頭,同大她十三年《今晚睇李》駐場 band佬 Terry(陳明道)拍拖。
不論二打六吳浩康、筍盤馬國明抑或才俊沈栢淳,三次拍拖三次被仔飛,胡定欣痛定思痛,決定要性情大改革,戒港女性格,收斂臭脾氣;更甘願做埋司機車男友出入,出盡法寶箍實新歡 Terry,只望唔好再撻 Q被飛,可以照原定計劃,三十五歲前嫁得出。

 




衰臭四 吳浩康


藐明媽 馬國明


衰逼婚 沈栢淳 爭住做媒人

自爆同男友沈栢淳分手後,胡定欣身邊一班好姊妹「胡說八道」成員包括胡杏兒、胡蓓蔚、李施嬅等,都急住為她做媒;經過一番篩選,最近終於由胡蓓蔚單立文兩公婆推介的四十六歲音樂人 Terry(陳明道)跑出,亦即單立文同李思捷主持的大台節目《今晚睇你》其中一名駐場金毛 band佬。
新戀情發展已經四個多月,據了解,二人之前已經認識,胡定欣同前度 Patt拍拖期間, Terry會有份出席某些聚會,但當時胡定欣有男友,兩人亦不算熟;直到再度俾仔飛,胡蓓蔚兩公婆經常帶住胡定欣出席不同飯局,才正式介紹給 Terry。參加《新秀》出身的胡定欣,和音樂人 Terry有共同話題,大家約埋一齊睇騷,加上一顆恨嫁的心,表現進取,胡定欣好快就搞掂 Terry。
上月中,胡定欣揸住她的白色寶馬,到男友位於跑馬地山村道屋企,停泊在樓下錶位,再上樓短聚兩個多小時。之後兩人一齊落樓,只見 Terry拖住一件行李,胡定欣則急急腳行去打開車尾箱,等男友擺好行李,一齊返自己將軍澳寓所。

15/7短聚落樓

胡定欣揸車去到男友屋企,上樓短聚兩個鐘後,春風滿面一齊離開,但又怕被記者發現,自動保持兩個身位距離。




拉住行李的 Terry,得到胡定欣好服侍,幫他打開車尾箱,又載他返自己屋企繼續下半場。








再去到胡定欣將軍澳屋企過夜,第二日中午先離開。


27/7做完《今晚睇李》, Terry先返回跑馬地自己屋企,放低樂器。


二人世界

Terry之所以漏夜拖埋行李去胡定欣屋企過夜,原因是二人要一齊出發到新加坡,二人世界六日五夜。過去幾個月,胡定欣忙住拍新劇《公公出宮》,其間又要留在開平拍一個月外景,冇得同新歡見面,一拍完劇,即向公司攞假拍拖,除了俾時間宣傳已出街的《鬼同你 OT》外,暫時唔接 job,專心瘟仔。
經歷多次拍拖俾仔飛,胡定欣吸取教訓,針對自己每次被撇都因為公主病發作,典型港女胡定欣決定洗心革面。
當年同奀星吳浩康拍拖,胡定欣因為脾氣臭,無論大小事,經常借啲意同男友開拖,加上性格強又好勝,最終被莊思敏突擊,連二打六男友都保唔住。
「定欣嘅性格的確比較剛烈,有乜唔鍾意唔滿意就發晒出嚟,但近幾年個人大咗,喺呢行時間耐咗, EQ都高咗好多。而家佢對住 Terry,好多時都唔會學以前咁話晒事,又會扮溫柔,成日主動拖住男友,好就得對方!」胡定欣身邊人說。




23/7男友要開工,胡定欣約埋媒人單立文、胡蓓蔚到中環開餐。


食飯前,胡定欣到連卡佛置裝,買了一大袋戰利品。


一邊揸車,胡定欣一邊用電話睇電視,睇自己與田蕊妮在《東張西望》的專訪,相當危險。


胡定欣經常帶男友同班好姊妹胡杏兒黃智雯等人一齊聚會,關係公開。


Terry當日就要到廣州為《左麟右李》演唱會做樂手。 飛硬

33歲的胡定欣,入行 15年,出名公主病難服侍,見光三段戀情中都是俾仔飛。

吳浩康

99年,與吳浩康參加《新秀》認識,拍拖期間,男方被撞破偷會莊思敏,胡定欣慘被飛出局,七年情玩完,事後兩女在電視城開火,胡定欣大鬧情敵:「你著我舊鞋咋!八婆!」

馬國明

08年,胡定欣同出名乖仔的大台筍盤馬國明孖住出戰湖南衞視節目《舞動奇迹》撻着,拍拖兩年,男方提出分手,但胡定欣唔捨得,還趁二人為新劇《鐵馬尋橋》做宣傳,在一次飯局中借酒意向男方道歉,可惜馬國明心意已決。

沈栢淳( Patt)

12年,胡定欣搭上廣告界才俊 Patt,並視對方為結婚對象,火速進駐男友位於渣甸山寓所,去年宣布分手後,胡定欣一度唔肯搬𦧲復合。

急住結婚

據了解,同馬國明期間,胡定欣可以當住其他人面都對男友呼呼喝喝,甚至連對明媽的態度都好惡劣,又逼馬國明搬離屋企與她同居,結果前度要阿媽唔要女友。吸取這次慘痛教訓後,胡定欣同沈栢淳拍拖時,已學識盡量融入對方家庭生活,唔再玩獨霸。
定下目標,一心諗住三十五歲前結婚的胡定欣,所以同沈栢淳拍拖無耐,已搬入對方渣甸山豪宅,貼身黐住男友,因為太恨嫁,三番四次催婚,將根本無打算咁快娶老婆的沈栢淳逼埋死角,結果難逃被飛命運。

爛蒲音樂人

46歲的音樂人陳明道( Terry),入行超過 20年,是圈中天王天后演唱會及唱片監製,當中包括王菲、陳慧琳、林憶蓮。 91年憑住梅艷芳主演電影主題曲《何日君再來》,獲提名台灣金馬獎最佳電影音樂。近年以接散 job為主,是恭碩良樂隊班底中的鍵琴手,早前又為樂隊 RubberBand的 EP及個唱做音樂總監,最近在《今晚睇李》中擔任樂隊成員。
愛玩愛蒲的 Terry去年被拍得與𡃁模 Jeana蒲夜店,二人 high爆匿入廁所 gathering近十分鐘, 03年,他與張栢芝胞弟張柏文凌晨三點飛「保時捷」,結果失控撞山,二人頭部受傷送院。曾經搵過錢的 Terry,手上有一層市值千萬的跑馬地單位,是 92年以 280萬購入,算做有樓揸手。




Terry同 Jeana齊齊暱入廁所十分鐘,惹來無限遐想。


Terry在圈中相當出名,多年來同過不少巨星合作過。


有住客證

一錯再錯,學精的胡定欣同 Terry拍拖四個多月,冇要求同居,寧願車來車往,各自人肉速遞到對方屋企過夜溫馨。星期一(七月二十七日)晚, Terry做完《今晚睇李》,先揸車返跑馬地寓所放低樂器,之後再揸車到胡定欣將軍澳香閨,只見他向保安員出示了住戶證,直接將車駛往屋苑停車場。在女友屋企宿一宵, Terry第二日早上十一時半走人,十五分鐘後,到胡定欣離開,發現有記者的她,不停在將軍澳區內兜圈,又一度折返寓所,半小時後再離開,衝紅燈擺脫追訪。之後,記者再打電話追問她與 Terry情侶關係。
壹:想問吓你而家同 Terry係咪拍緊拖?
胡:感情嘅事我唔係好方便講喎!
壹:你點樣形容而家嘅關係?
胡:唔……了解中吖!
壹:但我哋成日影到你哋一齊喎!唔係影到你去佢屋企,就係佢去你屋企,你覺得有冇機會發展?
胡:感情嘅事我一向都自己處理嘅,我唔回應咁多啦!
壹:咁之前嗰幾次拍拖,因為有啲唔開心分手,咁嚟緊再拍拖嘅時候,會唔會改變你同人相處態度?
胡:唔好意思,我而家揸緊車,我再覆你,唔好意思!




雖然拍拖被斷正,但胡定欣仍然唔肯認,只肯講了解中。


Terry同胡定欣曾一齊出現容祖兒所開 party,他們更分別上載同祖兒合照上社交網站,洩露咗行蹤。





近日因為《鬼同你 OT》受歡迎,胡定欣事業愛情兩得意。


「胡說八道會」個個都有着落,胡定欣都唔執輸,一甩拖就極速搭上 Terry。 惡頂港女

「港女」通病包括拜金、公主病、野蠻,單係一招冇樓唔嫁,已經嚇怕唔少「港男」,圈中「港女病」者亦眾!

謝婷婷

同安志杰分手後,謝婷婷火速搭上李桂蘭之子戴尚安 Sean,拍拖一年,有指 Sean難頂女方公主病,婷婷亦試過被拍得在街上大罵 Sean和經常對男友母親黑面,結果 Sean單方面在 Instagram宣布分手。

廖碧兒

10年,拜金廖碧兒搭上李澤楷表弟林忠豪撇專一陳豪,但一年後即被玩厭拋棄,分手後更被唱貪錢,經常要求送名牌,又扮高貴唔願陪男友出席朋友聚會。

李詩韻

鄧健泓同李詩韻拍拖四年,有指李詩韻因要返加拿大完成學業要停工三個月,於是開口要求男友接濟生活費,又經常要鄧健泓送禮,分手後被唱爆:「佢(李詩韻)正宗港女,淨係識使男友錢!」

本刊 1324期《封面故事》「黎瑞恩胰臟生腫瘤唔割得」中關於香港大學李嘉誠醫學院袁孟峰教授意見的部分,是引用袁教授過往訪問的內容,事前未徵得袁教授同意,袁教授亦非黎瑞恩的主診醫生。袁教授正確頭銜是「香港大學李嘉誠醫學院內科學系講座教授(腸胃及肝臟科)」。謹此更正。

撰文、攝影:娛樂組
mailto:nextb@nextmedia.com

    全站熱搜

    tvb4life 發表在 痞客邦 留言(0) 人氣()